ശൈലജക്കെതിരായ ദുഷ്പ്രചരണം; പിന്നില്‍ ഈ മൂവര്‍സംഘമെന്ന് വികെ സനോജ്

Updated: Thursday, April 18, 2024, 0:35 [IST]

കണ്ണൂര്‍: വടകര പാര്‍ലമെന്റ് മണ്ഡലം എല്‍ഡിഎഫ് സ്ഥാനാര്‍ത്ഥി കെകെ ശൈലജയ്ക്കെതിരെ നടത്തുന്ന സോഷ്യല്‍ മീഡിയ പ്രചരണത്തിനെതിരെ ഡിവൈഎഫ്‌ഐ. ശൈലജക്കെതിരെ യൂത്ത് കോണ്‍ഗ്രസ് സോഷ്യല്‍ മീഡിയയിലൂടെ നികൃഷ്ടമായ പ്രചാരണം നടത്തുന്നുവെന്ന് ഡിവൈഎഫ്‌ഐ സംസ്ഥാന സെക്രട്ടറി വികെ സനോജ് പറഞ്ഞു. കണ്ണൂര്‍ യൂത്ത് സെന്ററില്‍ വാര്‍ത്താസമ്മേളനത്തില്‍ സംസാരിക്കുകയായിരുന്നു അദ്ദേഹം.

അങ്ങേയറ്റം നീചമായ സൈബര്‍ ആക്രമണമാണ് നടക്കുന്നതെന്നും മുഖമില്ലാത്തവരല്ല പ്രചരണത്തിന് പിന്നിലെന്നും വികെ സനോജ് പറഞ്ഞു. ഉത്തരവാദിത്തപ്പെട്ട യൂത്ത് കോണ്‍ഗ്രസ് നേതാക്കളാണ് പ്രചാരണം നടത്തുന്നതെന്ന് വ്യക്തമായിട്ടുണ്ട്. വടകര പാര്‍ലമെന്റ് മണ്ഡലം യുഡിഎഫ് സ്ഥാനാര്‍ത്ഥി ഷാഫി പറമ്പില്‍, യൂത്ത് കോണ്‍ഗ്രസ് സംസ്ഥാന പ്രസിഡന്റ് രാഹുല്‍ മാങ്കൂട്ടത്തില്‍, പി.സരിന്‍ എന്നിവരാണ് ഇതിനു പിന്നില്‍ പ്രവര്‍ത്തിക്കുന്നതെന്നും സനോജ് ആരോപിച്ചു.

യൂത്ത് കോണ്‍ഗ്രസ് ജില്ലാ ജനറല്‍ സെക്രട്ടറിയായ ഷോബിന്‍ തോമസ് കേട്ടാല്‍ അറയ്ക്കുന്ന അസഭ്യം ശൈലജ ടീച്ചര്‍ക്കെതിരെ പോസ്റ്റ് ചെയ്തുവെന്നും ഇതിനു തെളിവുകള്‍ ഉണ്ടെന്നും സനോജ് പറഞ്ഞു. ആരും സോഷ്യല്‍ മീഡിയയില്‍ ഇത്തരം കമന്റുകള്‍ ചെയ്യാന്‍ പാടില്ല. ഉത്തരവാദിത്വപ്പെട്ട ഡിവൈഎഫ്‌ഐ പ്രവര്‍ത്തകര്‍ ആരും ഇത്തരത്തില്‍ പോസ്റ്റിട്ടില്ല. ഞങ്ങളാരും ഇത്തരം പ്രവൃത്തി ചെയ്യുന്നവര്‍ക്കായി ജാമ്യമെടുക്കാന്‍ പോയിട്ടില്ല.

കോട്ടയം കുഞ്ഞച്ചനെന്ന പേജില്‍ പോസ്റ്റിട്ട എബിനെ യൂത്ത് കോണ്‍ഗ്രസ് തളളിപറഞ്ഞില്ല. എന്തിനാണ് എബിനെ വീണ്ടും കോണ്‍ഗ്രസ് ജില്ലാ സെക്രട്ടറിയാക്കിയതെന്നും വികെ സനോജ് ചോദിച്ചു. യൂത്ത് കോണ്‍ഗ്രസ് നാഷനല്‍ കോര്‍ഡിനേറ്ററായ ഷോബിന്‍ തോമസാണ് മോര്‍ഫ് ചെയ്ത ചിത്രങ്ങളും എഡിറ്റ് ചെയ്ത വീഡിയോ കണ്ടന്റെും പ്രചരിപ്പിക്കുന്നയാള്‍. എന്തുകൊണ്ട് ഇയാളെ തള്ളിപറയാന്‍ യൂത്ത് കോണ്‍ഗ്രസ് തയ്യാറാകുന്നില്ലെന്ന് പറയണമെന്നും സനോജ് പറഞ്ഞു.

വ്യാജ തിരിച്ചറിയല്‍ കാര്‍ഡുണ്ടാക്കിയ രാഹുല്‍ മാങ്കൂട്ടത്തിനാണ് വടകരയിലെ സ്ഥാനാര്‍ത്ഥിയുടെ ഇലക്ഷന്‍ ചുമതല. യൂത്ത് കോണ്‍ഗ്രസിലെ കണ്ണൂരിലെ സുധാകര വിഭാഗം നേതാവായ ഫര്‍സീന്‍ മജീദ് തന്നെയാണ് തനിക്ക് കിട്ടേണ്ട വോട്ടുകിട്ടിയില്ലെന്ന് പരാതിപ്പെട്ടത്. നടന്‍ വിജയിയുടെയും രാഹുല്‍ ഗാന്ധിയുടെയുമൊക്കെ തിരിച്ചറിയല്‍ കാര്‍ഡുണ്ടാക്കിയവരാണ് യൂത്ത് കോണ്‍ഗ്രസ് നേതൃത്വമെന്നും വികെ സനോജ് ആരോപിച്ചു.

എത്രമാത്രം അധമമായ മാനസികാവസ്ഥയാണ് യൂത്ത് കോണ്‍ഗ്രസിന് തൊഴിലുറപ്പ് തൊഴിലാളികളെ ആക്ഷേപിച്ചത് മുദ്രാവാക്യങ്ങള്‍ വിളിച്ചത്. ഈ പ്രവര്‍ത്തനത്തിന് നേതൃത്വം നല്‍കുന്ന മൂവര്‍ സംഘത്തിനെ കേരളീയ സമൂഹം തിരിച്ചറിയേണ്ടതുണ്ട്. തൃക്കാക്കരയില്‍ എല്‍ഡിഎഫ് സ്ഥാനാര്‍ത്ഥിക്കെതിരെ അശ്ലീല വീഡിയോ പ്രചരിപ്പിച്ചപ്പോള്‍ ഇത്തരത്തില്‍ ഒരു വീഡിയോ കിട്ടിയാല്‍ ആരെങ്കിലും പ്രചരിപ്പിക്കാതിരിക്കുമോയെന്നു പറഞ്ഞയാളാണ് പ്രതിപക്ഷ നേതാവ് വിഡി സതീശന്‍.

അതുകൊണ്ട് സതീശനും സുധാകരനുമൊക്കെ ഇത്തരം സൈബര്‍ സംഘങ്ങളെ തിരുത്തുമെന്ന് വിശ്വസിക്കാന്‍ കഴിയില്ല. ശൈലജക്കെതിരെയുളള അപകീര്‍ത്തികരമായ പോസ്റ്റിട്ടതിന് പൊലിസ് നടപടിയെടുത്തിരിക്കുകയാണ്. പാനൂരിലെ ലീഗ് നേതാവിനെതിരെ കേസെടുത്തിരിക്കുകയാണ്. ശൈലജ ടീച്ചറെ തയ്യല്‍ ടീച്ചറെന്നൊക്കെയാണ് ഇവര്‍ വിശേഷിപ്പിക്കുന്നത്. ശൈലജ ടീച്ചര്‍ നമ്മുടെയൊക്കെ നാട്ടുകാരിയാണ്.

ശിവപുരം സ്‌കൂളിലെ സയന്‍സ് ടീച്ചറായിരുന്നു അവരെന്ന് എല്ലാവര്‍ക്കും അറിയാം. ഈ വരുന്ന ലോക്സഭാ തെരഞ്ഞെടുപ്പില്‍ പ്രധാന രാഷ്ട്രീയപ്രശ്നങ്ങള്‍ മാറ്റിവെച്ചു അങ്ങേയറ്റം നികൃഷ്ടമായ പ്രചരണങ്ങളാണ് വടകരയില്‍ ശൈലജ ടീച്ചര്‍ക്കെതിരെ നടത്തിക്കൊണ്ടുവരുന്നതെന്നും വികെ സനോജ് പറഞ്ഞു. നേതൃത്വം അറിയാതെയാണ് സോഷ്യല്‍മീഡിയയിലൂടെ അണികള്‍ ദുഷ്പ്രചരണം നടത്തുന്നതെന്ന് വിശ്വസിക്കാന്‍ കഴിയില്ല.

വ്യത്യസ്തകേന്ദ്രങ്ങളില്‍ നിന്നും പ്രവര്‍ത്തകര്‍ സോഷ്യല്‍ മീഡിയയിലൂടെ എല്‍ഡിഎഫ് സ്ഥാനാര്‍ത്ഥിക്കെതിരെ നടത്തുന്ന ദുഷ്പ്രചരണങ്ങള്‍ക്ക് പിന്നില്‍ നേതൃത്വത്തിലെ മൂവര്‍ സംഘം പ്രവര്‍ത്തിക്കുന്നുണ്ടെന്നും വികെ സനോജ് ആരോപിച്ചു.