തദ്ദേശ തിരഞ്ഞെടുപ്പ് ഒന്നാം ഘട്ടം LIVE: വോട്ടെടുപ്പ് അവസാനിച്ചു... ഭേദപ്പെട്ട പോളിംഗ്

സംസ്ഥാനത്ത് ഇന്ന് ഒന്നാം ഘട്ട വോട്ടെടുപ്പ അവസാനിച്ചു. തിരുവനന്തപുരം മുതല്‍ എറണാകുളം വരെയുള്ള ഏഴ് ജില്ലകള്‍ ആണ് ഇന്ന് വിധിയെഴുതിയത്. തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം എന്നിവിടങ്ങളില്‍ 36,630 സ്ഥാനാര്‍ത്ഥികളാണ് ജനവിധി തേടിത്. രാവിലെ 7 മണിക്കായിരുന്നു വോട്ടിംഗ് ആരംഭിച്ചത്. പലയിടത്തും ഭേദപ്പെട്ട പോളിംഗ രേഖപ്പെടുത്തി.

595 തദ്ദേശ സ്ഥാപനങ്ങളിലേക്കാണ് വോട്ടെടുപ്പ് നടന്നത്. അതില്‍ 3 കോര്‍പ്പറേഷനുകള്‍, 39 മുനിസിപ്പാലിറ്റികള്‍, 7 ജില്ലാ പഞ്ചായത്തുകള്‍, 75 ബ്ലോക്ക് പഞ്ചായത്തുകള്‍, 471 ഗ്രാമപഞ്ചായത്തുകള്‍ എന്നിവ ഉള്‍പ്പെടുന്നുണ്ട്. 11,168 വാര്‍ഡുകളിലേക്കാണ് ഇന്ന് വോട്ടെടുപ്പ് നടന്നത്. ഏഴ് ജില്ലകളില്‍ 15,432 പോളിങ് സ്റ്റേഷനുകള്‍ ഒരുക്കി.

വാശിയേറിയ തിരഞ്ഞെടുപ്പ് പ്രചാരണത്തിന് ഒടുവിലാണ് ഇന്നു വോട്ടെടുപ്പ് നടന്നത്. ശബരിമല സ്വര്‍ണക്കൊള്ളയും രാഹുല്‍ മാങ്കൂട്ടത്തില്‍ വിഷയവുമൊക്കെയാണ് ഇക്കുറി തിരഞ്ഞെടുപ്പില്‍ പ്രധാന ചര്‍ച്ചാവിഷയങ്ങളായത്. തിരുവനന്തപുരത്ത് ശക്തമായ ത്രികോണ മത്സരമാണ് നടക്കുന്നത്.

ശബരിമല സ്വര്‍ണക്കൊള്ള ഇക്കുറി വലിയ വിവാദമായതോടെ ശബരിമല സ്ഥിതി ചെയ്യുന്ന പത്തനംതിട്ട ജില്ലയിലെ ജനവിധി മൂന്നു മുന്നണിയും ആശങ്കയോടെയാണ് ഉറ്റുനോക്കുന്നത്. തിരുവനന്തപുരം, കൊല്ലം, കൊച്ചി കോര്‍പ്പറേഷനുകളിലുള്‍പ്പെടെ ഭരണത്തുടര്‍ച്ചയാണ് എല്‍ഡിഎഫ് ലക്ഷ്യമിടുന്നതെങ്കില്‍ നഷ്ടപ്പെട്ട ജനസമ്മതി തിരിച്ചുപിടിക്കാന്‍ കഴിയുമെന്നാണ് യുഡിഎഫിന്റെ പ്രതീക്ഷ. എല്ലാ വാര്‍ഡുകളിലും എന്‍ഡിഎ സ്ഥാനാര്‍ത്ഥികള്‍ മത്സരിക്കുന്ന ആദ്യ തിരഞ്ഞെടുപ്പാണിത്.