കൊട്ടിയൂരിൽ വൻ സ്ഫോടക വസ്തുശേഖരം കണ്ടെത്തിയ സംഭവം; വയോധികൻ അറസ്റ്റിൽ
ഇരിട്ടി: കണ്ണൂർ ജില്ലയുടെ മലയോര പ്രദേശമായ കൊട്ടിയൂരിൽ സ്ഫോടക വസ്തു ശേഖരം പിടികൂടിയ സംഭവത്തിൽ ഒരാൾ അറസ്റ്റിൽ. കൊട്ടിയൂർ പന്നിയാംമല സ്വദേശി വിശ്വനാണ് അറസ്റ്റിലായത്. വീട്ടിൽ സൂക്ഷിച്ച 20 കിലോ സ്ഫോടക വസ്തുക്കളാണ് പിടിച്ചെടുത്തത്. ഇതു പടക്ക നിർമാണത്തിന് കൊണ്ടുവന്നതെന്നാണ് മൊഴി. തൈപ്പറമ്പിൽ വിശ്വന്റെ വീട്ടിലും പറമ്പിലുമായാണ് സ്ഫോടക വസ്തുക്കള് സൂക്ഷിച്ചിരുന്നത്.
സ്ഫോടക വസ്തുക്കള് കണ്ടെത്തിയ സംഭവത്തില് കേളകം പൊലീസ് കേസെടുക്കുകയായിരുന്നു. പന്നിയാംമലയിലെ വീട്ടിലും പറമ്പിലുമായി സൂക്ഷിച്ചിരുന്ന സ്ഫോടക വസ്തു ശേഖരം കണ്ണൂർ ബോംബ് സ്ക്വാഡും ഡോഗ് സ്ക്വാഡും കേളകം പൊലീസും ചേര്ന്നാണ് പിടികൂടിയത്.
സൾഫർ, അലൂമിനിയം പൗഡർ, 70 പടക്കം, പടക്കമുണ്ടാക്കുന്നതിനുള്ള തിരികൾ, ഗുണ്ട്, കരിപ്പൊടി എന്നിവയാണ് കേളകം എസ്എച്ച്ഒ പ്രവീൺ കുമാർ, എസ്ഐ മിനിമോൾ എന്നിവരുടെ നേതൃത്വത്തിലുള്ള സംഘം കണ്ടെത്തിയത്. സ്ഫോടക വസ്തുക്കള് പിടികൂടിയതോട വിശ്വൻ ഒളിവില് പോവുകയായിരുന്നു. സ്ഫോടകവസ്തുക്കൾ കൈവശം വെച്ചതിന് വിശ്വനെതിരെ ഇതിന് മുൻപും കേസെടുത്തിട്ടുണ്ട്. പന്നിയാംമലയിലെ വീട്ടിൽ വിശ്വൻ ഒറ്റയ്ക്കാണ് താമസം.
കഴിഞ്ഞ ശനിയാഴ്ച്ച വൈകുന്നേരം പോലീസ് നടത്തിയ റെയ്ഡിലാണ് സ്ഫോടകവസ്തുക്കൾ കണ്ടെത്തിയത്. തിരഞ്ഞെടുപ്പിന് മുന്നോടിയായി മലയോര മേഖലയിലും ബോംബ് സ്ക്വാഡ് വ്യാപക പരിശോധന നടത്തി വരുന്നതിനിടെയാണ് മലയോര മേഖലയിൽ സ്ഫോടക വസ്തു ശേഖരം പിടികൂടിയത്. പാനൂർ സ്ഫോടനത്തിൻ്റെ പശ്ചാത്തലത്തിൽ കണ്ണൂർ ജില്ലയിൽ പൊലിസ് വ്യാപക പരിശോധന നടത്തിവരികയാണ് മലയോര മേഖലയിൽ പ്രവർത്തിക്കുന്ന ക്വാറികളിലും റെയ്ഡ് ശക്തമക്കിയിട്ടുണ്ട്
Click it and Unblock the Notifications
Sign in with Google