പിതൃസ്മരണയില് കണ്ണൂര് പയ്യാമ്പലത്ത് ബലിതര്പ്പണത്തിനെത്തിയത് ആയിരങ്ങള്
കണ്ണൂര്: പിതൃസ്മരണയില് കണ്ണൂര് പയ്യാമ്പലത്ത് കര്ക്കിക വാവ് ബലിതര്പ്പണത്തില് ആയിരങ്ങള് പങ്കെടുത്തു. മുന്വര്ഷങ്ങളില്ലാത്തതിനെക്കാള് വിശ്വാസികളുടെ തിരക്കാണ് ഇക്കുറി പയ്യാമ്പലത്തുണ്ടായത്. കണ്ണൂര് പയ്യാമ്പലത്ത് ബലിതര്പ്പണം നടത്തുന്നതിനായി ആയിരക്കണക്കിന് വിശ്വാസികളാണ് ഇക്കുറി എത്തിയത്. ബലിതര്പ്പണത്തിനെത്തിയവര്ക്ക് വിപുലമായ സൗകര്യങ്ങളാണ് ഒരുക്കിയത്.
ഒരേസമയം നൂറുകണക്കിനാളുകള്ക്ക് പിതൃതര്പ്പണം നടത്താനുളള സൗകര്യം ഇവിടെ ഒരുക്കിയിരുന്നു. കര്ക്കടക വാവ് ദിനത്തിലെ ബലി തര്പ്പണത്തിന് ജില്ലയിലെ പ്രധാനക്ഷേത്രങ്ങളിലെല്ലാം സൗകര്യമൊരുക്കിയിരുന്നു. തളാപ്പ് സുന്ദരേശ്വര ക്ഷേത്രത്തില് വിപുലമായ സജ്ജീകരണങ്ങളാണ് ഒരുക്കിയിരുന്നത്. മൂന്ന് ശാന്തിമാരും 25 പരികര്മികളും ബലി തര്പ്പണ ചടങ്ങുകള്ക്ക് കാര്മികത്വം വഹിച്ചു.
ഇതിന് പുറമെ തിലഹവനം, വിഷ്ണു പൂജ എന്നിവയും നടത്താനുള്ള സൗകര്യം ക്ഷേത്രത്തിലൊരുക്കിയിരുന്നു. കണ്ണൂര് മേലെ ചൊവ്വ ശിവക്ഷേത്രത്തിലും പിതൃതര്പ്പണത്തിനായി നൂറുകണക്കിനാളുകളെത്തി. ആദികടലായി ശ്രീകൃഷ്ണ ക്ഷേത്രത്തിന്റെ നേതൃത്വത്തില് തോട്ടട കടപ്പുറത്ത് ബലി തര്പ്പണത്തിനുള്ള സൗകര്യങ്ങള് ഒരുക്കി. രാവിലെ ആറരമുതല് പിതൃപുണ്യം തേടിയുളള ബലിതര്പ്പണം നൂറുകണക്കിനാളുകള് നടത്തി.
തലശ്ശേരി ജഗന്നാഥ ക്ഷേത്രത്തില് ബലി തര്പ്പണം നടന്നു. പുലര്ച്ചെ അഞ്ചുമണിക്കാണ് ഇവിടെ ചടങ്ങുകള് നടത്തിയത്. തലായി കടല്ത്തീരത്ത് തിങ്കളാഴ്ച പുലര്ച്ചെ ആറുമണിമുതല് 11 വരെ പിതൃതര്പ്പണം നടന്നു. തലായി ബാലഗോപാല സേവാ സംഘവും തൃക്കൈ ശിവക്ഷേത്ര സംരക്ഷണ സമിതിയുമാണ് പിതൃതര്പ്പണ സൗകര്യമൊരുക്കിയത്. തളിപ്പറമ്പ് തൃച്ചംബരം ശ്രീകൃഷ്ണ ക്ഷേത്രത്തില് വിപുലമായ ഒരുക്കങ്ങളാണ് ഏര്പ്പെടുത്തിയത്.
പിണ്ഡ കുളത്തില് പുലര്ച്ചെ നാല് മണി മുതല് തര്പ്പണം ആരംഭിച്ചു. പുലര്ച്ചെ 4.30-ന് പ്രസാദ വിതരണം തുടങ്ങി. ടോക്കണ് പ്രകാരമാണ് ഇവിടെ തര്പ്പണത്തിനെത്തിയവരെ നിയന്ത്രിച്ചത്. കൊവിഡ് പ്രതിസന്ധി വിട്ടു മാറിയതിനു ശേഷം ഇക്കുറി കണ്ണൂര് ജില്ലയില് സ്ത്രീകള് ഉള്പ്പെടെയുളള ആയിരങ്ങളാണ് പിതൃമോക്ഷത്തിനായി ബലിതര്പ്പണം നടത്തിയത്. തെളിഞ്ഞ കാലാവസ്ഥയും അനുകൂലമായി.
ഞായറാഴ്ച്ച രാത്രിയില് പലയിടങ്ങളിലും മഴപെയ്തിരുന്നുവെങ്കിലും തിങ്കളാഴ്ച്ച പുലര്ച്ചെ മുതല് തെളിഞ്ഞ കാലാവസ്ഥയാണ് അനുഭവപ്പെട്ടത്. കര്ക്കിടവാവിന് തന്നെ രാമായണ മാസാചരണം തുടങ്ങുന്നുവെന്ന പ്രത്യേകതയും ഇക്കുറി വിശ്വാസികളെ സംബന്ധിച്ചിട്ടുണ്ട്.
Click it and Unblock the Notifications
Sign in with Google