ആറളം ഫാമില് നിന്നും വിട്ടുപോകാതെ കടുവ; വനംവകുപ്പ് തെരച്ചില് പുനരാരംഭിച്ചു
ഇരിട്ടി: ഉളിക്കലിലെ ജനവാസ കേന്ദ്രത്തില് ഭീതിപടര്ത്തിയ കടുവ ആറളം ഫാം ബ്ളോക്കില് നിന്നും വിട്ടുപോയില്ലെന്ന് വനംവകുപ്പ് അധികൃതര്. ഇതോടെ വനംവകുപ്പ് നിര്ത്തിവെച്ച തെരച്ചില് വീണ്ടും തുടങ്ങിയിട്ടുണ്ട്. ആറളം ഫാമിലെ ഒന്നാം ബ്ളോക്കിലാണ് കടുവയെ കണ്ടെത്തിയത്.
കാട് കയറിയ കൃഷിയിടത്തുകൂടി കടുവ നീങ്ങുന്നത് ചെത്തുതൊഴിലാളിയാണ് കാണുന്നത്. ഫാമിലെ ചെത്തുതൊഴിലാളിയായ അനൂപ് ഗോപാലനാണ് കടുവയെ കണ്ടയുടന് തന്റെ മൊബൈല് ഫോണിലൂടെ ചിത്രം പകര്ത്തിയത്. കടുവയുടെ വീഡിയോ ദൃശ്യവും ലഭിച്ചിട്ടുണ്ട്. ഇതോടെയാണ് ആറളം ഫാമില് കടുവ തങ്ങുകയാണെന്ന വിവരം വനംവകുപ്പ് സ്ഥിരീകരിക്കുന്നത്.
ആറളം ഫാമില് കടുവയെ കണ്ടെത്തിയതോടെ മേഖലയില് വനംവകുപ്പും പഞ്ചായത്തും അതീവ ജാഗ്രത പ്രഖ്യാപിച്ചിട്ടുണ്ട്. ആറളംഫാമിലെ ജനവാസമേഖലയില് ആഴിപൂജ ഉള്പ്പെടെ വിവിധ പരിപാടികള് നടക്കുന്നുണ്ട്. ഇവിടങ്ങളില് വനംവകുപ്പിന്റെയും പോലീസിന്റെയും സുരക്ഷാസംവിധാനം ഏര്പ്പെടുത്തി.
വനംവകുപ്പ് കൊട്ടിയൂര് റെയ്ഞ്ചര് സുധീര് നെരോത്ത്, ഡെപ്യൂട്ടി റെയ്ഞ്ചര്മാരായ കെ. ജിജില്, ശശികുമാര് ചെങ്ങളവീട്ടില് എന്നിവര് പ്രദേശത്ത് ക്യാംപ് ചെയ്യുന്നുണ്ട്. കഴിഞ്ഞ ദിവസം പാലപ്പുഴ-കീഴ്പ്പള്ളി റോഡില്നിന്ന് 700 മീറ്റര് അകലെയിലൂടെ പൊന്തക്കാടുകള്ക്കിടയിലൂടെ നടന്നുനീങ്ങുകയായിരുന്നു. മുണ്ടയാംപറമ്പില്നിന്ന് വനപാലകര് കടുവയെ മുഖാമുഖം കണ്ടെങ്കിലും ദൃശ്യങ്ങളൊന്നും പകര്ത്താന് കഴിഞ്ഞിരുന്നില്ല.
ആറളം ഫാമില് നിന്നു ഏതാണ്ടു അഞ്ച് കിലോ മീറ്റര് അകലെയാണ് കര്ണാടകവനം സ്ഥിതി ചെയ്യുന്നത്. വന്യജീവി സങ്കേതത്തിലേക്ക് കടുവ പോവുമെന്നു വനംവകുപ്പ് കരുതുന്നുണ്ടെങ്കിലും കടുവ ആറളം ഫാമില് തന്നെ തുടരുന്നത് ഫാമിലെ പ്രവര്ത്തനങ്ങളെ താറുമാറാക്കിയിട്ടുണ്ട്. ഫാമില് കഴിയുന്ന ആദിവാസി കുടുംബങ്ങളും കടുവാഭീഷണിയിലാണ്. ആറളം ഫാമിലെ ജനജീവിതം താറുമാറിയിട്ടുണ്ട്.
സ്കൂളുകളിലേക്ക് കുട്ടികളെ വിടാന് രക്ഷിതാക്കള്ക്ക് കഴിയുന്നില്ല.ഇപ്പോഴും കാട്ടാന ഭീഷണി നേരിടുന്ന പ്രദേശങ്ങളിലൊന്നാണ് ആറളം പുനരധിവാസ ബ്ളോക്ക്. ഇവിടേക്കു തന്നെ കടുവയുമെത്തിയത് ജനജീവിതത്തെ ഭയപ്പെടുത്തുന്നുണ്ട്.
Click it and Unblock the Notifications
Sign in with Google