പുന്നോൽഹരിദാസ് വധം: നഗരസഭാ കൗൺസിലർ ലിജേഷ് ഉൾപ്പെടെ നാലു പേർ അറസ്റ്റിൽ

Updated: Wednesday, February 23, 2022, 10:43 [IST]

മാഹി::സിപിഎം പ്രവർത്തകനും മത്സ്യതൊഴിലാളിയുമായ ഹരിദാസനെ വീടിന് സമീപത്തും നിന്നും വെട്ടിക്കൊലപ്പെടുത്തിയ കേസിൽ നാല് പേർ അറസ്റ്റിൽ. ബി ജെ പി മണ്ഡലം പ്രസിഡൻ്റും തലശേരി നഗരസഭാ കൗൺസിലറുമായ ലിജേഷ്, വിമൽ, അമൽ മനോഹരൻ എന്നിവരാണ് അറസ്റ്റിലായത്.സംഭവത്തിൽ ഏഴു പേരെ പോലീസ് കസ്റ്റഡിയിൽ എടുത്തിരുന്നു.

രണ്ടു ബൈക്കുകളിലായി എത്തിയ അഞ്ചംഗസംഘമാണ് ആക്രമണം നടത്തിയതെന്നാണ് പോലീസിനു ലഭിച്ച പ്രാഥമിക വിവരം. പ്രദേശത്തെ സിസിടിവി ദൃശ്യങ്ങളടക്കം പരിശോധിച്ചുവരികയാണ്.അക്രമി സംഘത്തിലെ ഒരാൾക്ക് സംഭവത്തിനിടയിൽ പരിക്കേറ്റതായും റിപ്പോർട്ടുണ്ട്. കഴിഞ്ഞയാഴ്ച ഉത്സവത്തിനിടെയുണ്ടായ സംഘർഷമാണ് കൊലപാതകത്തിൽ കലാശിച്ചതെന്നു കരുതുന്നു.

തലശേരി നഗരസഭാ കൗൺസിലർ ലിജേഷ് പുന്നോലിൽ കഴിഞ്ഞ ഏഴാം തീയ്യതി നടന്ന ബി.ജെ.പി പ്രതിഷേധ'പൊതുയോഗത്തിനിടെ പ്രകോപനപരമായ പ്രസംഗം നടത്തിയെന്ന സി.പി.എം പരാതിയിൽ പൊലിസ് അന്വേഷണം നടത്തിയിരുന്നു.സോഷ്യൽ മീഡിയയിൽ പ്രചരിച്ച വീഡിയോ ദൃശ്യങ്ങളാണ് പൊലിസ് പരിശോധിച്ചത്.ഇതിനെ തുടർന്നാണ് ലിജേഷിനെ അറസ്റ്റു ചെയ്തത്.' അക്രമം നടന്ന ന്യൂ മാഹി പൊലിസ് സ്റ്റേഷൻ പരിധിയിലെ പുന്നോലിൽ ബോംബ്, ഡോഗ് സ്ക്വാഡുകൾ ആയുധങ്ങൾക്കായി പരിശോധന നടത്തി വരികയാണ്.

എന്നാൽ അക്രമത്തിന് പിന്നിൽ രാഷ്ട്രീയ വൈരാഗ്യമാണെന്ന് ഇനിയും പൊലിസ് വ്യക്തമാക്കിയിട്ടില്ല. കൊലപാതകത്തിൻ്റെ എല്ലാ വശങ്ങളും പരിശോധിച്ചു വരികയാണെന്നാണ് സിറ്റി പൊലിസ് കമ്മിഷണർ ആർ.ഇളങ്ക വ്യക്തമാക്കിയത്.കേസിൽ കുടുതൽ അന്വേഷണം നടത്തി വരികയാണെന്നാണ് പൊലിസ് നിലപാട്.