പള്ളൂരില്‍ വീട്ടില്‍ കയറി കവര്‍ച്ച, ഉറങ്ങി കിടന്ന വീട്ടമ്മയുടെ കഴുത്തില്‍ നിന്നും മാല നഷ്ടപ്പെട്ടു

Updated: Thursday, May 23, 2024, 7:29 [IST]

തലശേരി: മാഹി മേഖലയില്‍ വീണ്ടും മോഷ്ടാക്കളുടെ വിളയാട്ടം. പള്ളൂര്‍ പൊലിസ് സ്റ്റേഷന്‍ പരിധിയില്‍ ഉറങ്ങിക്കിടന്ന വീട്ടമ്മയുടെ സ്വര്‍ണ്ണ മാല കവര്‍ന്നു മോഷ്ടാക്കള്‍ രക്ഷപ്പെട്ടു.പള്ളൂര്‍ കൊയ്യോട്ടു തെരു ഗണപതി ക്ഷേത്രത്തിന് സമീപം പാച്ചക്കണ്ടിയിലെ പവിത്രന്റെ വീട്ടിലാണ് ചൊവ്വാഴ്ച്ചപുലര്‍ച്ചെ നാലരയോടെ മോഷണം നടന്നത്. കവര്‍ച്ചയ്ക്ക് ശേഷം സമീപത്തെ വീട്ടിലെ ബൈക്കുമായാണ് കളന്മാര്‍ രക്ഷപ്പെട്ടത്.

പ്രദേശത്തെ മറ്റ് മൂന്ന് വീടുകളിലും മോഷണ ശ്രമം ഉണ്ടായെന്ന് പള്ളൂര്‍ പൊലീസ് പറഞ്ഞു.ചൊവ്വാഴ്ച പുലര്‍ച്ചെയാണ് പള്ളൂര്‍ മേഖലയില്‍ വ്യാപക മോഷണം നടന്നത്. വീടിന് പിന്‍ഭാഗത്തെ വരാന്തയിലെ പൂട്ട് പൊളിച്ച് അകത്ത് കയറിയ കള്ളന്മാര്‍ അടുക്കള വാതിവും തകര്‍ത്താണ് വീടിനുള്ളിലേക്ക് കയറിയത്.

പിന്നാലെ മുറിക്കുള്ളില്‍ ഉറങ്ങിക്കിടന്ന പവിത്രന്റെ ഭാര്യ ബിന്ദുവിന്റെ കഴുത്തിലെ മാല പൊട്ടിച്ച് പ്രതികള്‍ ഇറങ്ങി ഓടുകയായിരുന്നു. ബിന്ദുവിന്റെ ഒന്നര പവന്റെ താലിമാലയാണ് മോഷണം പോയത്. പിടിവലിയില്‍ ബിന്ദുവിന് കഴുത്തിന് മുറിവേറ്റിട്ടുണ്ട്. ഇവര്‍ മാഹി ജനറല്‍ ആശുപത്രിയില്‍ ചികിത്സ തേടി.

മോഷണത്തിന് ശേഷം രക്ഷപ്പെടാനായി മുന്‍ വശത്തെ വാതിലും മോഷ്ടാക്കള്‍ തുറന്നു വച്ചിരുന്നു. പവിതന്റെ വീട്ടില്‍ നിന്നും മോഷ്ടാക്കളെത്തിയത് ഗുരുസി പറമ്പത്ത് ഗീതാഞ്ജലിയിലെ സതീശന്റെ വീട്ടില്‍. അവിടെ നിന്നും സതീശന്റെ ബൈക്കുമെടുത്ത് കവര്‍ച്ചക്കാര്‍ കളയുകയായിരുന്നു. സമീപത്തെ മറ്റ് രണ്ട് വീടുകളിലും മോഷണം നടന്നിട്ടുണ്ട്. പ്രദേശത്തെ ആളില്ലാത്ത വീട്ടിലും കയറാന്‍ കവര്‍ച്ചക്കാര്‍ ശ്രമിച്ചിരുന്നു.

സംഭവത്തില്‍ വീട്ടുടമയുടെ പരാതിയില്‍ പള്ളൂര്‍ പൊലിസ് കേസെടുത്ത് അന്വേഷണമാരംഭിച്ചിട്ടുണ്ട്. മോഷണം നടന്ന വീട്ടില്‍ ഫോറന്‍സിക് വിഭാഗവും ഡോഗ് സ്‌ക്വാഡും പരിശോധന നടത്തി. പ്രദേശത്തെ സി.സി.ടി.വി. ക്യാമറകള്‍ പരിശോധിച്ചു വരികയാണെന്ന് പള്ളൂര്‍ പൊലിസ് അറിയിച്ചു. കവര്‍ച്ചയ്ക്കു പിന്നില്‍ അന്തര്‍ സംസ്ഥാന പ്രൊഫഷനല്‍ സംഘമാണോയെന്ന് പൊലിസ് സംശയിക്കുന്നുണ്ട്. കഴിഞ്ഞ ദിവസം പയ്യന്നൂരിലെ പെരുമ്പയിലും വീട്ടില്‍ കയറി 75 പവനും പണവും മോഷ്ടാക്കള്‍ കവര്‍ന്നിരുന്നു.