കണ്ണൂര് റെയില്വേ സ്റ്റേഷനു സമീപത്തെ തീപിടിത്തം ജനങ്ങളെ പരിഭ്രാന്തിയിലാക്കി
കണ്ണൂര് റെയില്വേ സ്റ്റേഷന് പരിസരത്ത് റെയില്വേ ട്രക്കിനടുത്തെ പുല്ക്കാടുകള്ക്ക് തീപിടിച്ചത് നഗരവാസികളെ പരിഭ്രാന്തി പരത്തി. താവക്കരയിലെ തീപിടിച്ച സ്ഥലത്തു നിന്നും തൊട്ടടുത്താണ് ഇന്ത്യന് ഓയില് കോര്പറേഷന്റെ പെട്രോളിയം സംഭരണശാല. ഇതിനു സമീപപ്രദേശത്തെ റെയില്വേ ട്രാക്കിന് സമീപത്താണ് തീപിടിച്ചത്. തീ നിയന്ത്രണവിധേയമായില്ലെങ്കില് വന്ദുരന്തം തന്നെ സംഭവിക്കുമായിരുന്നു.
ഇതാണ് നഗരവാസികളില് പരിഭ്രാന്തിയുണ്ടായത്. എന്നാല് സംഭവത്തിന്റെ ഗൗരവം കണക്കിലെടുത്ത് ഫയര്ഫോഴ്സ് പ്രതിസന്ധികളെ മറികടന്നു കൊണ്ടു അതിവേഗംതീയണയ്ക്കുകയായിരുന്നു. ഇതോടെയാണ് മണിക്കൂറുകള് കൊണ്ടു ആശങ്ക ഒഴിവായത്.
ഇന്നലെ ഉച്ചയ്ക്ക് പന്ത്രണ്ടരയോടെയാണ് താവക്കര കണ്ണൂര് യൂനിവേഴ്സിറ്റി ഭാഗത്തെ ട്രാക്കിനരികിലെ പുല്ക്കാടുകള്ക്ക് തീപ്പിടിച്ചത്.ഇതേ തുടര്ന്ന് കിഴക്ക് വശത്തെ ട്രാക്കിലൂടെ കടന്ന് പോവേണ്ട ട്രെയിനുകള് മുക്കാല്മണിക്കൂറുകളോളം നിര്ത്തിയിട്ടു.
കണ്ണൂരില് നിന്നെത്തിയ ഫയര് ആന്റ് റസ്ക്യൂ ടീം മൂന്നു മണിക്കൂര് ശ്രമിച്ചാണ് തീയണച്ചത്. റെയില്വേ ട്രാക്കിനു സമീപത്തുള്ള ചിലമരങ്ങള് പൂര്ണമായും കത്തിനശിച്ചു. ഫയര് ആന്ഡ് റസ്ക്യൂ ടീമിന്റെ വലിയ വാഹനത്തിന് അപകടം നടന്ന ഭാഗത്തേക്ക് പോവാന് കഴിയാതിരുന്നത് തീയണക്കാന് തടസം നേരിട്ടു.
തുടര്ന്ന് താവക്കരയിലെ കണ്ണൂര്സര്വകലാശാല ആസ്ഥാനത്തെ കുളത്തില് നിന്ന് അഗ്നിശമന സേനയുടെ ഹോസിലൂടെ വെള്ളം ചീറ്റിയാണ് തീയണച്ചത്.
ട്രാക്കിനു സമീപത്തെ പഴയ കെട്ടിടാവശിഷ്ടങ്ങളുടെ ഇടയിലെ മരപ്പലകള്ക്കും തീപ്പിടിച്ചത് അണയ്ക്കാന് ഏറെ സമയമെടുക്കേണ്ടി വന്നു. കടുത്ത വേനലായതിനാല് ഉണങ്ങി നില്ക്കുന്ന മരവും പുല്ക്കാടുകള്ക്കും പിടിച്ച തീ ആളിപ്പടരുകയായിരുന്നു. ഈ ഭാഗങ്ങളില് തമ്പടിക്കുന്ന നാടോടികള് ഈ ഭാഗത്ത് പാഴ് വസ്തുക്കള്ക്ക് തീയിടാറുണ്ട്. ഇതുകാരണമാവാം തീപിടിച്ചതെന്ന നിഗമനത്തിലാണ് ഫയര്ഫോഴ്സ്.
കണ്ണൂര് അസി. സ്റ്റേഷന് മാസ്റ്റര് ഇ. ഉണ്ണികൃഷ്ണന്റെ നേതൃത്വത്തിലുള്ള സംഘമാണ് തീയണച്ചത്.
Click it and Unblock the Notifications
Sign in with Google