ചോര ഒലിച്ചുകൊണ്ടുള്ള കുറെ മുഖങ്ങൾ, ജെഎൻയു ആക്രമണത്തിൽ പ്രതികരിച്ച് മഞ്ജു വാര്യർ
കൊച്ചി: ജവഹര്ലാല് നെഹ്രു സര്വ്വകലാശാലയില് വിദ്യാര്ത്ഥികളും അധ്യാപകരും ആക്രമിക്കപ്പെട്ട സംഭവത്തില് പ്രതികരണവുമായി നടി മഞ്ജു വാര്യര്. ജെഎന്യുവില് നിന്നുളള ചോര ഒലിച്ച മുഖങ്ങള് ടിവിയില് കണ്ട് ഞെട്ടിയെന്ന് മഞ്ജു വാര്യര് ഫേസ്ബുക്കില് കുറിച്ചു.
ഇരുളിന്റെ മറവില് നടത്തിയ അക്രമത്തിന് പിന്നിലെ രാഷ്ട്രീയം ഏതാണെങ്കിലും അതിനെ പിന്തുണയ്ക്കാനാവില്ലെന്നും മഞ്ജു വാര്യര് വ്യക്തമാക്കി. താന് ആക്രമിക്കപ്പെട്ട കുട്ടികള്ക്കൊപ്പം നില്ക്കുന്നുവെന്നും മഞ്ജു വാര്യര് ഫേസ്ബുക്കില് കുറിച്ചു.
മഞ്ജു വാര്യരുടെ ഫേസ്ബുക്ക് പോസ്റ്റിന്റെ പൂർണരൂപം വായിക്കാം: '' ജെഎൻയുവിൽ നിന്നുള്ള മുഖങ്ങൾ രാവിലെ ടിവിയിൽ കണ്ടപ്പോൾ ഞെട്ടിപ്പോയി. ചോര ഒലിച്ചുകൊണ്ടുള്ള കുറെ മുഖങ്ങൾ. രാത്രി അവരെ മൂന്നു മണിക്കൂറോളം പലരും ചേർന്ന് അക്രമിച്ചിരിക്കുന്നു. ജെഎൻയു എന്നതു ഈ രാജ്യത്തിന്റെ അറിവിന്റെ അടയാളമായിരുന്നു. അവിടെ പഠിക്കുക എന്നതു അറിവിന്റെ മാനദണ്ഡമായിരുന്നു. അവിടെ പഠിച്ച പലരുമാണ് ഇന്നും നമ്മളെ നയിക്കുന്നതും ഭരിക്കുന്നതും. അവരുടെ രാഷ്ട്രീയം പലതായിരുന്നുവെങ്കിലും അവരുടെ രാജ്യസ്നേഹം ചോദ്യം ചെയ്യാനാകില്ല.
Recommended Video
രാഷ്ട്രീയ അഭിപ്രായ വ്യത്യാസത്തിനിടയിലും അവർ അവിടെ കലാപമുണ്ടാക്കുകയല്ല ചെയ്തത്. പുറത്തുനിന്നുള്ളവർ കൂടി ചേർന്നു ഇരുളിന്റെ മറവിൽ അക്രമം നടത്തുന്നുവെന്നു പറയുമ്പോൾ അതിലെ രാഷ്ട്രീയം എന്തായാലും തുണയ്ക്കാനാകില്ല. കുട്ടികളെ അവിടെ പഠിപ്പിക്കാൻ വിട്ട അമ്മമാരിൽ ഭൂരിഭാഗവും സാധാരണക്കാരാകും. ടിവിയിൽ ചോരയിൽ കുതിർന്ന പലരുടെയും മുഖങ്ങൾ കാണുമ്പോൾ ആ അമ്മമാരുടെ മനസ്സിന്റെ അവസ്ഥ എന്താകും. നമുക്ക് ആ കുട്ടികളുടെ കൂടെ നിൽക്കാതിരിക്കാനാകില്ല. ഞാനും കൂടെ നിൽക്കുന്നു.''
Click it and Unblock the Notifications
Sign in with Google