പെരിങ്ങത്തൂരില് ബിഎംഎസ് നേതാവിന്റെ വീട്ടുമുറ്റത്ത് നിര്ത്തിയിട്ട ഓട്ടോറിക്ഷ കത്തിച്ചു
തലശേരി:പാനൂര് പെരിങ്ങത്തൂരില് ബിഎംഎസ് നേതാവിന്റെ ഓട്ടോ തീവെച്ചു നശിപ്പിച്ച സംഭവത്തില് ചൊക്ളി പൊലിസ് കേസെടുത്ത് അന്വേഷണം ഊര്ജ്ജിതമാക്കി. സംഭവത്തിന് പിന്നില് സി.പി. എം പ്രവര്ത്തകരാണെന്ന ആരോപണ ബി.ജെ.പി, ബി. എം. എസ് നേതാക്കള് ഉയര്ത്തിയിട്ടുണ്ട്. പെരിങ്ങത്തൂരിലെ 18-ാം വാര്ഡില് ഗുരുജി മുക്കിന് സമീപം അക്കരാമ്മല് അരുകുനിയില് മനോജിന്റെ ഓട്ടോറിക്ഷയാണ് തിരുവോണദിവസം തീവെച്ച് നശിപ്പിക്കപ്പെട്ടത്.എകെ.മനോജ് ബിഎംഎസ് പാനൂര് നഗരസഭാ കമ്മിറ്റി പ്രസിഡന്റാണ്.
ഉറങ്ങിക്കിടക്കുകയായിരുന്ന മനോജിന്റെ കുടുംബം കനത്ത പുക മുറിയിലേക്ക് അടിച്ചു കയറിയപ്പോഴാണ് വിവരമറിഞ്ഞത്. മുറിയില് നല്ല ചൂട് അനുഭവപ്പെടുകയും ചെയ്തിരുന്നു. മനോജിന്റെ ഭാര്യയും മക്കളും അച്ഛനും അമ്മയും വീട്ടിലുണ്ടായിരുന്നു. വീടിന്റെ പുറകുവശത്തെ മുറ്റത്താണ് ഓട്ടോറിക്ഷ നിര്ത്തിയിരുന്നത്. ഓട്ടോറിക്ഷ തിങ്കളാഴ്ച ഉച്ചയ്ക്ക് കയറ്റിയിട്ടതായിരുന്നു. മനോജ് വീട് തുറന്നു പുറത്തേക്ക് എത്തുമ്പോഴേക്കും ഓട്ടോറിക്ഷ പൂര്ണ്ണമായും കത്തി നശിച്ചിരുന്നു. വീടിന് തീപിടിക്കാതിരുന്നതിനാല് വന് ദുരന്തമാണ് വഴിമാറിയത്.
ഓട് മേഞ്ഞ വീടാണ് മനോജിന്റേത്. മുറ്റത്തുവിരിച്ച താര്പ്പായയും സമീപത്തെ വിറകുകളും ജനല് എന്നിവയും കത്തി നശിച്ചു. മത്സ്യം വളര്ത്തിയിരുന്ന അക്വേറിയവും നശിച്ചു. വീട്ടുകാരറിയാന് അല്പസമയം കൂടി വൈകിയിരുന്നെങ്കില് വീടിന്റെ മുകള് നിലയ്ക്ക് തീ പടരുമായിരുന്നു. വീട്ടില്നിന്ന് പൈപ്പ് ഉപയോഗിച്ച് വെള്ളമെടുത്തു തീ കെടുത്തുകയായിരുന്നു. ചൊക്ലി പോലീസ് സ്ഥലത്തെത്തി അന്വേഷണമാരംഭിച്ചു. പ്രദേശത്തെ സാമൂഹ്യ പ്രവര്ത്തകനും നാട്ടുമുഖ്യസ്ഥനുമായ എ.കെ. അനന്തന്റെ മകനാണ് മനോജ് .
പെരിങ്ങത്തൂരിനടുത്ത് മാക്കാണ്ടി പീടികയിലെ സൗരവിന്റെ ഓട്ടോയും കത്തിക്കപ്പെട്ടിരുന്നു. ഈ കേസിലും പ്രതികളെ കണ്ടെത്താനായിട്ടില്ല. ആര്എസ്എസ്, ബിഎംഎസ് ,ബിജെപി നേതാക്കളായ ജിരണ് പ്രസാദ്, പിപി രാമചന്ദ്രന് , കെ.ടി.കെ. ബിനീഷ് ,കെ. മഹേഷ്, കെ.കെ. ധനഞ്ജയന്, പി.പി.രജില് കുമാര്, സി.പി.രാജീവന് , എം.പി. പ്രജീഷ് എന്നിവര് മനോജിന്റെ വീട് സന്ദര്ശിച്ചു. നേരത്തെരാഷ്ട്രീയ സംഘര്ഷം നിലനിന്നിരുന്ന പ്രദേശങ്ങളിലൊന്നാണ് പാനൂര്.വീടാക്രമണവും വാഹനങ്ങള്ക്കു നേരെയുളള അതിക്രമവും വര്ധിച്ചുവരുന്ന സാഹചര്യത്തില് കര്ശനമായ നടപടികള് സ്വീകരിക്കുമെന്നാണ് പോലീസ് പറയുന്നത്. പാനൂര് ടൗണ് കേന്ദ്രീകരിച്ചു രാത്രികാല വാഹനപരിശോധനയും ശക്തമാക്കിയിട്ടുണ്ട്.
Click it and Unblock the Notifications
Sign in with Google