ഒന്നര വയസുകാരനെ കടൽഭിത്തിയിലെറിഞ്ഞ് കൊലപ്പെടുത്തിയ കേസ്: കുറ്റപത്രം പൊലിസ് കുറ്റപത്രം സമർപ്പിച്ചു
കണ്ണൂര്: കണ്ണൂർ സിറ്റി തയ്യിലിലെ ഒന്നര വയസ്സുകാരനെ കടല്ഭിത്തിയിലെറിഞ്ഞ് കൊലപ്പെടുത്തിയ കേസില് പോലീസ് കുറ്റപത്രം സമര്പ്പിച്ചു. കുഞ്ഞിന്റെ അമ്മ ശരണ്യ, കാമുകന് നിധിന് എന്നിവര്ക്കെതിരെയാണ് അന്വേഷണ സംഘം കണ്ണൂര് ജുഡീഷ്യല് ഫസ്റ്റ് ക്ലാസ് മജിസ്ട്രേറ്റ് കോടതിയില് കുറ്റപത്രം സമര്പ്പിച്ചത്. നാടിനെ നടുക്കിയ ഒന്നര വയസുകാരന്റെ കൊലപാതകത്തില് പരമാവധി തെളിവുകളെല്ലാം ശേഖരിച്ചാണ് പോലീസ് അന്വേഷണം പൂര്ത്തിയാക്കിയത്.
കൊലപാതകം നടന്ന് മൂന്നുമാസം ആകുമ്പോഴാണ് കേസില് പോലീസ് കുറ്റപത്രം നല്കുന്നത്. കഴിഞ്ഞ ഫെബ്രുവരി 17-ന് പുലര്ച്ചെ മൂന്നരയോടെയായിരുന്നു ഉറങ്ങിക്കിടന്ന കുഞ്ഞിനെ എടുത്ത് ശരണ്യ കടല്ക്കരയിലേക്ക് കൊണ്ടുപോയത്. രണ്ട് തവണ കടല്ഭിത്തിയിലേക്ക് വലിച്ചെറിഞ്ഞ് മരണം ഉറപ്പാക്കിയ ശേഷം തിരിച്ചുവന്ന് കിടന്നുറങ്ങുകയായിരുന്നു. ഭര്ത്താവിനെ കുടുക്കുന്ന തരത്തിലായിരുന്നു കസ്റ്റഡിയില് ശരണ്യയുടെ ആദ്യത്തെ മൊഴി.
ഇത് പോലീസ് സംഘത്തെ ഏറെ വലച്ചിരുന്നു. ശരണ്യയുടെ പങ്കിനെക്കുറിച്ച് സംശയം പ്രകടിപ്പിച്ച ചോദ്യങ്ങളില് നിന്നെല്ലാം ഒഴിഞ്ഞുമാറി. മൂന്നു മാസത്തിന് ശേഷം വീട്ടില് വന്ന് അന്ന് തങ്ങണമെന്ന് നിര്ബന്ധം പിടിച്ച് ഭര്ത്താവാണ് കൊല നടത്തിയതെന്നതായിരുന്നു ശരണ്യ പോലീസിന് മുന്നില് പറഞ്ഞ കഥ. ഭര്ത്താവിനൊപ്പം കിടത്തിയ ശേഷമാണ് കുഞ്ഞിനെ കാണാതായത് എന്നായിരുന്നു ശരണ്യയുടെ വാദം. എട്ട് മണിക്കൂറുകളിലധികം നീണ്ടുനിന്ന ചോദ്യം ചെയ്യലിലും ശരണ്യ കുറ്റം സമ്മതിക്കാന് തയ്യാറായിരുന്നില്ല.
അതേസമയം, ചോദ്യം ചെയ്യലിനിടെ 17 തവണ കാമുകന് നിധിന്റെ ഫോണ് കോള് വന്നത് കേസന്വേഷണത്തില് നിര്ണായക പങ്കു വഹിക്കുന്നതായിരുന്നു. കൂടുതല് സാഹചര്യ തെളിവുകള് നിരത്തിയതോടെ ശരണ്യക്ക് പിടിച്ചു നില്ക്കാനാകാതെ കുറ്റം സമ്മതിക്കുകയായിരുന്നു. തുടരന്വേഷണത്തില് ലഭിച്ച ശാസ്ത്രീയ തെളിവുകളും പോലീസ് കുറ്റപത്രത്തില് നിരത്തുന്നുണ്ട്. ശരണ്യയുടെ വസ്ത്രത്തില് ഉപ്പുവെള്ളത്തിന്റെ അംശമുണ്ടായിരുന്നെന്ന ഫോറന്സിക് പരിശോധന ഫലം, കുഞ്ഞിന്റെ പോസ്റ്റ്മോര്ട്ടത്തില് കണ്ടെത്തിയ ദഹിക്കാത്ത പാലിന്റെ അംശം, കടല്ഭിത്തിക്കരികില് നിന്ന് കിട്ടിയ ശരണ്യയുടെ ചെരിപ്പ്, ചോദ്യം ചെയ്യലിനിടെ തുടര്ച്ചായായുണ്ടായ കാമുകന്റെ ഫോണ് വിളികള്, കൃത്യത്തിന്റെ തലേ ദിവസം രണ്ടര മണിക്കൂറിലധികം കാമുകന് ശരണ്യയുമായി സംസാരിച്ചിരുന്നു.
ശരണ്യയുടെ പേരില് ലക്ഷങ്ങള് ലോണെടുക്കാന് നിധിൻ ശ്രമിച്ചിരുന്നു. ഇതിനായി ഇയാള് നല്കിയ തിരിച്ചറിയല് കാര്ഡ് ഉള്പ്പെടെയുള്ള രേഖകള് ശരണ്യയുടെ വീട്ടില് നിന്നും കണ്ടെത്തുകയും ചെയ്തിരുന്നു. ശരണ്യയുമൊത്തുള്ള സ്വകാര്യ ദൃശ്യങ്ങള് ഫോണില് പകര്ത്തിയിട്ടുണ്ടെന്നും ഇത് ഭര്ത്താവിനെ കാണിക്കുമെന്ന് നിതിന് ഭീഷണിപ്പെടുത്തിയിരുന്നതായും പോലീസ് കുറ്റപത്രത്തില് പറയുന്നു. എന്നാല് ഇയാള്ക്ക് കൊലപാതകത്തില് നേരിട്ട് പങ്കില്ലെന്നാണ് അന്വേഷണ സംഘത്തിന്റെ വിലയിരുത്തൽ.
Click it and Unblock the Notifications
Sign in with Google