കാസർഗോഡ് ജില്ലയിൽ കനത്ത മഴ തുടരുന്നു; പുഴകൾ കരകവിഞ്ഞു..ജാഗ്രതാ നിർദ്ദേശം

കാസർഗോഡ്; ജില്ലയിൽ കനത്ത മഴ തുടരന്ന സാഹചര്യത്തിൽ അതീവ ജാഗ്രത മുന്നറിയിപ്പുമായി ജില്ലാ ഭരണകുടം. മൂന്ന് ദിവസമായി പെയ്യുന്ന മഴയിൽ പല താഴ്ന്ന പ്രദേശങ്ങളും വെള്ളത്തിനടിയിലാണ്. കനത്ത മഴയെ തുടർന്ന് തേജസ്വിനി, ചൈത്രവാഹിനി പുഴകൾ പലയിടത്തും കരകവിഞ്ഞു. ഇതോടെ അടിയന്തര സാഹചര്യത്തിൽ നടപടി സ്വീകരിക്കാനുള്ള ചുമതല താലൂക്ക് തഹസിൽദാർമാർക്ക് നൽകി സർക്കാർ ഉത്തരവായി. താലൂക്കുകളിൽ 24 മണിക്കൂർ പ്രവർത്തിക്കുന്ന കൺട്രോൾ റൂമുകളും തുറക്കും.

ഉദ്യോഗസ്ഥരുടെ ഭാഗത്ത് നിന്ന് കൃത്യമായ സേവനം ഉറപ്പാക്കണമെന്ന് കലക്ടർ നിർദ്ദേശിച്ചു.ഹോസ്ദുർഗ്, വെള്ളരിക്കുണ്ട് താലൂക്കുകളിലെ പ്രവർത്തന ചുമതല കാഞ്ഞങ്ങാട് സബ്കളക്ടർക്കാണ്.കാസർകോട്, മഞ്ചേശ്വരം താലൂക്കുകളിലെ പ്രവർത്തനങ്ങൾ കാസർ റവന്യൂ ഡിവിഷണൽ ഓഫീസറാണ് ഏകോപിപ്പിക്കുക.

മലയോര മേഖലകളിൽ മണ്ണിടിച്ചിൽ സാധ്യത ഉള്ളതിനാൽ ജാഗ്രത പാലിക്കണം. മഴ തുടരുന്ന സാഹതര്യത്തിൽ താലൂക്ക് പരിധിയിൽ പ്രവർത്തിക്കുന്ന ക്വാറികളുടെ പ്രവർത്തനം താൽക്കാലികമായി നിർത്തിവെക്കാൻ സർക്കാർ നിർദ്ദേശം നൽിയതായി ജില്ല ഭരണകൂടം അറിയിച്ചു.മഴ ശക്തമായതോടെ ജില്ലയിലെ പ്രൊഫഷണൽ കോളേജ് ഒഴികെയുള്ള മുഴുവൻ വിദ്യാഭ്യാസ സ്ഥാപനങ്ങൾക്കും കളക്ടർ ഇന്ന് അവധി പ്രഖ്യാപിച്ചിരുന്നു.

കേന്ദ്ര കാലാവസ്ഥ വകുപ്പിന്റെ മുന്നറിയിപ്പ് പ്രകാരം രണ്ട് ദിവസം കൂടി മഴ തുടരാനാണ് സാധ്യത. എല്ലാ ജലാശയങ്ങളിലും ജലനിരപ്പ് ഉയരുകയും കുത്തൊഴുക്ക് രൂപപ്പെടുകയും ചെയ്തിട്ടുണ്ട്. അതിനാൽ വിനോദത്തിനായും ഒഴുകി വരുന്ന വസ്തുക്കൾ ശേഖരിക്കുന്നതിനായും ജലാശയങ്ങളിൽ ഇറങ്ങുന്നത് കർശനമായി ഒഴിവാക്കേണ്ടതാണ്. ജീവനോപാധിക്കായി ജലാശയങ്ങളെ ആശ്രയിക്കുന്നവരും ആവശ്യമായ മുൻകരുതൽ സ്വീകരിക്കേണ്ടതാണെന്ന് ജില്ലാ കളക്ടർ അറിയിച്ചു.

English summary

Heavy rains continue in Kasaragod district; Rivers overflowed