കോൺഗ്രസിനെ വെട്ടിലാക്കി വെളിപ്പെടുത്തൽ: കണിച്ചാറിൽ സിപിഐ- കോൺഗ്രസ് ധാരണ

Updated: Sunday, December 20, 2020, 19:00 [IST]

കണ്ണൂർ: തദ്ദേശ തിരഞ്ഞെടുപ്പിലെ വിവാദങ്ങൾക്കിടെ കോൺഗ്രസിനെ പ്രതിക്കൂട്ടിലാക്കി കോൺഗ്രസ് പ്രവർത്തരുടെ വെളിപ്പെടുത്തൽ. കണിച്ചാർ പഞ്ചായത്തിൽ സിപിഎമ്മുമായി ധാരണയുണ്ടാക്കിയിരുന്നുവെന്ന് പരസ്യമായി സമ്മതിച്ച് ഒരു വിഭാഗം കോൺഗ്രസ് പ്രവർത്തകർ രംഗത്തെത്തിയിട്ടുള്ളത്. കണിച്ചാർ പഞ്ചായത്ത് കൈവിട്ടുപോയാൽ മാത്രമേ നേതൃത്വം വീഴ്ചകൾ തിരിച്ചറിയൂ. ഈ ബോധ്യത്തിലാണ് ഒന്നാം വാർഡിൽ സിപിഎമ്മുമായി ധാരണയിലെത്തിയാണ് സ്വതന്ത്ര സ്ഥാനാർത്ഥിയെ വിജയിപ്പിച്ചതെന്നും കേളകത്ത് വാർത്താ സമ്മേളനത്തിൽ പറഞ്ഞു. കോൺഗ്രസ് നേതൃത്വത്തിനും ഗ്രൂപ്പ് വഴക്കുകൾക്കുമെതിരെ രൂക്ഷവിമർശനങ്ങളുയരുന്ന സാഹചര്യത്തിലാണ് പാർട്ടിയെ കൂടുതൽ പ്രതിരോധത്തിലാഴ്ത്തിക്കൊണ്ട് പാർട്ടി പ്രവർത്തകർ തന്നെ കോൺഗ്രസ്- സിപിഎം ബാന്ധവത്തെക്കുറിച്ച് വെളിപ്പെടുത്തുന്നത്.

കോൺഗ്രസ് നേതൃത്വത്തിന്റെ അഹങ്കാരമാണ് ചരിത്ര പരാജയത്തിലേക്ക് പാർട്ടിയെ നയിച്ചതെന്നും ഇവർ ആരോപിച്ചു. കണിച്ചാർ പഞ്ചായത്ത് ഒന്നാം വാർഡിലെ പ്രവർത്തകരാണ് നേതൃത്വത്തിന്റെ പ്രവർത്തനങ്ങളിലുടെ അതൃപ്തിമൂലം പ്രാദേശിക തലത്തിൽ സിപിഎമ്മുമായി ബാന്ധവമുണ്ടാക്കിയതായി വെളിപ്പെടുത്തിയിട്ടുള്ളത്. കേളകത്ത് വിളിച്ചുചേർത്ത വാർത്താ സമ്മേളനത്തിലായിരുന്നു പാർട്ടി നേതൃത്വത്തിനെതിരെ രൂക്ഷ വിമർശനമുന്നയിച്ച് രംഗത്തെത്തിയിട്ടുള്ളത്.

കാണിച്ചാർ പഞ്ചായത്ത് കൈവിട്ടുപോകുന്ന സാഹചര്യത്തിൽ മാത്രമേ നേതൃത്വം തെറ്റുകൾ തിരിച്ചറിയുകയുള്ളൂവെന്നും ഇവർ വ്യക്തമാക്കി. ഇക്കാരണം കൊണ്ടാണ് തദ്ദേശ തിരഞ്ഞെടുപ്പിൽ ഒന്നാം വാർഡിൽ സിപിഎമ്മുമായി ധാരണയുണ്ടാക്കി മത്സരിച്ചത്. കോൺഗ്രസ് ബ്ലോക്ക് പ്രസിഡന്റ് സണ്ണി മേച്ചേരിയുടെ അധികാരമോഹമാണ് പത്താം വാർഡിലുൾപ്പെടെ കോൺഗ്രസിന്റെ കനത്ത പരാജയത്തിന് കാരണം.

ഒന്നാം വാർഡിലെ സ്ഥാനാർത്ഥിയുടെ കാര്യത്തിലുണ്ടാക്കിയ ധാരണ പ്രകാരം എൽഡിഎഫിന് പിന്തുണ നൽകുമെന്നും മെമ്പർക്ക് പ്രവർത്തിക്കാൻ കഴിയാത്ത സാഹചര്യം ഉണ്ടായാൽ നിലപാടിൽ മാറ്റമുണ്ടാകുമെന്നും പാർട്ടി പ്രവർത്തകർ കൂട്ടിച്ചേർത്തു. ഒന്നാം വാർഡിലെ മാറ്റം നടപ്പിലാക്കിയില്ലെങ്കിൽ ഇത് നഷ്ടപ്പെടുമെന്ന് മാസങ്ങൾക്ക് മുമ്പ് തന്നെ പാർട്ടിയ്ക്ക് മുന്നറിയിപ്പ് നൽകുകയും ചെയ്തിരുന്നു. ഇക്കാര്യം കെപിസിസി നേതൃത്വത്തെയും അറിയിച്ചിരുന്നു. എന്നിട്ടും നടപടികൾ ഒന്നും തന്നെ സ്വീകരിച്ചില്ലെന്നും പാർട്ടി പ്രവർത്തകർ ചൂണ്ടിക്കാണിക്കുന്നു.