ഉള്ളിച്ചാക്കിനിടയില്‍ വെച്ച് ഹാന്‍സ് കടത്ത്; രണ്ട് പേര്‍ പിടിയില്‍

കാസര്‍കോട്: കാസര്‍കോട് ജില്ലയില്‍ വന്‍ ലഹരി മരുന്ന് വേട്ട. നിരോധിത ലഹരി ഉത്പന്നങ്ങളായ ഹാന്‍സ് പൊലീസ് പിടിച്ചെടുത്തു. സംഭവത്തില്‍ രണ്ട് പേരെ അറസ്റ്റ് ചെയ്തിട്ടുണ്ട്.

ഉദയചന്ദ്രന്‍ (49), അബ്ദുള്‍ ലത്തീഫ് (57) എന്നിവരാണ് പിടിയിലായത്. പിടികൂടിയ ഹാന്‍സിന് 24 ലക്ഷം രൂപ വില വരും എന്നാണ് പൊലീസ് പറയുന്നത്. ഉള്ളി ചാക്കിന് ഇടയില്‍ വെച്ചാണ് ഹാന്‍സ് കടത്തിയത്. മംഗലാപുരത്ത് നിന്ന് മലപ്പുറത്തേക്കാണ് ഹാന്‍സ് കൊണ്ടുവന്നത്.

നേരത്തേയും മംഗലാപുരത്ത് നിന്ന് മലപ്പുറത്തേക്ക് കടത്താന്‍ ശ്രമിച്ച ഹാന്‍സ് പൊലീസ് പിടികൂടിയിരുന്നു. 2016 ല്‍ മംഗലാപുരത്ത് നിന്ന് മലപ്പുറത്തേക്ക് കടത്താന്‍ ശ്രമിച്ച 135 കിലോ പുകയില ഉത്പന്നങ്ങള്‍ പൊലീസ് പിടികൂടിയിരുന്നു.

7500 പാക്കറ്റുകളിലാക്കി മലപ്പുറം എടപ്പാളിലെ ചില്ലറ വില്‍പ്പന കേന്ദ്രത്തിലേക്ക് കൊണ്ടുവരികയായിരുന്നു ഇതെന്നായിരുന്നു അന്ന് പിടിയിലായ പ്രതികള്‍ പൊലീസിനോട് പറഞ്ഞത്.

കര്‍ണാടകയില്‍ നിന്ന് ഏറെക്കാലമായി വന്‍തോതില്‍ നിരോധിത പുകയിലെ ഉദ്പ്പന്നങ്ങള്‍ കാസര്‍ഗോഡ് വഴി കേരളത്തിലെ വിവിധ ജില്ലകളിലേക്ക് എത്തുന്നുണ്ട്.

മൊത്തക്കച്ചവടക്കാര്‍ക്കും ചില്ലറ വില്‍പ്പനക്കാര്‍ക്കും ഇടയില്‍ ഈ നിയമവിരുദ്ധ കച്ചവടത്തിന് ഇടനിലക്കാരുമുണ്ട് എന്നാണ് പൊലീസ് കരുതുന്നത്.

English summary

Kasaragod: The police seized the prohibited drug products from two people