ആറളം ഫാമിനെ ഭീതിയിലാഴ്ത്തി വീണ്ടും കാട്ടാന കൂട്ടമിറങ്ങി, കാട്ടാന ചരിഞ്ഞ നിലയിൽ

Updated: Sunday, December 25, 2022, 23:08 [IST]

ആറളം:ആറളം ഫാമിൽ തമ്പടിച്ച കടുവയ്ക്കു പിന്നാലെ ആറളം ഫാമിനെ ഭീതിയിലാഴ്ത്തി വീണ്ടും കാട്ടാന കൂട്ടമിറങ്ങി. ഞായറാഴ്ച്ച രാവിലെ കാട്ടാനയിറങ്ങിയ ആറളം ഫാമിൽ ഒരു കാട്ടാനയെ കൂടി ചെരിഞ്ഞ നിലയിൽ കണ്ടെത്തി. ആറളം ഫാമിലെ പതിമൂന്നാം ബ്ലോക്കിലാണ് വീണ്ടും കാട്ടാനയെ ചെരിഞ്ഞ നിലയിൽ കണ്ടെത്തിയത്. ആളൊഴിഞ്ഞ വീട്ടിലെ മുറ്റത്താണ് കാട്ടാനയുടെ ജഡം കണ്ടെത്തിയത്. കാട്ടാന ശല്യം കാരണം പൊറുതിമുട്ടുന്ന പ്രദേശമായ പാലക്കുന്നിലാണ് കാട്ടാനയെ ചെരിഞ്ഞ നിലയിൽ കണ്ടെത്തിയത്.

വനം വകുപ്പ് അധികൃതരും പോലീസും സ്ഥലത്തെത്തി ഇൻക്വസ്റ്റ് നടത്തി. നിയമപ്രകാരമുള്ള നടപടിക്ക് ശേഷം ആനയെ അവിടെത്തന്നെ സംസ്കരിക്കുമെന്ന് വനം വകുപ്പ് അധികൃതർ അറിയിച്ചു. ആന ചെരിഞ്ഞ കാരണം അറിയുന്നതിനായി പോസ്റ്റുമോർട്ടം നടത്തുന്നുണ്ട്.
കഴിഞ്ഞ ദിവസവും ആറളം ഫാമിൻ മറ്റൊരു കാട്ടാന ഇവിടെ ചെരിഞ്ഞിരുന്നു എട്ടു വയസുള്ള ആനയാണ് അന്ന് ചെരിഞ്ഞത്.

ആറളം ഫാമിൽ തമ്പടിച്ചു നിൽക്കുന്ന കാട്ടാനകളിലൊന്നാണ് ചെരിഞ്ഞ തെന്നാണ് വനം വകുപ്പ് പറയുന്നത്. തുടർച്ചയായി കാട്ടാനകൾ ചെരിയുന്ന കാര്യത്തെ കുറിച്ചു അന്വേഷണമാരംഭിച്ചിട്ടുണ്ട്. ജനവാസ കേന്ദ്രങ്ങളിലും ഫാമിലെ കൃഷിയിടങ്ങളിലും കൂട്ടത്തോടെ എത്തുന്ന കാട്ടാനകളുടെ ശല്യം കാരണം പൊറുതിമുട്ടിയിരിക്കുകയാണ് ഫാം പുനരധിവാസ മേഖലയിൽ താമസിക്കുന്ന ആദിവാസി ഗോത്രവർഗ ജനവിഭാഗങ്ങളും ഫാം തൊഴിലാളികളും . കർണാടക വനത്തിലെ ഭക്ഷ്യക്ഷാമമാണ് കാട്ടാനകൾ നാട്ടിലിറങ്ങാൻ കാരണമെന്നാണ് കരുതുന്നത്. നിരവധി തവണ കാടു കയറ്റി വിട്ടിട്ടും മണിക്കൂറുകൾ കൊണ്ടു കാട്ടാനകൾ വീണ്ടും നാട്ടിലിറങ്ങുകയാണ്. ആറളം ഫാം വനാതിർത്തിയിൽ ആന മതിൽ നിർമ്മിക്കണമെന്ന ആവശ്യം ശക്തമായിട്ടും ഇതുവരെ നടപടിയൊന്നുമുണ്ടായിട്ടില്ല.

ഇതിനിടെ ആറളം ഫാമിൽ പശുവിനെ കൊന്ന കടുവ വീണ്ടും അപ്രത്യക്ഷമായി. ആറളം ഫാമിൽ പശുവിനെ കൊന്ന് അവശിഷ്ടങ്ങൾ ഉപേക്ഷിച്ചിടത്ത് ഒരിക്കൽക്കൂടി കടുവ എത്തുമെന്ന വനം വകുപ്പിന്റെ നിരീക്ഷണം പാഴായി. പിൻ ഭാഗം കഴിച്ച് ഉപേക്ഷിച്ച പശുവിന്റെ അവശിഷ്ടങ്ങൾ വീണ്ടും തിന്നാൻ കടുവ എത്തുമെന്ന പ്രതീക്ഷയിൽ സമീപത്ത് നിരീക്ഷണ ക്യാമറ സ്ഥാപിച്ചിരുന്നു. ശനിയാഴ്ച ക്യാമറയ്ക്ക് സമീപ പ്രദേശത്തൊന്നും കടുവയുടെ സാന്നിധ്യം ഉണ്ടായില്ല. പശുവിന്റെ അവശിഷ്ടങ്ങൾ പഴകി ദുർഗന്ധം വമിക്കുന്നതോടെ എത്താനുള്ള സാധ്യത കണക്കിലെടുത്ത് പ്രദേശത്ത് ജാഗ്രത തുടരുകയാണ്. കഴിഞ്ഞ രാത്രിയാണ് കടുവ ഫാം നാലാം ബ്ലോക്കിലെ കൃഷിയടത്തിൽ വെച്ച് പശുവിനെ കടിച്ചു കൊന്നത്. പശുവിന്റെ ചെറിയൊരു ഭാഗം മാത്രം ഭക്ഷിച്ച് കൃഷിയിടത്തിലെ കാട്ടിനുള്ളിലേക്ക് മറിഞ്ഞു.

കടുവയുടെ ഇര പിടിക്കൽ സ്വാഭാവം വെച്ച് അവിടെ വീണ്ടും എത്താനുള്ള സാധ്യത കണക്കിലെടുത്താണ് ക്യാമറ സ്ഥാപിച്ചത്. പശുവിന്റെ അവശിഷ്ടങ്ങൾ കണ്ട കൃഷിയിടത്തിൽ ട്രാക്റ്ററുകളും കാട് വെട്ട് യന്ത്രങ്ങളും ഉപയോഗിച്ച് വെള്ളിയാഴ്ച രാവിലെ 11 മണി വരെ കാട് വെട്ട് നടന്നിരുന്നു. ഇതിന്റെ ഒച്ചയും ബഹളവും കേട്ട് കടുവ വഴി മാറിപ്പോകുനുള്ള സാധ്യതയും വനം വകുപ്പ് അധികൃതർ പറയുന്നുണ്ട്. രണ്ട് മൂന്ന് ദിവസം കൂടി നിരീക്ഷണം തുടരാനാണ് തീരുമാനം. ഇതിനിടെ ആറളം ഫാമിൽ വീണ്ടും കടുവയുടെ സാന്നിധ്യം ഫാം തൊഴിലാളികളെയും പുനരധിവാസ കോളനിയിൽ താമസിക്കുന്നവരെയും കടുത്ത ആശങ്കയിലാക്കിയിട്ടുണ്ട്.