തിരുവനന്തപുരം മൃഗശാലയിൽ സിംഹക്കൂട്ടിലേക്ക് ചാടി യുവാവിന്റെ അതിസാഹസം! ജീവൻ തിരിച്ചുകിട്ടിയത് ഭാഗ്യം..

പാലക്കാട് ഒറ്റപ്പാലം സ്വദേശി മുരുകനാണ് തിരുവനന്തപുരം മൃഗശാലയിലെ സിംഹക്കൂട്ടിലേക്ക് എടുത്തുചാടിയത്.

തിരുവനന്തപുരം: മൃഗശാലയിൽ സിംഹക്കൂട്ടിലേക്ക് എടുത്തുചാടിയ യുവാവിന് നിസാര പരിക്ക്. പാലക്കാട് ഒറ്റപ്പാലം സ്വദേശി മുരുകനാണ് തിരുവനന്തപുരം മൃഗശാലയിലെ സിംഹക്കൂട്ടിലേക്ക് എടുത്തുചാടിയത്. സിംഹക്കൂട്ടിലേക്ക് ഒരാൾ ചാടുന്നത് ശ്രദ്ധയിൽപ്പെട്ട സുരക്ഷാ ഉദ്യോഗസ്ഥർ ഉടൻതന്നെ സ്ഥലത്തെത്തി മുരുകനെ രക്ഷപ്പെടുത്തുകയായിരുന്നു.

രാവിലെ 11 മണിയോടെയാണ് മൃഗശാലയിൽ ഏവരെയും അമ്പരപ്പിച്ച സംഭവമുണ്ടായത്. സിംഹക്കൂട്ടിന് സമീപത്തെത്തിയ മുരുകൻ ആരും കാണാതെ കൂടിന്റെ പിറക് വശത്തുകൂടിയാണ് സിംഹങ്ങളുടെ അടുത്തേക്ക് ചാടിയത്. എന്നാൽ മുരുകൻ ചാടുന്നത് ഒരു സുരക്ഷാ ഉദ്യോഗസ്ഥന്റെ ശ്രദ്ധയിൽപ്പെട്ടു. തുടർന്ന് ഇദ്ദേഹവും മറ്റു സുരക്ഷാ ഉദ്യോഗസ്ഥരുമെത്തി മുരുകനെ ഉടൻതന്നെ കൂടിന് പുറത്തെത്തിച്ചു.

സംഭവസമയത്ത് രണ്ട് സിംഹങ്ങളാണ് കൂട്ടിലുണ്ടായിരുന്നത്. കൂട്ടിലേക്ക് ചാടിയപ്പോൾ സിംഹം ഇയാളുടെ അടുത്തുവരെ എത്തി. സിംഹം കൂടുതൽ അടുത്തേക്ക് നീങ്ങികൊണ്ടിരിക്കവെയാണ് സുരക്ഷാ ഉദ്യോഗസ്ഥർ മുരുകനെ രക്ഷപ്പെടുത്തിയത്. കൂട്ടിൽ നിന്നും പുറത്തെത്തിക്കുന്നതിനിടെയാണ് മുരുകന്റെ കാലിന് നിസാര പരിക്കേറ്റത്. തുടർന്ന് ഇയാളെ പോലീസെത്തി കസ്റ്റഡിയിലെടുത്തു. അതേസമയം, സംഭവസമയത്ത് ഇയാൾ മദ്യപിച്ചിരുന്നതായും സംശയമുണ്ട്. എന്നാൽ ഇക്കാര്യം സ്ഥിരീകരിച്ചിട്ടില്ല.

കൂടുതൽ വാർത്തകൾ വായിക്കൂ:

English summary

a youth jumps into lion's cage in trivandrum zoo.