തന്നെ കാണണമെന്ന് ഒഎന്‍വി പറഞ്ഞു, ആഗ്രഹം സഫലമാക്കാത്തതില്‍ മഞ്ജു വാര്യര്‍ വിതുമ്പി

തിരുവനന്തപുരം: പ്രിയ ഗാനരചയിതാവ് ഒഎന്‍വി കുറുപ്പിന് ആദരാഞ്ജലി അര്‍പ്പിക്കാന്‍ ചലച്ചിത്ര പ്രമുഖരും എത്തിയിരുന്നു. ആയിരങ്ങളാണ് അദ്ദേഹത്തെ ഒരു നോക്കു കാണാന്‍ എത്തിയത്. തിരുവനന്തപുരം വിജെടി ഹാളില്‍ കവിയുടെ ഭൗതിക ശരീരം കാണാന്‍ പ്രശസ്ത നടി മഞ്ജു വാര്യരും എത്തിയിരുന്നു.

ഒഎന്‍വിയുടെ മൃതദേഹത്തിനു മുന്നില്‍ നിറ കണ്ണുകളുമായി കൈകൂപ്പിയാണ് മഞ്ജു നിന്നത്. തന്റെ ആഗ്രഹവും സാറിന്റെ ആഗ്രഹവും തനിക്ക് നിറവേറ്റാന്‍ കഴിഞ്ഞില്ല. അദ്ദേഹത്തെ നേരിട്ട് ഒരു നോക്ക് കാണാന്‍ കഴിയാത്തതിലുള്ള ദുഃഖത്തിലാണ് മഞ്ജു നിന്നത്. ഒഎന്‍വി സാറിന്റെ ആഗ്രഹം തനിക്ക് സഫലമാക്കാന്‍ പറ്റിയില്ലെന്നാണ് മഞ്ജു പറഞ്ഞത്.

വര്‍ഷങ്ങള്‍ക്കുശേഷം മഞ്ജു അഭിനയരംഗത്തേക്ക് കടന്നുവന്ന ചിത്രമായിരുന്നു ഹൗ ഓള്‍ഡ് ആര്‍ യു. തന്റെ ചിത്രം ഒഎന്‍വി കുടുംബസമേതം കാണുകയുണ്ടായി. അദ്ദേഹത്തിന് ചിത്രം വലിയ ഇഷ്ടമായെന്ന് തന്നെ ഫോണിലൂടെ വിളിച്ചു പറയുകയും ചെയ്തിരുന്നു. അന്ന് തന്നോട് നേരിട്ട് കാണണമെന്ന ആഗ്രഹവും അറിയിച്ചിരുന്നു. പക്ഷെ, ഷൂട്ടിങ് തിരക്കുകള്‍ കാരണം തനിക്ക് കാണാന്‍ സാധിച്ചില്ലെന്ന് മഞ്ജു പറഞ്ഞു.

ഫേസ്ബുക്കിലൂടെയും മഞ്ജു ഒഎന്‍വിയെ അനുസ്മരിച്ചു. ഒട്ടേറെ പേര്‍ വിജെടി ഹാളില്‍ എത്തിയിരുന്നു. പ്രതിപക്ഷ നേതാവ് വിഎസ് അച്യൂതാനന്ദന്‍, കോടിയേരി ബാലകൃഷ്ണന്‍, ആരോഗ്യമന്ത്രി വി എസ് ശിവകുമാര്‍, പിന്നണി ഗായകന്‍ എംജി ശ്രീകുമാര്‍ എന്നിങ്ങനെ ഒട്ടേറെ പ്രമുഖര്‍ എത്തിയിരുന്നു.

English summary

Actress Manju warrier response on onv kurup death