എം എൻ കാരശ്ശേരിക്കും പരിസ്ഥിതി പ്രവർത്തകർക്കുമെതിരെ ആക്രമണം: സംഭവം കക്കാടംപൊയിലിൽ വെച്ച്!!
കോഴിക്കോട്: പിവി അൻവർ എംഎൽഎയുടെ ഭാര്യാ പിതാവിന്റെ പേരിലുള്ള ഭൂമിയിലെ അനധികൃത തടയണ പരിശോധിക്കാനെത്തിയ പരിസ്ഥിതി പ്രവർത്തകർക്ക് നേരെ ആക്രമണം. സി ആർ നീലകണ്ഠൻ, എംഎൻ കാരശേരി, കെ അജിത, ഡോ. ആസാദ്, പ്രൊഫ. കുസുമം ജോസഫ്, ടിവി രാജൻ എന്നിവർക്ക് നേരെയാണ് കക്കാടം പൊയിലിൽ വെച്ച് ആക്രമണമുണ്ടായത്. പരിസ്ഥിതി പ്രവർത്തകർക്ക് നേരെയുണ്ടായ അക്രമത്തിൽ പ്രതിഷേധിച്ച് കോഴിക്കോട്ടെ സംസ്കാരിക പ്രവർത്തകർ പ്രതിഷേധവും സംഘടിപ്പിച്ചിരുന്നു.
സംഘത്തിലുണ്ടായിരുന്ന പരിസ്ഥിതി പ്രവർത്തക കുസുമം ജോസഫിനോട് അസഭ്യം പറഞ്ഞെന്നും കൈപിടിച്ച് തിരിക്കുകയും ചെയ്തെന്ന് എംഎൻ കാരശേരി വ്യക്തമാക്കി. തടയണ സംബന്ധിച്ച നിജസ്ഥിതി പരിശോധിക്കുന്നതിനായാണ് പോയത്. സമരം ചെയ്യുന്നതിന് വേണ്ടിയല്ലെന്നും അദ്ദേഹം ചൂണ്ടിക്കാണിച്ചു.
പിവി അൻവർ എംഎൽഎയുടെ ഉടമസ്ഥതയിലുള്ള അനധികൃത തടയണയും ക്വാറിയും ഉൾപ്പെടെയുള്ള നിർമാണങ്ങളുടേയും നിജസ്ഥിതി പരിശോധിക്കാനാണ് തങ്ങളെത്തിയതെന്നാണ് എംഎൻ കാരശ്ശേരി നൽകിയ വിശദീകരണം. അതേസമയം സിപിഎം ലോക്കൽ കമ്മറ്റി സെക്രട്ടറിയുടെ നേതൃത്വത്തിലുള്ള സംഘമാണ് തങ്ങളെ ആക്രമിച്ചതെന്നാണ് സംഘത്തിലുണ്ടായിരുന്നവർ പറയുന്നത്.