ധര്‍മ്മടത്തെ ആവേശത്തിലാഴ്ത്തി പിണറായിയുടെ റോഡ് ഷോ; പിന്തുണച്ച് താരനിരയുടെ സാന്നിദ്ധ്യവും

കണ്ണൂര്‍: നിയമസഭ തിരഞ്ഞെടുപ്പ് പരസ്യം പ്രചാരണം അവസാനിക്കുന്ന സാഹചര്യത്തില്‍ ധര്‍മ്മടത്തും തലശേരിയിലും റോഡ് ഷോ നടത്തി മുഖ്യമന്ത്രി പിണറായി വിജയന്‍. പ്രവര്‍ത്തകരെ ആവേശത്തിലാഴ്ത്തി തുറന്ന ജീപ്പിലായിരുന്നു പിണറായി വിജയന്റെ അവസാന മണിക്കൂറിലെ പ്രചരണം. ധര്‍മ്മടത്ത് പ്രകാശ് രാജ്, ഇന്ദ്രന്‍സ്, മധുപാല്‍, ഹരിശ്രി അശോകന്‍ എന്നീ താരങ്ങളാണ് മുഖ്യമന്ത്രിക്ക് പിന്തുണയുമായി അണി നിരന്നത്.

അതേസമയം, പരസ്യ പ്രചാരണം ഇന്ന് അവസാനിക്കുമെന്നതിനാല്‍ അതിവേഗം പരമാവധി വോട്ടുകള്‍ ഉറപ്പിക്കാനുള്ള ശ്രമത്തിലാണ് സ്ഥാനാര്‍ഥികള്‍. രാത്രി ഏഴ് മണി വരെ പരസ്യ പ്രചാരണം നടത്താന്‍ അനുമതി നല്‍കിയിട്ടുണ്ട്. കോവിഡ് വ്യാപനത്തിന്റെ പശ്ചാത്തലത്തില്‍ കൊട്ടിക്കലാശം വേണ്ടെന്നാണ് തിരഞ്ഞെടുപ്പ് കമ്മിഷന്റെ ഉത്തരവ്. ഇക്കാര്യം ഉറപ്പാക്കാന്‍ സംസ്ഥാന തിരഞ്ഞെടുപ്പ് കമ്മിഷന് കേന്ദ്ര തിരഞ്ഞെടുപ്പ് കമ്മിഷന്‍ നിര്‍ദേശം നല്‍കി.

ഒരു മാസത്തിലധികം നീണ്ടുനിന്ന പ്രചരണങ്ങള്‍ക്കാണ് ഇന്ന് അവസാനം കുറിക്കുന്നത്. ഇടത് - വലത് മുന്നണികള്‍ക്കൊപ്പം നിര്‍ണായക ശക്തിയായി മാറാനുള്ള ബിജെപിയുടെ ശ്രമങ്ങളും ഈ തിരഞ്ഞെടുപ്പ് കാലത്ത് പ്രകടമായിരുന്നു. ട്വന്റി ട്വന്റി, വി ഫോര്‍ കൊച്ചി എന്നീ ചെറു കൂട്ടായ്മകളും പ്രാദേശിക തലത്തില്‍ കളം നിറയുന്ന കാഴ്ചയും കണ്ടു.

വികസന നേട്ടങ്ങള്‍ ഊന്നിപിടിച്ചായിരുന്നു എല്‍ഡിഎഫ് പ്രചരണം. പെന്‍ഷന്‍ ഉള്‍പ്പടെയുള്ള ജനക്ഷേമ നടപടികളും സ്‌കൂളുകളുടെയും ആരോഗ്യ കേന്ദ്രങ്ങളുടെയും വികസനവും വൈദ്യുതി വിതരണവുമെല്ലാം മുഖ്യ പ്രചരണ വിഷയമാക്കിയ ഇടത് മുന്നണി തുടര്‍ ഭരണം നേടുമെന്ന ശുഭ പ്രതീക്ഷയിലാണ്.

English summary

Pinarayi's road show excites Dharmadam; stardom came to support