കുമരകത്ത് ഹൗസ് ബോട്ടുകള്‍ക്ക് പ്രീപെയ്ഡ് കൗണ്ടര്‍

കോട്ടയം: കേരളത്തില്‍ ഏറ്റവും അധികം വിനോദ സഞ്ചാരികള്‍ എത്തുന്ന സ്ഥലങ്ങളില്‍ ഒന്നാണ് കുമരകം. കായലിന്റെ മനോഹാരിതയും പാതിരാമണലിന്റെ ഭംഗിയും ഒക്കെ ആസ്വദിക്കാന്‍ വിനോദ സഞ്ചാരികള്‍ ഏറെ ഇഷ്ടപ്പെടുന്നത് ഹൗസ് ബോട്ട് യാത്രകളാണ്.

ഓട്ടോറിക്ഷകളേയും ടാക്‌സി കാറുകളേയും പോലെയാണ് ഇപ്പോള്‍ കുമരകത്തെ ഹൗസ് ബോട്ടുകള്‍. നാട്ടുകാരല്ലെന്ന് കണ്ടാല്‍ തോന്നുന്ന പൈസ വാങ്ങി പറ്റിക്കും. എതായാലും ഇനി ഇത്തരം പറ്റിക്കല്‍ പരിപാടികള്‍ കുമരകത്ത് നടത്തണ്ട എന്നാണ് അധികൃതരുടെ തീരുമാനം. ഹൗസ് ബോട്ടുകള്‍ക്കും പ്രീ പെയ്ഡ് കൗണ്ടര്‍ തുടങ്ങാനാണ് പരിപാടി.

ഹൗസ് ബോട്ടുകളുടെ നിലവാരം അനുസരിച്ച് വാടകയും മറ്റും നിശ്ചയിച്ച് വരുന്നതേ ഉള്ളൂ. കവനാറ്റിന്‍കരയില്‍ തുടങ്ങാനിരിക്കുന്ന കൗണ്ടറിന്റെ നടത്തിപ്പ് ചുമതല ടൂറിസം പോലീസിനായിരിക്കും. രജിസ്റ്റര്‍ ചെയ്യപ്പെട്ടിട്ടുള്ള ബോട്ടുകളുടെ ലൈസെന്‍സും മറ്റ് രേഖകളും തുറമുഖ വകുപ്പ് പരിശോധിച്ച് ഉറപ്പ് വരുത്തും.

മുന്‍കൂട്ടി ഹൗസ് ബോട്ട് ബുക്ക് ചെയ്യാതെ കുമരകത്തെന്നുന്ന സഞ്ചാരികളെ ഉദ്ദേശിച്ചാണ് പദ്ധതി. സാധാരണ ഗതിയില്‍ ഏജന്റുമാരും മറ്റും വന്‍ തുക ഇത്തരം വിനോദ സഞ്ചാരികളില്‍ നിന്ന് തട്ടിയെടുക്കാറുണ്ട്.

നവംബര്‍ 1 നായിരിക്കും ഹൗസ് ബോട്ട് പ്രീ പെയ്ഡ് കൗണ്ടര്‍ തുടങ്ങുക എന്നാണ് പ്രതീക്ഷിക്കുന്നത്. പ്രീമിയം, ഡീലക്‌സ് എന്നിങ്ങനെ രണ്ട് വിഭാഗങ്ങളിലായിരിക്കും ബോട്ടുകള്‍ ലഭ്യമാവുക.

English summary

Kumarakom will soon get a prepaid counter for houseboats.