മൂന്ന് കടകള് ഡാമിലേക്ക് വീണു; റോഡ് ഇടിഞ്ഞു, കനത്ത മഴയില് ഇടുക്കിയില് സംഭവിച്ചത്
തൊടുപുഴ: അടിമാലി-കുമളി ദേശീയ പാതയില് കല്ലാര്കുട്ടി അണക്കെട്ടിനോട് ചേര്ന്ന ഭാഗത്ത് റോഡ് ഇടിഞ്ഞ് മൂന്ന് കടകള് ഡാമിലേക്ക് പതിച്ചു.
അപകടത്തില്പ്പെട്ട കടകളിലുണ്ടായിരുന്നവര് റോഡ് ഇടിയുന്നത് കണ്ട് മാറുകയായിരുന്നു. രണ്ട് ദിവസം തുടര്ച്ചയായി മഴ പെയ്ത ഈ ഭാഗത്തെ റോഡിന് ബലക്ഷയം സംഭവിച്ചിരുന്നു.
ചൊവ്വാഴ്ച രാവിലെയാണ് റോഡ് വിണ്ടുകീറിയത്. ഉച്ചയ്ക്ക് ഒരു ഭാഗം ഇടിയുകയായിരുന്നു. അപകട സാധ്യത മുന്കൂട്ടി കണ്ട് ഇവിടുത്തെ 12 കടകള് ഒഴിപ്പിച്ചിട്ടുണ്ട്. പെട്ടിക്കടകളാണ് അപകടത്തില്പ്പെട്ടത്.
നേരത്തെ അണക്കെട്ട് തുറന്നുവിട്ടിരുന്നു. വെള്ളം അണക്കെട്ടിന്റെ സംഭരണ ശേഷിക്കൊപ്പമെത്തിയതിനെ തുടര്ന്നാണ് തുറന്നുവിട്ടത്. എന്നാല് തിങ്കളാഴ്ച മഴ ശമിച്ചതിനാല് ഷട്ടറുകള് അടച്ചു. ചൊവ്വാഴ്ച മഴയുണ്ടായിരുന്നില്ല. പക്ഷേ, കഴിഞ്ഞ ദിവസം പെയ്ത മഴയാണ് ദുരന്തത്തിന് കാരണമെന്ന് വിലയിരുത്തുന്നു.