'പൗരത്വ ഭേദഗതി നിയമത്തിന്റെ പേരിൽ മുസ്ലീം ജനവിഭാഗത്തെ പേടിപ്പിക്കാൻ നോക്കുന്നു'; എപി അബ്‌ദുള്ളക്കുട്ടി

Updated: Thursday, March 14, 2024, 0:56 [IST]

കണ്ണൂര്‍:പൗരത്വ ഭേദഗതി നിയമത്തിന്റെ പേരില്‍ കോണ്‍ഗ്രസും കമ്യൂണിസ്റ്റുകാരും മുസ്ലിം ജനവിഭാഗങ്ങളെ പേടിപ്പിക്കാനും തെറ്റിദ്ധരിപ്പിക്കാനും ശ്രമിക്കുകയാണെന്ന് ബിജെപി ദേശീയ ഉപാധ്യക്ഷന്‍ എപി അബ്ദുള്ളക്കുട്ടി. കണ്ണൂര്‍ മാരാര്‍ജി ഭവനില്‍ മാധ്യമപ്രവര്‍ത്തകരോട് സംസാരിക്കുകയായിരുന്നു അദ്ദേഹം. ഇത്തരം വ്യാജപ്രചരണങ്ങളില്‍ നിന്നും കോണ്‍ഗ്രസും കമ്മ്യൂണിസ്റ്റുകാരും പിന്മാറണമെന്നും അദ്ദേഹം ആവശ്യപ്പെട്ടു

2019 ല്‍ ഈ ബില്ല് പാര്‍ലമെന്റില്‍ അവതരിപ്പിച്ചപ്പോള്‍ പ്രതിപക്ഷവും ഇടതുപക്ഷവും പറഞ്ഞത് മുസ്ലിം ജനവിഭാഗത്തെ പാക്കിസ്ഥാനിലേക്ക് അയക്കാന്‍ പോവുകയാണെന്നായിരുന്നു. എന്നാല്‍ ഈ കഴിഞ്ഞ നാല് വര്‍ഷത്തിനിടയില്‍ അത്തരത്തിലൊരു സംഭവം ഉണ്ടായിട്ടുണ്ടോ ആരുടെയെങ്കിലും പൗരത്വം നഷ്ടപ്പെട്ടിട്ടുണ്ടോയെന്ന് കൂടി ഇത്തരക്കാര്‍ ചിന്തിക്കണമെന്നും അദ്ദേഹം പറഞ്ഞു. നിയമം യാഥാര്‍ഥ്യമായതോടെ കോണ്‍ഗ്രസ്സും കമ്യൂണിസ്റ്റ് പാര്‍ട്ടികളുംമുസ്ലീം ജനവിഭാഗങ്ങളെ തെറ്റിദ്ധരിപ്പിക്കാന്‍ ശ്രമിക്കുകയാണ്.

വലിയൊരു ജനവിഭാഗത്തില്‍ പേടി സ്വപ്നങ്ങളുണ്ടാക്കി അവരില്‍ അസ്വസ്ഥതയുണ്ടാക്കുകയാണ് ഇവര്‍. കുറെ ഹതഭാഗ്യരായ ജനവിഭാഗങ്ങള്‍ക്ക് പൗരത്വം നല്‍കുന്നതാണീ നിയമം. ഇന്ത്യയിലെ ഒരാള്‍ക്കും പൗരത്വം നഷ്ടപ്പെടുന്നതല്ല. ബംഗ്ലാദേശില്‍ നിന്നും പാക്കിസ്ഥാനില്‍ നിന്നും തുരത്തിയോടിക്കപ്പെടുന്ന പാവങ്ങള്‍ക്ക് പൗരത്വം നല്‍കണമെന്ന വിഷയം പാര്‍ലമെന്റില്‍ ആദ്യം അവതരിപ്പിച്ചത് 2003ല്‍ ഡോ. മന്‍മോഹന്‍ സിങ്ങായിരുന്നു എന്ന വിവരം കോണ്‍ഗ്രസുകാര്‍ക്കും കമ്യൂണിസ്റ്റ് കാര്‍ക്കും അറിയാമോ എന്നും അബ്ദുള്ളക്കുട്ടി ചോദിച്ചു.

അന്ന് പാര്‍ലമെന്റില്‍ നിന്നും ഈക്കാര്യം കേട്ട അന്നത്തെ ഉപപ്രധാനമന്ത്രി എല്‍കെ അദ്വാനിയുടെ കണ്ണുനിറഞ്ഞുവെന്നാണ് മാധ്യമങ്ങള്‍ റിപ്പോര്‍ട്ട് ചെയ്തത്. ഇത്തരം കളളപ്രചരണങ്ങളില്‍ നിന്നും ഉത്തരവാദിത്വപ്പെട്ട രാഷ്ട്രീയ പ്രസ്ഥാനങ്ങള്‍ പിന്‍മാറണമെന്നും അബ്ദുളളക്കുട്ടി ആവശ്യപ്പെട്ടു.

ഇതിനിടെ പൗരത്വഭേദഗതി നിയമം നടപ്പിലാക്കരുതെന്ന് ആവശ്യപ്പെട്ടു കണ്ണൂരില്‍ വ്യാപകമായ പ്രതിഷേധ പ്രകടനവും പൊതുയോഗങ്ങളും ഇടതു യുവജനസംഘടനയായ ഡിവൈഎഫ്ഐയും യൂത്ത് കോണ്‍ഗ്രസും നടത്തിയിരുന്നു.

ലോക്‌സഭാ തെരഞ്ഞെടുപ്പ് പ്രചരണം നടന്നുകൊണ്ടിരിക്കെ സിപിഎമ്മും കോണ്‍ഗ്രസും പൗരത്വഭേദഗതി വിഷയമുപയോഗിച്ചു ജനങ്ങളില്‍ തെറ്റിദ്ധാരണയുണ്ടാക്കുമെന്ന ആശങ്കയിലാണ് ബിജെപി നേതാവായ എപി അബ്ദുളളക്കുട്ടി പ്രതികരണവുമായി രംഗത്തിറങ്ങിയത്.