പള്സര് സുനിയുടെ നീക്കങ്ങള് പോലീസ് അറിഞ്ഞത് അഭിഭാഷക വഴി
കൊച്ചി: നടിയെ ആക്രമിച്ച സംഭവത്തിലെ മുഖ്യപ്രതി പള്സര് സുനി പോലീസിനെ വെട്ടിച്ച് കടന്നെങ്കിലും കോടതിയില് കീഴടങ്ങാനെത്തിയപ്പോള് പിടിയിലായത് അഭിഭാഷക വഴിയെന്ന് റിപ്പോര്ട്ട്. സുനിക്കുവേണ്ടി കോടതിയില് ഹാജരാകുന്ന അഭിഭാഷയെ നിരീക്ഷിച്ച പോലീസ് എറണാകുളം കോടതിക്ക് പുറത്ത് മഫ്ത്തില് കാവല് നില്പ്പുണ്ടായിരുന്നു.
എന്നാല്, സുനിയും വിജീഷും കോടതിയിലേക്ക് പ്രവേശിച്ചത് കോടതിയുടെ പിന്നിലെ മതില് ചാടിക്കടന്നാണ്. ഇത് പോലീസിന്റെ കണക്കുകൂട്ടലുകള് തെറ്റിച്ചു. ഇതേ തുടര്ന്നാണ് കോടതിക്കുള്ളില് പിടിവലി വേണ്ടിവന്നത്. ഒരു കാരണവശാലും പ്രതിയെ കോടതിക്കുള്ളില് പ്രവേശിക്കാന് അനുവദിക്കരുതെന്നായിരുന്നു മേലുദ്യോഗസ്ഥരുടെ നിര്ദ്ദേശം.
നിര്ദ്ദേശം പൂര്ണമായും പാലിക്കാനായില്ലെങ്കിലും കോടതിക്കുള്ളിലെ പിടിവലിയില് മജിസ്ട്രേറ്റ് പോലീസിന് അനുകൂലമായതോടെയാണ് കൂടുതല് വിവാദങ്ങള് ഒഴിവായത്. നേരത്തെ തിരുവനന്തപുരത്താണ് സുനി കീഴടങ്ങാന് ആലോചിച്ചത്. ഇതിനായി അഭിഭാഷക ബുധനാഴ്ച തിരുവനന്തപുരത്തെത്തിയിരുന്നു. എന്നാല്, പിന്നീട് തീരുമാനം മാറ്റുകയായിരുന്നു.
നടിയെ തട്ടിക്കൊണ്ടുപോയി പീഡിപ്പിച്ച് അഞ്ചു ദിവസമായി സുനിയും വിജീഷും ഒളിവിലായിരുന്നു. പലവഴിയിലും ഇവരെക്കുറിച്ചുള്ള സൂചന ലഭിച്ചെങ്കിലും തന്ത്രപൂര്വം പ്രതികള് രക്ഷപ്പെടുകയായിരുന്നു. രണ്ട് പ്രതികളെയും പിടികൂടിയതോടെ തെളിവെടുപ്പ് നടപടികള് പൂര്ത്തിയാക്കി അന്വേഷണം അവസാനിപ്പിക്കാനാകും പോലീസിന്റെ ശ്രമം.