'ഞാനൊരു മോദി ഫാൻ', തിരഞ്ഞെടുപ്പിന് മുന്നോടിയായി ബിജെപിയിൽ ചേർന്ന് ഊർമ്മിള ഉണ്ണി
കൊച്ചി: തദ്ദേശ തിരഞ്ഞെടുപ്പിന് ദിവസങ്ങള് മാത്രം അവശേഷിക്കേ ബിജെപിയില് ചേര്ന്ന് നടി ഊര്മ്മിള ഉണ്ണി. കൊച്ചിയില് വെച്ച് നടന്ന ബിജെപി കള്ച്ചറല് സെല് പരിപാടിയിലാണ് ഊര്മ്മിള ഉണ്ണി പാര്ട്ടി അംഗത്വം സ്വീകരിച്ചത്. ബിജെപി നേതാവ് എഎന് രാധാകൃഷ്ണന് ഷാള് അണിയിച്ച് ബിജെപിയിലേക്ക് ഔദ്യോഗികമായി ഊര്മ്മിള ഉണ്ണിയെ സ്വീകരിച്ചു.
ചലച്ചിത്ര നിര്മ്മാതാവും ബിജെപി നേതാവുമായ ജി സുരേഷ് കുമാറും പരിപാടിയില് പങ്കെടുത്തു. താന് 35 വര്ഷത്തോളമായി ബിജെപി അംഗമാണെന്നും എന്നാല് തീരെ ആക്ടീവ് ആയിരുന്നില്ലെന്നും ഊര്മ്മിള ഉണ്ണി മാധ്യമങ്ങളോട് പ്രതികരിച്ചു. ഒ രാജഗോപാലില് നിന്നായിരുന്നു അന്ന് മെമ്പര്ഷിപ്പ് സ്വീകരിച്ചത്.
കലകളുമായി ബന്ധം ഉളളത് കൊണ്ട് കള്ച്ചറല് വിംഗ് താല്പര്യമുളള കാര്യമാണ്. മോദി ഫാന് ആയത് കൊണ്ടാണ് ബിജെപിയില് ചേര്ന്നത് എന്നും ഊര്മ്മിള ഉണ്ണി പറഞ്ഞു. സിനിമ-സീരിയല് അഭിനയ രംഗത്ത് സജീവമായിരുന്ന ഊര്മിള ഉണ്ണി അറിയപ്പെടുന്ന നര്ത്തകി കൂടിയാണ്. തദ്ദേശ തിരഞ്ഞെടുപ്പും അത് കഴിഞ്ഞ് സംസ്ഥാന നിയമസഭാ തിരഞ്ഞെടുപ്പും വരാനിരിക്കെ പാര്ട്ടിയിലേക്ക് കൂടുതല് പ്രമുഖരെ എത്തിക്കാനുളള നീക്കത്തിലാണ് ബിജെപി.
Click it and Unblock the Notifications
Sign in with Google