'വിജയ് ബാബു ഉള്ളിലും ഷമ്മി തിലകന്‍ പുറത്തും... ശുദ്ധ മാഫിസം!'; അമ്മക്കെതിരെ ആഞ്ഞടിച്ച് നടി രഞ്ജിനി

കൊച്ചി: മലയാള സിനിമയിലെ അഭിനേതാക്കളുടെ സംഘടനയായ അമ്മയ്ക്കതിരെ രൂക്ഷ വിമര്‍ശനവുമായി നടി രഞ്ജിനി. നടിയെ ബലാത്സംഗം ചെയ്തു എന്ന കേസില്‍ പ്രതി ചേര്‍ക്കപ്പെട്ട വിജയ് ബാബു സംഘടനയില്‍ തുടരുമ്പോള്‍ തിലകനെയും ഷമ്മി തിലകനെയും പോലുള്ള നിരപരാധികളായ അഭിനേതാക്കളെ പുറത്ത് നിര്‍ത്തുന്നത് അപലപനീയമാണെന്ന് രഞ്ജിനി പറഞ്ഞു.

ഫേസ്ബുക്ക് പോസ്റ്റിലായിരുന്നു രഞ്ജിനിയുടെ പ്രതികരണം. അമ്മയില്‍ നടക്കുന്നത് മാഫിസമാണ് എന്നും രഞ്ജിനി ആരോപിച്ചു. തിലകന്റേയും ഷമ്മി തിലകന്റേയും ചിത്രം പങ്കുവെച്ച് കൊണ്ടായിരുന്നു രഞ്ജിനിയുടെ പ്രതികരണം. അമ്മയില്‍ അംഗങ്ങളായ രണ്ട് എം എല്‍ എമാരേയും രഞ്ജിനി വിമര്‍ശിക്കുന്നുണ്ട്. മുകേഷ്, ഗണേശ് കുമാര്‍ എന്നിവരാണ് അമ്മയിലെ എം എല്‍ എമാര്‍. ഇരുവരും എല്‍ ഡി എഫ് എം എല്‍ എമാരാണ്.

'ബലാത്സംഗ കേസില്‍ പ്രതി ചേര്‍ക്കപ്പെട്ട വിജയ് ബാബു താരസംഘടനയായ 'അമ്മയില്‍' തുടരവെ, തിലകന്‍ അങ്കിളിനെയും ഷമ്മി തിലകനെയും പോലുള്ള നിരപരാധികളായ അഭിനേതാക്കള്‍ പുറത്ത് നില്‍ക്കേണ്ടി വരുന്ന സാഹചര്യം അപലപനീയമാണ്. ഈ അഭിനേതാക്കളുടെ സംഘം ഈയിടെയായി വലിയ തമാശയായി മാറിയിരിക്കുന്നു... ശുദ്ധ മാഫിസം!, എന്നാണ് രഞ്ജിനി പറയുന്നത്.

രണ്ട് എം എല്‍ എമാര്‍ അവിടെ ഉറങ്ങുകയാണോ എന്നും ഈ ചെറിയ കൂട്ടായ്മയില്‍ അടിച്ചമര്‍ത്തപ്പെട്ടവരുടെ അവകാശങ്ങള്‍ക്കായി നിങ്ങള്‍ക്ക് നിലകൊള്ളാനായില്ലെങ്കില്‍, നിങ്ങളുടെ മണ്ഡലങ്ങളിലെ സാധാരണക്കാര്‍ക്കായി നിങ്ങള്‍ എന്താണ് ചെയ്യാന്‍ പോകുന്നത് എന്നാണ് രഞ്ജിനി ചോദിക്കുന്നത്. കഴിഞ്ഞ ദിവസം കൊച്ചിയില്‍ നടന്ന അമ്മ വാര്‍ഷിക ജനറല്‍ ബോഡി യോഗത്തിന് ശേഷം ഉണ്ടായ വിവാദങ്ങളുടെ പശ്ചാത്തലത്തിലാണ് രഞ്ജിനിയുടെ പ്രതികരണം.

ഞായറാഴ്ച നടന്ന അമ്മ വാര്‍ഷിക ജനറല്‍ ബോഡി യോഗത്തില്‍ ബലാത്സംഗ കേസില്‍ പ്രതിയായ വിജയ് ബാബു പങ്കെടുത്തിരുന്നു. ഇത് വലിയ വിമര്‍ശനങ്ങള്‍ക്ക് വഴിവെച്ചിരുന്നു. എന്നാല്‍ വിജയ് ബാബുവിനെ സംരക്ഷിക്കുന്ന നിലപാടായിരുന്നു അമ്മ ഭാരവാഹികള്‍ സ്വീകരിച്ചത്. വിജയ് ബാബുവിന്റെ കേസ് കോടതിയിലാണ് എന്നും കോടതി തീരുമാനിക്കുന്നതിന് അനുസരിച്ച് മാത്രമെ വിജയ് ബാബുവിനെതിരെ സംഘടന നടപടി എടുക്കൂ എന്നുമായിരുന്നു അമ്മ ജനറല്‍ സെക്രട്ടറി ഇടവേള ബാബു പറഞ്ഞത്.

അതേസമയം തുടര്‍ച്ചയായി അച്ചടക്ക ലംഘനം നടത്തുന്ന ഷമ്മി തിലകനെതിരെ വലിയ വിമര്‍ശനമാണ് അംഗങ്ങളുടെ ഭാഗത്ത് നിന്ന് ഉണ്ടായത് എന്ന് ജനറല്‍ സെക്രട്ടറി ഇടവേള ബാബു പറഞ്ഞിരുന്നു. ഷമ്മി തിലകനെതിരെ നിരവധി പേര്‍ അച്ചടക്ക നടപടി സ്വീകരിക്കണം എന്ന് ആവശ്യപ്പെട്ടിട്ടുണ്ട് എന്നും ഷമ്മി തിലകനോട് വിശദീകരണം തേടിയിട്ടുണ്ട് എന്നും ഇടവേള ബാബു പറഞ്ഞിരുന്നു. ഷമ്മി തിലകനെതിരെ നടപടിയെടുക്കാന്‍ അമ്മയുടെ വാര്‍ഷിക പൊതുയോഗം അമ്മ എക്സിക്യൂട്ടീവിനെ ചുമതലപ്പെടുത്തിയിരിക്കുകയാണ്.

അമ്മയുടെ യോഗം മൊബൈലില്‍ പകര്‍ത്താന്‍ ശ്രമിച്ചു എന്നും അമ്മ സംഘടനയെ മാഫിയ സംഘം എന്ന് വിൡച്ചു എന്നുമാണ് ഷമ്മി തിലകനെതിരായ ആരോപണം. 2021 ഡിസംബറില്‍ കൊച്ചിയില്‍ നടന്ന ജനറല്‍ ബോഡി യോഗം ഷമ്മി തിലകന്‍ മൊബൈലില്‍ ചിത്രീകരിച്ചു എന്നതാണ് വിവാദമായത്. ഇത് കണ്ടയുടനെ യോഗത്തില്‍ പങ്കെടുത്ത താരങ്ങളില്‍ ഒരാള്‍ സംഘടനാ നേതാക്കളുടെ ശ്രദ്ധയില്‍ പെടുത്തുകയായിരുന്നു എന്നാണ് റിപ്പോര്‍ട്ട്.

തുടര്‍ന്ന് ഷമ്മി തിലകനെതിരേ നടപടി വേണം എന്ന ആവശ്യവുമായി അമ്മയിലെ അംഗങ്ങള്‍ രംഗത്തെത്തുകയായിരുന്നു. അതേസമയം മമ്മൂട്ടി അടക്കമുള്ള താരങ്ങള്‍ ഷമ്മി തിലകനെതിരെ നടപടി എടുക്കരുത് എന്ന് അന്ന് അഭ്യര്‍ഥിച്ചിരുന്നു എന്നാണ് റിപ്പോര്‍ട്ട്. ഇതിന്റെ പശ്ചാത്തലത്തില്‍ അന്ന് അമ്മ ജനറല്‍ ബോഡിയില്‍ ഷമ്മി തിലകനെ താക്കീത് ചെയ്തിരിക്കുകയാണ്.

English summary

Actress Ranjini slams AMMA and support Shammi Thilakan