"രാജ്യം സുരക്ഷിതമായ കൈകളിൽ"; പ്രധാനമന്ത്രിയെ പുകഴ്ത്തി മോഹൻലാൽ

പ്രധാനമന്ത്രി നരേന്ദ്ര മോദിയുടെ ഭരണമികവിനെയും കാഴ്ചപ്പാടുകളെയും പുകഴ്ത്തി മലയാളത്തിന്റെ പ്രിയ നടൻ മോഹൻലാൽ. രാജ്യത്തിന്റെ പുരോഗതിക്കും വികസനത്തിനുമായി പ്രധാനമന്ത്രി നടത്തുന്ന പരിശ്രമങ്ങൾ അഭിനന്ദനാർഹമാണെന്ന് അദ്ദേഹം വ്യക്തമാക്കി. കഴിഞ്ഞ കുറച്ചു വർഷങ്ങളായി രാജ്യം കൈവരിച്ച നേട്ടങ്ങൾ ലോകം ഉറ്റുനോക്കുകയാണെന്നും, അതിനു പിന്നിൽ ശക്തമായ ഒരു നേതൃത്വമുണ്ടെന്നും മോഹൻലാൽ കൂട്ടിച്ചേർത്തു. കേന്ദ്ര സർക്കാരിന് വേണ്ടിയുള്ള പ്രത്യേക പോഡ്കാസ്റ്റിലാണ് മോഹൻലാലിന്‍റെ പരാമർശം.

പ്രധാനമന്ത്രി ഏതൊരാൾക്കും പ്രചോദനം

ഇന്ത്യയെ ലോകത്തിന്റെ നെറുകയിൽ എത്തിക്കാൻ പ്രധാനമന്ത്രിക്ക് സാധിച്ചിട്ടുണ്ടെന്ന് മോഹൻലാൽ അഭിപ്രായപ്പെട്ടു. അടിസ്ഥാന സൗകര്യ വികസനം മുതൽ സാങ്കേതിക വിദ്യയിൽ കൈവരിച്ച മുന്നേറ്റം വരെ എല്ലാം പ്രധാനമന്ത്രിയുടെ ദീർഘവീക്ഷണത്തിന്റെ ഫലമാണ്. പ്രത്യേകിച്ച് യുവാക്കളെയും സാധാരണക്കാരെയും ശാക്തീകരിക്കുന്ന പദ്ധതികളെ അദ്ദേഹം പ്രശംസിച്ചു. പ്രധാനമന്ത്രിയുടെ എളിമയും പ്രവർത്തന സന്നദ്ധതയും ഏതൊരാൾക്കും പ്രചോദനമാണ്. മോദി രാജ്യത്തെ അമ്മയെപ്പോലെ കാണുന്നു. മോദി ഒരു യോഗിയാണെന്നും വാക്കുകളിൽ ഒതുക്കാവുന്ന വ്യക്തിത്വമല്ല അദ്ദേഹത്തിന്‍റേതെന്നും മോഹൻലാൽ പറയുന്നു.

വിശ്വശാന്തി ഫൗണ്ടേഷനും സാമൂഹിക പ്രവർത്തനങ്ങളും

നേരത്തെ പ്രധാനമന്ത്രിയുമായി നടത്തിയ കൂടിക്കാഴ്ചകളിൽ തന്റെ വിശ്വശാന്തി ഫൗണ്ടേഷന്റെ പ്രവർത്തനങ്ങളെക്കുറിച്ച് മോഹൻലാൽ വിശദീകരിച്ചിരുന്നു. അഗതികൾക്കും പാവപ്പെട്ടവർക്കുമായി ഫൗണ്ടേഷൻ നടത്തുന്ന കാൻസർ കെയർ സെന്റർ ഉൾപ്പെടെയുള്ള പദ്ധതികൾക്ക് പ്രധാനമന്ത്രി പൂർണ്ണ പിന്തുണ വാഗ്ദാനം ചെയ്തിരുന്നു. പ്രവാസികൾക്കായി 'ഗ്ലോബൽ മലയാളി റൗണ്ട് ടേബിൾ' എന്ന ആശയം മുന്നോട്ട് വെച്ചപ്പോൾ അതിൽ പങ്കെടുക്കാമെന്ന് പ്രധാനമന്ത്രി സമ്മതിച്ചതും മോഹൻലാൽ സ്മരിച്ചു.

മോഹൻലാലിന്റെ ഇത്തരം പ്രസ്താവനകൾ പലപ്പോഴും രാഷ്ട്രീയ അഭ്യൂഹങ്ങൾക്ക് വഴി വെക്കാറുണ്ട്. അദ്ദേഹം സജീവ രാഷ്ട്രീയത്തിലേക്ക് ഇറങ്ങുന്നു എന്ന തരത്തിലുള്ള വാർത്തകൾ പലപ്പോഴും പ്രചരിക്കാറുണ്ടെങ്കിലും, തന്റെ പ്രവർത്തനമേഖല കലയും സാമൂഹിക സേവനവുമാണെന്ന് അദ്ദേഹം ആവർത്തിച്ചു വ്യക്തമാക്കുന്നു. എന്നാൽ രാജ്യനന്മയ്ക്കായി നിലകൊള്ളുന്ന ഏതു നേതൃത്വത്തെയും പിന്തുണയ്ക്കുക എന്നത് ഒരു പൗരന്റെ കടമയാണെന്നും അദ്ദേഹം പറയാറുണ്ട്.

മോഹൻലാലിന് ദാദാസാഹിബ് ഫാൽക്കെ പുരസ്കാരം ലഭിച്ച വേളയിൽ പ്രധാനമന്ത്രി അദ്ദേഹത്തെ "ഇന്ത്യൻ സിനിമയുടെ വിളക്ക്" എന്ന് വിശേഷിപ്പിച്ചിരുന്നു. മോഹൻലാലിന്റെ അഭിനയ മികവിനെയും വിനയത്തെയും പ്രധാനമന്ത്രി പലപ്പോഴും പുകഴ്ത്തിയിട്ടുണ്ട്.

അടുത്തിടെ മുഖ്യമന്ത്രി പിണറായി വിജയനുമായി മോഹൻലാൽ പ്രേത്യേക അഭിമുഖം നടത്തിയിരുന്നു. അഭിമുഖത്തിൽ, കേരളത്തിന്റെ വികസന കാര്യങ്ങളെക്കുറിച്ചും പ്രളയാനന്തര പുനർനിർമ്മാണത്തെക്കുറിച്ചും ഇരുവരും ചർച്ച ചെയ്തിരുന്നു. മുഖ്യമന്ത്രിയുടെ പ്രവർത്തനശൈലിയെയും തീരുമാനങ്ങൾ നടപ്പിലാക്കുന്നതിലെ വേഗതയെയും മോഹൻലാൽ അന്ന് അഭിനന്ദിച്ചിരുന്നു. സംസ്ഥാനത്തിന്റെ സാംസ്കാരികവും സാമൂഹികവുമായ പുരോഗതിക്കായി മുഖ്യമന്ത്രി നൽകുന്ന പിന്തുണയെക്കുറിച്ച് താരം വാചാലനായി.