ഗണേഷ് തന്റെ സുഹൃത്താണ്, അദ്ദേഹത്തെക്കുറിച്ച് മോശമായി പറയാനില്ലെന്ന് ജഗദീഷ്

കഴിഞ്ഞ ദിവസം കെബി ഗണേഷ് കുമാര്‍ പേരു പറയാതെ നടന്‍ ജഗദീഷിനെ രൂക്ഷമായി വിമര്‍ശിച്ചിരുന്നു. സ്വന്തം അച്ഛന്‍ മരിച്ചതറിഞ്ഞിട്ടും വിദേശത്ത് സ്റ്റേജ് ഷോയുമായി കറങ്ങി നടന്ന ഒരു ഹാസ്യനടന്‍ മലയാളത്തിലുണ്ടെന്നും സ്‌നേഹം നടിച്ച് വൈകാതെ അയാള്‍ നിങ്ങളുടെ അടുത്തെത്തുമെന്നും ഗണേഷ് പറയുകയുണ്ടായി. പത്തനാപുരത്ത് തന്റെ എതിര്‍ സ്ഥാനാര്‍ത്ഥിയാകുമെന്ന് സൂചന കിട്ടിയതോടെയാണ് ജഗദീഷിനെതിരെ ഇങ്ങനെയൊരു പരാമര്‍ശം നടത്തിയത്.

അതേസമയം, ഇതിനെക്കുറിച്ച് ചോദിച്ചപ്പോള്‍ ജഗദീഷ് പറഞ്ഞതിങ്ങനെ. സൗഹൃദങ്ങള്‍ തന്റെ ജീവിതത്തില്‍ വിലപ്പെട്ടതാണ്. ഗണേഷ് കുമാര്‍ തന്റെ നല്ല സുഹൃത്താണെന്നും ജഗദീഷ് പറഞ്ഞു. ലോകത്തിലെ ഏറ്റവും വലിയ ദുഷ്ടന്‍ ഞാനാണെന്ന് പറഞ്ഞാലും താന്‍ പ്രതികരിക്കില്ലെന്നാണ് താരം പറയുന്നത്.

ഞാന്‍ വലിയ ദുഷ്ടനാണെന്നു മാത്രമേ ഒരാള്‍ക്ക് പറയാന്‍ കഴിയുകയുള്ളൂ. അതിലപ്പുറം മോശം തന്നെക്കുറിച്ച് പറയാനുണ്ടാകില്ല. ഗണേഷ് കുമാറിനെക്കുറിച്ച് മോശമായി തനിക്കൊന്നും പറയാനില്ലെന്നും ജഗദീഷ് പറയുന്നു. ആരെക്കുറിച്ചും മോശമായി ഒന്നും പറയില്ലെന്ന് താന്‍ പറഞ്ഞിരുന്നു. ഇത് താന്‍ ജനങ്ങള്‍ക്ക് നല്‍കിയ വാക്കാണ്. അത് തെറ്റിക്കില്ലെന്നും ജഗദീഷ് വ്യക്തമാക്കി.

തിരഞ്ഞെടുപ്പിന് ശേഷവും തനിക്ക് പഴയ സൗഹൃദങ്ങള്‍ വേണം. അതുകൊണ്ടു തന്നെ വിമര്‍ശനങ്ങള്‍ക്കും പ്രതികരണങ്ങള്‍ക്കും മറുപടിപറയാന്‍ താല്‍പര്യമില്ലെന്നും ജഗദീഷ് പറയുന്നു.

English summary

Actor Jagadish talk about Ganesh kumar