കെ റെയിൽ സർവേ എന്തു സഹിച്ചും തടയുമെന്ന് ജനകീയ സമിതി കൺവെൻഷൻ

Updated: Monday, October 18, 2021, 10:53 [IST]

കണ്ണൂർ: പ്രകൃതിക്കും മനുഷ്യനും വിനാശകരമായ കെ.റെയിൽ - സിൽവർ ലൈൻ പദ്ധതിയെ എന്തുവന്നാലും നടപ്പിലാക്കാൻ അനുവദിക്കില്ലെന്ന് കണ്ണുരിൽ ചേർന്ന സമര പ്രഖ്യാപന കൺവെൻഷൻ തീരുമാനിച്ചു. കേരളത്തെ രണ്ടായി പിളർക്കുന്ന കെ.റെയിൽ പദ്ധതി നടപ്പിലാക്കുന്നതിനെതിരെ കെ.റെയിൽ -സിൽവർ ലൈൻ വിരുദ്ധ ജനകീയ ജനകീയ സമിതി കണ്ണുരിൽ സമര പ്രഖ്യാപന കൺവെൻഷൻ നടത്തി.
ജവഹർലൈബ്രറി ഓപ്പൺ ഓഡിറ്റോറിയത്തിൽ യു.ഡി.എഫ് ജില്ലാ ചെയർമാൻ പി.ടി മാത്യു ഉദ്ഘാടനം ചെയ്തു.

യാതൊരു പരിസ്ഥിതി ആഘാത പഠനവും നടത്താതെ സർക്കാർ നടപ്പിലാക്കുന്ന കെ.റെയിൽ -സിൽവർ ലൈൻ പദ്ധതി ലക്ഷങ്ങളെ കുടിയൊഴിപ്പിക്കുമെന്ന് പിടി മാത്യു പറഞ്ഞു. ഇതിനെതിരെ ഇരകൾ നടത്തുന്ന സമരത്തിന് യു.ഡി.എഫ് പിൻതുണ നൽകുമെന്നും മാത്യു പറഞ്ഞു. യാതൊരു ഡി.പി.ആറും പുറത്തിറക്കാതെ ജനങ്ങളെ ബോധവൽക്കരിക്കാതെ സർക്കാർ ധൃതി പിടിച്ചു പദ്ധതി നടപ്പിലാക്കാൻ ശ്രമിക്കുന്നത് സംശയാസ്പദമാണ്. തികച്ചും സേച്ഛാധിപത്യപരമായി സർക്കാർ നടപ്പിലാക്കുന്ന കെ റെയിൽ പദ്ധതി ജനങ്ങൾക്ക്വൻ സാമ്പത്തിക ബാധ്യത വരുത്തി വയ്ക്കുമെന്ന് മാത്യു ചൂണ്ടിക്കാട്ടി.

ജനങ്ങളെ പരിഗണിക്കാതെ വികസന പ്രവർത്തനങ്ങൾ നടത്തിയതിൻ്റെ ദുരന്തഫലമാണ് കേരളത്തിൽ ഇപ്പോഴുണ്ടായ വെള്ളപ്പൊക്കവും പ്രകൃതിദുരന്തങ്ങളുമെന്നു പരിപാടിയിൽ മുഖ്യ പ്രഭാഷണം നടത്തിയ കെ റെയിൽസിൽവർ ലൈൻ വിരുദ്ധ ജനകീയ സമിതി സംസ്ഥാന ജനറൽ കൺവീനർ എസ്.രാജീവൻ പറഞ്ഞു കേരളത്തെ രണ്ടായി വെട്ടിമുറിക്കുന്നതാണ് ഈ പദ്ധതി. അംഗീകാരമില്ലാത്ത ഒരു കൺസൾട്ടൻസിയെ കൊണ്ടാണ് സർക്കാർ പാരിസ്ഥിതാഘാത പഠനം നടത്തിയത്. ഇരുപതിനായിരം കുടുംബങ്ങളെ കുടിയൊഴിപ്പിച്ചു കൊണ്ടു കെ.റെയിൽ പദ്ധതി ആർക്കു വേണ്ടിയാണ് നടത്തുന്നതെന്ന് സർക്കാർ വ്യക്തമാക്കണമെന്നും രാജീവൻ ആവശ്യപ്പെട്ടു.ബംഗാളിൽ സി.പി.എം അധികാരത്തിലേറിയപ്പോൾ സിംഗുരിലും നന്ദിഗ്രാമിലും ഭൂമി കൃഷിക്കാരിൽ നിന്നു ഏറ്റെടുത്ത നടപടിയാണ് അവരെ ജനങ്ങളിൽ നിന്നും ഒറ്റപ്പെടുത്തിയത്.കഴിഞ്ഞ നിയമസഭാ തെരഞ്ഞെടുപ്പിൽ ഒരു സീറ്റു പോലും കിട്ടാത്ത പാർട്ടിയായി അവരെ മാറ്റിയത് ജനരോഷത്തെ തുടർന്നാണ്. ഇതേ സാഹചര്യമാണ് കെ. റെയിൽ പദ്ധതിയുമായി മുൻപോട്ടു പോയാൽ സംഭവിക്കാൻ പോകുന്നതതെന്നും രാജീവൻ ചൂണ്ടിക്കാട്ടി.

പുതുപുത്തന്‍ ലുക്കില്‍ അമല പോള്‍; ചിത്രങ്ങള്‍ ഏറ്റെടുത്ത് സോഷ്യല്‍ മീഡിയ, വൈറല്‍ ചിത്രങ്ങള്‍