നടി ആക്രമിയ്ക്കപ്പെട്ട സംഭവം: ദിലീപ് ഡിജിപിയ്ക്ക് പരാതി നൽകി,'വ്യാജപ്രചരണം നടത്തി, നാണംകെടുത്തി'

തന്നെ അപമാനിയ്ക്കുന്ന തരത്തിൽ സോഷ്യൽ മീഡിയയിൽ വാർത്തകൾ വന്നെന്നാണ് ദിലീപിന്റെ പരാതി

By മരിയ

Updated: Friday, February 24, 2017, 14:13 [IST]

കൊച്ചി: നഗരത്തിൽ വെച്ച് നടി ആക്രമിയ്ക്കപ്പെട്ട ശേഷം തനിയ്ക്ക് എതിരെ സാമൂഹ്യമാധ്യമങ്ങളിൽ മോശം വാർത്തകൾ പ്രസിദ്ധീകരിക്കുന്നതിനെതിരെ നടൻ ദീലീപ്. ഇക്കാര്യം ചൂണ്ടിക്കാട്ടി ദിലീപ് ഡിജിപിയ്ക്ക് പരാതി നൽകി. തന്നെ അപമാനിക്കുന്ന തരത്തിലും, നാണം കെടുത്തുന്ന രീതിയിലും കള്ളക്കഥകൾ പ്രചരിപ്പിച്ചു എന്നതാണ് ദിലീപിന്റെ പരാതി.

നടി ആക്രമിയ്ക്കപ്പെട്ടതിന് പിന്നിൽ ക്വട്ടേഷൻ സംഘങ്ങളാണെന്നും ഇവരെ ഏർപ്പാടാക്കിയത് ആലുവയിലെ ഒരു പ്രമുഖ നടനാണെന്നുമുള്ള നിലയിൽ ഓൺലൈൻ മാധ്യമങ്ങളിൽ വാർത്തകൾ വന്നിരുന്നു.

നടിയെ ആക്രമിച്ച കേസിലെ പ്രധാന പ്രതി പൾസർ സുനിയുമായി ദിലീപിന് ബന്ധമുണ്ടെന്നും കഥകളുണ്ടായി. ഈ പേരിൽ പ്രചരിപ്പിച്ചിരുന്നത് ദിലീപ് ഫാൻസ് അസോസിയേനിലെ ഒരാളുടെ ഫോട്ടോ ആയിരുന്നു.

താൻ ഒരു തരത്തിലും ബന്ധപ്പെടാത്ത ഒരു ക്രിമിനൽ നടപടിയിൽ പങ്കാളിയായെന്ന തരത്തിൽ വാർത്തകൾ പടച്ചുവിട്ട മാധ്യമങ്ങൾക്കെതിരെ നടപടി സ്വീകരിക്കണമെന്നാണ് ദീലീപിന്റെ ആവശ്യം.

താൻ നിരപരാധിയാണെന്ന് ചൂണ്ടിക്കാട്ടി ദിലീപ് ഫേസ്ബുക്കിൽ പോസ്റ്റ് ഇട്ടിരുന്നു. തന്നെയും കുടുംബത്തെയും അപമാനിയിക്കാനുള്ള ശ്രമങ്ങളാണ് മാധ്യമങ്ങളുടെ ഭാഗത്ത് നിന്ന് ഉണ്ടാകുന്നത് എന്നതായിരുന്നു താരത്തിന്റെ ആക്ഷേപം