മഅ്ദിനിയുടെ ആരോഗ്യനില വഷളായി; ആശുപത്രിയിൽ പ്രവേശിപ്പിച്ചെന്ന് മകൻ!
ആരോഗ്യനില വഷളായതിനെ തുടർന്ന് അബ്ദുൾ നാസർ മഅ്ദനിയെ ആശുപത്രിയിൽ പ്രവേശിപ്പിച്ചു. അബ്ദുൾ നാസർ മഅ്ദിനിയുടെ ഫേസ്ബുക്ക് പേജിലൂടെ അദ്ദേഹത്തിന്റെ മകനാണ് ഇക്കാര്യം അറിയിച്ചത്. ചൊവ്വാഴ്ച രാവിലെയാണ് മഅ്ദനിയുടെ ആരോഗ്യനില വഷളായത്. ഛർദിയും തലചുറ്റലും കടുത്ത രക്തസമ്മർദവും മൂലമാണ് മഅ്ദനിയെ ആശുപത്രിയിൽ പ്രവേശിപ്പിച്ചതെന്നും മകൻ പറഞ്ഞു. കഴിഞ്ഞ ദിവസം അർധ രാത്രിയോടെയാണ് മഅ്ദനിയെ ആശുപത്രിയിൽ പ്രവേശിപ്പിച്ചത്.
മഅ്ദനി ഉസ്താദിന്റെ മകനാണ് എന്ന് വ്യക്തമാക്കിയാണ് ഫേസ്ബുക്കിൽ മഅ്ദനിയുടെ മകൻ കാര്യങ്ങൾ വ്യക്തമാക്കിയത്. ' വാപ്പിച്ചിക്ക് ഇന്നലെ രാവിലെ മുതൽ അതിശക്തമായ ഛർദ്ദിയും തലചുറ്റലും ഒപ്പം ആ.ജ യും വളരെ കൂടുതൽ ആണ്. ആരോഗ്യവസ്ഥ വളരെ ബുദ്ധിമുട്ടിലായതിനെ തുടർന്ന് ഇന്നലെ അർദ്ധരാത്രിയിൽ ആശുപത്രിയിൽ പ്രവേശിപ്പിച്ചിരിക്കുകയാണ്.
എല്ലാവരുടെയും പ്രത്യേക പ്രാർത്ഥന ഉണ്ടാകണമെന്ന് വിനയപൂർവ്വം അഭ്യർത്ഥിക്കുന്നു' എന്നാണ് ഫേസ്ബുക്ക് പോസ്റ്റ്. ബെംഗളൂരു സ്ഫോടന കേസിലാണ് മഅ്ദനി വിചാരണ നേരിടുന്നത്. 1998-ലെ കോയമ്പത്തൂർ സ്ഫോടനക്കേസിൽ പങ്കുണ്ടെന്നാരാപിച്ച് ഏപ്രിൽ നാലിന് കോയമ്പത്തൂർ പോലീസിന് കൈമാറിയ മഅദനിയെ കോയമ്പത്തൂർ സെൻട്രൽ ജയിലിൽ അടച്ചശേഷം ദേശീയ സുരക്ഷാ നിയമപ്രകാരം കേസെടുക്കുകയായിരുന്നു. ബംഗളുരു സ്ഫോടനത്തിന്റെ പേരിൽ കർണാടക പോലീസ് 2010 ആഗസ്റ്റ് 17 നാണ് അറസ്റ്റ് ചെയ്യുന്നത്. പ്രതികൾ നൽകിയ മൊഴികളുടെ അടിസ്ഥാനത്തിലായിരുന്നു അദ്ദേഹത്തിനെതിരെ കേസ് എടുത്തിട്ടുള്ളത്.