കണ്ണൂർ ജില്ലാ പഞ്ചായത്തിന് ഇനി വനിതാ സാരഥി: പി.പി ദിവ്യ ചുമതലയേറ്റു
കണ്ണൂർ: പുതുവർഷത്തിൽ കണ്ണൂർ ജില്ലയെ ഇനി വനിതാ സാരഥി നയിക്കും. ജില്ലാ പഞ്ചായത്ത് പ്രസിഡന്റായി എൽഡിഎഫിലെ പി പി ദിവ്യയെ തെരഞ്ഞെടുത്തു. യുഡി എഫിലെ ലിസി ജോസഫിനെയാണ് പരാജയപ്പെടുത്തിയത്. ദിവ്യയ്ക്ക് ഇരുപത്തി മൂന്നിൽ 16 വോട്ട് ലഭിച്ചു. ലിസി ജോസഫിന് ഏഴ് വോട്ടാണ് കിട്ടിയത്.
കല്യാശേരി ഡിവിഷനിൽ നിന്ന് തെരഞ്ഞെടുക്കപ്പെട്ട ദിവ്യയുടെ പേര് പ്രസിഡന്റ് സ്ഥാനത്തേക്ക് നിർദേശിച്ചത് എൽ ഡി എഫിലെ വി കെ സുരേഷ് ബാബുവാണ്. എൽ ഡി എഫിലെ കോങ്കി രവീന്ദ്രൻ പിന്താങ്ങി. ലിസി ജോസഫിനെ യുഡിഎഫിലെതോമസ് വെക്കത്താനം നിർദേശിക്കുകയും എ കെ ആബിദ പിന്താങ്ങുകയും ചെയ്തു. വരണാധികാരി കലക്ടർ ടി വി സുഭാഷ് തെരഞ്ഞെടുപ്പ് നടപടി നിയന്ത്രിച്ചു. ജില്ലാ പഞ്ചായത്ത് സെക്രട്ടറി വി ചന്ദ്രൻ തെരഞ്ഞെടുപ്പ് ചട്ടങ്ങൾ വിശദീകരിച്ചു.
ജില്ലാ പഞ്ചായത്ത് കോൺഫറൻസ് ഹാളിൽ നടന്ന ചടങ്ങിൽ കലക്ടർ ടി.വി സുഭാഷ് ദിവ്യയ്ക്ക് സത്യപ്രതിജ്ഞ ചൊല്ലിക്കൊടുത്തു.കഴിഞ്ഞ ഭരണ സമിതിയിൽ വൈസ് പ്രസിഡൻ്റായിരുന്നു 36 വയസുകാരിയായ ദിവ്യ. നിലവിൽ സി പി. എം കണ്ണൂർജില്ലാ കമ്മിറ്റി അംഗം, ഡിവൈഎഫ്ഐ കേന്ദ്രകമ്മിറ്റി അംഗം, ജനാധിപത്യ മഹിളാ അസോസിയേഷൻ സംസ്ഥാന എക്സിക്യൂട്ടീവ് കമ്മിറ്റി അംഗം എന്നീ നിലകളിൽ പ്രവർത്തിച്ചു വരികയാണ്. ഇരിണാവ് സ്വദേശിയാണ്. കല്യാശേരി ഡിവിഷനിൽനിന്നാണ് ഇത്തവണ ജില്ലാ പഞ്ചായത്തിലേക്ക് വൻ ഭൂരിപക്ഷത്തോടെ തെരഞ്ഞെടുക്കപ്പെട്ടത്.
കണ്ണൂർ സർവകലാശാല യൂണിയൻ വൈസ് ചെയർമാനും സംസ്ഥാന വനിതാ ഫുട്ബോൾ ടീം അംഗവുമായിരുന്നു. കണ്ണൂർ ഗവ. മെഡിക്കൽ കോളേജ് ജീവനക്കാരനായ വി പി അജിത്താണ് ഭർത്താവ്. മകൾ: തേജസ്വിനി. വൈസ് പ്രസിഡൻ്റായി ഇ വിജയനെയും(71) തെരഞ്ഞെടുത്തു.
പന്ന്യന്നൂർ ഡിവിഷനിൽനിന്നാണ് ഇദ്ദേഹം തെരഞ്ഞെടുക്കപ്പെട്ടത്. സി.പി. എം പാനൂർ ഏരിയാ കമ്മിറ്റിയംഗവും സിഐടിയു ഏരിയാ സെക്രട്ടറിയുമാണ്. പന്ന്യന്നൂർ പഞ്ചായത്ത് പ്രസിഡന്റായിരുന്നു. കെഎസ്ടിഎ സംസ്ഥാന പ്രസിഡന്റ്, പന്ന്യന്നൂർ സഹകരണ ബാങ്ക് പ്രസിഡന്റ് എന്നീ നിലകളിൽ പ്രവർത്തിച്ചു. ചോതാവൂർ ഈസ്റ്റ് എൽപി സ്കൂൾ പ്രധാനാധ്യാപകനായിരുന്നു. താഴെ ചമ്പാട് സ്വദേശിയാണ്. പാനൂർ ഹൈസ്കൂൾ റിട്ട. അധ്യാപിക സൗമിനിയാണ് ഭാര്യ. മക്കൾ: മിനീഷ, ജയീഷ.
തിരഞ്ഞെടുക്കപ്പെട്ട പുതിയ ഭരണസമിതിയെ അനുമോദിക്കുന്നതിനായി മന്ത്രി രാമചന്ദ്രൻ കടന്നപ്പള്ളി, സിപിഎം ജില്ലാ സെക്രട്ടറി എം.വി ജയരാജൻ, കെ.പി സഹദേവൻ തുടങ്ങിയവരെത്തിയിരുന്നുപരിസ്ഥിതി സംരക്ഷണത്തിന് കേരളത്തിന് തന്നെ മാതൃകയാവുന്ന പ്രവർത്തനങ്ങൾ ജില്ലാ പഞ്ചായത്ത് നടപ്പിലാക്കുമെന്ന് പി.പി ദിവ്യ വാർത്താ സമ്മേളനത്തിൽ പറഞ്ഞു. പൊതുജനങ്ങൾ മുതൽ വയോജനങ്ങൾ വരെയുള്ളവർക്ക് സുരക്ഷയും ക്ഷേമവും ഉറപ്പുവരുത്തുന്ന പദ്ധതികൾ ആവിഷ്കരിക്കുമെന്നും അവർ കൂട്ടിച്ചേർത്തു. കരുതൽ കിട്ടാത്ത ആരും തന്നെ കണ്ണൂർ ജില്ലാ പഞ്ചായത്തിൽ ഉണ്ടാവില്ല
കഴിഞ്ഞ അഞ്ചു വർഷത്തെ ഭരണത്തിൽ ജില്ലാ പഞ്ചായത്ത് നേടിയത് സ്വരാജ് ട്രോഫി ആണെങ്കിൽ ഈ അഞ്ചു വർഷം കൊണ്ട് ദേശീയ അവാർഡ് തന്നെ സ്വന്തമാക്കും. ജനങ്ങൾ ഏൽപ്പിച്ച ഉത്തരവാദിത്വം നന്നായി നടപ്പിലാക്കും. എല്ലാ പഞ്ചായത്തുകളിലും കായികക്ഷമത ഉറപ്പുവരുത്തുന്നതിനു വേണ്ടി സ്പോർട്സ് കൗൺസിൽ ഹാളുകൾ ആരംഭിക്കും. കായിക മേഖലയെ വളർത്തിയെടുക്കുന്നതിന് ജില്ലാ പഞ്ചായത്ത് പ്രത്യേക പദ്ധതികൾ ആവിഷ്ക്കരിക്കും ടൂറിസം രംഗത്തും വലിയ മാറ്റം ജില്ലയിൽ കൊണ്ടുവരുമെന്നും ദിവ്യ പറഞ്ഞു.
സത്യപ്രതിജ്ഞാ വേളയിൽ പി പി ദിവ്യയുടെ മാതാപിതാക്കളും ഭർത്താവ് അജിത്തും മകൾ തേജസ്വിനിയും പങ്കെടുത്തു. ചടങ്ങിനോടനുബന്ധിച്ച് എൽഡിഎഫ് പ്രവർത്തകർ പുതുവത്സരാഘോഷ കേക്കുമുറിച്ച് മധുരം വിളമ്പി കൊവിഡ് നിയന്ത്രണങ്ങളോടെയാണ് സത്യപ്രതിജ്ഞാ ചടങ്ങ് നടന്നത്.
Click it and Unblock the Notifications
Sign in with Google