കൊച്ചിയിൽ ട്രെയിനിൽ നിന്ന് കായലിലേക്ക് ചാടി യുവതിയുടെ ആത്മഹത്യാശ്രമം! തിരച്ചിൽ തുടരുന്നു...

യുവതിയെ കണ്ടെത്താനുള്ള തിരച്ചിൽ രാത്രി വൈകിയും തുടരുകയാണ്.

കൊച്ചി: എറണാകുളത്ത് ട്രെയിനിൽ നിന്ന് കായലിലേക്ക് എടുത്ത് ചാടി യുവതിയുടെ ആത്മഹത്യാ ശ്രമം. ആലപ്പുഴ തിരുവമ്പാടി മുല്ലാത്ത് വാർഡ് കടവത്തുശേരി വീട്ടിൽ ചാൾസ് ബേബിയുടെ ഭാര്യ റോസ് മേരി നീന(29)യാണ് കായലിലേക്ക് ചാടിയത്. ചൊവ്വാഴ്ച രാവിലെ എട്ടേമുക്കാലോടെയായിരുന്നു സംഭവം.

കൊല്ലം-എറണാകുളം പാസഞ്ചർ അരുർ-കുമ്പളം പാലത്തിൽ എത്തിയപ്പോഴാണ് റോസ് മേരി ട്രെയിനിൽ നിന്ന് കായലിലേക്ക് ചാടിയത്. കൈതപ്പുഴ കായലിലേക്ക് ചാടിയ യുവതി നിമിഷങ്ങൾക്കകം അപ്രത്യക്ഷമായെന്ന് ദൃക്സാക്ഷികൾ പറഞ്ഞു. യുവതിയെ കണ്ടെത്താനുള്ള തിരച്ചിൽ രാത്രി വൈകിയും തുടരുകയാണ്.

എറണാകുളത്തെ സ്വകാര്യ സ്ഥാപനത്തിൽ ഡാറ്റ എൻട്രി ഓപ്പറേറ്ററായി ജോലി ചെയ്യുന്ന റോസ് മേരി ആത്മഹത്യയ്ക്ക് ശ്രമിച്ചതാണെന്നാണ് പോലീസിന്റെ പ്രാഥമിക നിഗമനം. ട്രെയിനിൽ യാതൊരു ഭാവവ്യത്യാസവുമില്ലാതെ യാത്ര ചെയ്തിരുന്ന റോസ് മേരി ട്രെയിൻ പാലത്തിൽ എത്തിയപ്പോൾ ഓടിപ്പോയി കായലിലേക്ക് ചാടുകയായിരുന്നു എന്നാണ് സഹയാത്രികർ പറഞ്ഞത്. കോച്ചിലുണ്ടായിരുന്ന യാത്രക്കാർ പിന്നീട് ട്രെയിൻ അടുത്ത സ്റ്റേഷനിൽ എത്തിയപ്പോൾ ബന്ധപ്പെട്ടവരെ വിവരം അറിയിച്ചു. വിവരമറിഞ്ഞെത്തിയ കൊച്ചി പനങ്ങാട് പോലീസ്, കോസ്റ്റൽ പോലീസ്, അഗ്നിശമന സേന എന്നിവരുടെ നേതൃത്വത്തിലാണ് യുവതിക്കായുള്ള തിരച്ചിൽ തുടരുന്നത്.

English summary

a woman jumps off from a moving train in kochi.