വ്യാജ ലൈസൻസുണ്ടാക്കി തോക്ക് കൈവശം വെച്ചു: മൂന്ന് കശ്മീർ സ്വദേശികൾക്കെതിരെ കണ്ണൂരിൽ കേസെടുത്തു

By Desk

Updated: Sunday, September 12, 2021, 23:32 [IST]

കണ്ണൂർ: എടിഎമ്മിൽ നിന്നും പണം നിറയ്ക്കാൻ പോകുന്ന വാഹനങ്ങളിലെ യാത്രക്കാരി നിന്നും തോക്കു കൾ പിടിച്ചെടുത്ത സംഭവത്തിൽ കാശ്മീരി സദേശികളായ മൂന്നുപേർക്കെതിരെ കണ്ണൂർ ടൗൺ പോലീസ് കേസെടുത്തു. കാശ്മീരിലെ രജൗരി ജില്ലക്കാരായ കല്യാൺ സിങ്, കശ്മീർ സിങ്, പ്രദീപ് സിങ് എന്നിവർക്കെതിരെയാണ് കേസെടുത്തത്. ഇവരിൽ നിന്നും പിടിച്ചെടുത്ത തോക്കുകൾക്ക് ലൈസൻസില്ലെന്ന് വിശദ പരിശോധനയിൽ വ്യക്തമായിട്ടുണ്ട്. എന്നാൽ തോക്കുകൾക്ക് ലൈസൻസുണ്ടെന്നു അവകാശപെട്ടുകൊണ്ട് ഹാജരാക്കിയ രേഖകളും വ്യാജമാണെന്ന് തെളിഞ്ഞിട്ടുണ്ട്.

സ്പെഷ്യൽ ബ്രാഞ്ച് നൽകിയ രഹസ്യ വിവരത്തെ തുടർന്നു നടത്തിയ റെയ്ഡിലാണ് ഇവരിൽ നിന്നും തോക്കുകൾ പോലീസ് പിടിച്ചെടുത്തത്. കണ്ണൂരിലെ എടിഎമ്മുകളിൽ പണം നിറയ്ക്കുന്നതിന് കരാറെടുത്ത കാശ്മീർ കേന്ദ്രീകരിച്ചുള്ള കമ്പിനിയാണ് സെക്യൂരിറ്റി ജീവനക്കാരെ നിയമിക്കുന്നത്. സാധാരണയായി ഇങ്ങനെ നിയോഗിക്കപ്പെടുന്നവരുടെ പൂർണ വിവരങ്ങളും ഇവരുടെ കൈവശമുള്ള ആയുധങ്ങളുടെ വിവരങ്ങളും എഡിഎമ്മിനെ അറിയിക്കാറുണ്ട്. എന്നാൽ കമ്പനി ഇതു ചെയ്തിട്ടില്ലെന്നാണ് പൊലിസ് അന്വേഷണത്തിൽ വ്യക്തമായത്. ഇവർ ഉപയോഗിച്ച തോക്കുകൾക്ക് ലൈസൻസില്ലാത്തതിനാലാണ് കണ്ണും ടൗൺ പോലീസ് കേസെടുത്തത്. പ്രതികളെ ഉടൻ പിടികൂടുമെന്ന് പോലീസ് സ്റ്റേഷൻ ഓഫീസർ ശ്രീജിത്ത് കൊടേരി അറിയിച്ചു.

കഴിഞ്ഞ ദിവസം സംസ്ഥാനത്താകമാനം വ്യാജ തോക്ക് കൈവശം വെച്ചതിന് 24 കാശ്മീരി ക ളെയാണ് പോലീസ് അറസ്റ്റു ചെയ്തത്. സുരക്ഷാ ജീവനക്കാരെ കൊണ്ടുവന്ന വിനോദ് കുമാർ എന്നയാളെയും പോലീസ് കസ്റ്റഡിയിലെടുത്തിട്ടുണ്ട്. കൊച്ചിയിലെ കളമശേരിയിലും തിരുവനന്തപുരം പേട്ടയിലും ഇതിനു സമാനമായ കേസുകൾ നിലവിലുണ്ട്. ഈ കേസിൽ ഉൾപ്പെട്ട സ്ഥാപനത്തിൻ്റെ ഹെഡ് ഓഫിസ് പ്രവർത്തിക്കുന്നത് കളമശേരിയിലാണ്. ഇവർസെക്യുരിറ്റി ജീവനക്കാരെ താമസിപ്പിച്ച വീട്ടിൽ നിന്നും ഏതാനും തോക്കുകളും നൂറോളം തിരകളും പൊലിസ് കസ്റ്റഡിയിലെടുത്തിട്ടുണ്ട്. ഇത്തരം ഏജൻസികൾക്കായി തോക്കുകൾ കൈമാറിയെന്ന സംശയത്തെ തുടർന്ന് കാശ്മീരിലെ ഒരു മുതിർന്ന ഐപിഎസ് ഉദ്യോഗസ്ഥൻ്റെ വീട്ടിൽ കേന്ദ്ര രഹസ്യാന്വേഷണ ഏജൻസി റെയ്ഡ് നടത്തിയിരുന്നു.