പ്രമുഖ ക്രിമിനൽ അഭിഭാഷകന്‍ ബി എ ആളൂർ അന്തരിച്ചു: വിവാദ കേസുകളിലെ സ്ഥിരം നായകന്‍

Updated: Wednesday, April 30, 2025, 13:55 [IST]

എറണാകുളം: പ്രമുഖ ക്രിമിനൽ അഭിഭാഷകനായ ബി എ ആളൂർ അന്തരിച്ചു. ബുധനാഴ്ച ഉച്ചയ്ക്ക് ഒന്നരയോടെയായിരുന്നു അദ്ദേഹത്തിന്റെ അന്ത്യം. 62 വയസായിരുന്നു കുറച്ചുകാലമായി ഹൃദയസംബന്ധമായ അസുഖങ്ങളാൽ ചികിത്സയിലായിരുന്നു. തൃശൂരിലെ സ്വകാര്യ ആശുപത്രിയിൽ വച്ചാണ് മരണം. അവിവാഹിതനായ അദ്ദേഹം തന്റെ സഹോദരങ്ങളോടൊപ്പം തൃശൂരിൽ താമസിച്ച് വരികയായിരുന്നു.

തൃശൂർ എരുമപ്പെട്ടി സ്വദേശിയായ ബിഎ ആളൂരിന്റെ യഥാർത്ഥ പേര് ബിജു ആന്റണിയെന്നാണ്. , കേരള ഹൈക്കോടതിയിലും ജില്ലാ കോടതികളിലും നിരവധി ശ്രദ്ധേയ കേസുകളിൽ പ്രതിഭാഗത്തിന് വേണ്ടി വാദിച്ച് പേര് നേടിയ അഭിഭാഷകനാണ്. തൃശ്ശൂരിലെ സൗമ്യ വധക്കേസ്, പെരുമ്പാവൂരിലെ ജിഷ കൊലപാതകം, ഇലന്തൂരിലെ നരബലി കേസ്, കൊച്ചിയില്‍ നടി ആക്രമിക്കപ്പെട്ട കേസ് എന്നിവയിലെല്ലാം പ്രതികള്‍ക്ക് വേണ്ടി ഹാജരായത് അദ്ദേഹമായിരുന്നു.

തൃശൂര്‍ സെന്റ് തോമസ് കോളേജിലായിരുന്നു പഠനം. പിന്നീട് പൂനൈയില്‍ നിന്നും നിയമ ബിരുദം പൂർത്തിയാക്കി. 1999 ല്‍ ആണ് ആളൂര്‍ അഭിഭാഷകനായി എന്റോള്‍ ചെയ്യുന്നത്. നാല് വര്‍ഷത്തോളം കേരളത്തിലെ വിവിധ കോടതികളില്‍ പ്രാക്ടീസ് ചെയ്തു. തുടക്കം മുതല്‍ സങ്കീർണവും വിവാദപരവുമായ ക്രിമിനൽ കേസുകൾ കൈകാര്യം ചെയ്യുന്നതിൽ മികവ് തെളിയിച്ചു. നടി ആക്രമിക്കപ്പെട്ട കേസിലെ ഒന്നാം പ്രതി പള്‍സർ സുനിക്ക് വേണ്ടിയും തുടക്കത്തില്‍ അദ്ദേഹം ഹാജരായിരുന്നു.

സൗമ്യ വധക്കേസില്‍ ഗോവിന്ദച്ചാമിക്ക് വേണ്ടി വാദിക്കാന്‍ എത്തിയപ്പോഴാണ് മലയാളികള്‍ ബിഎ ആളൂര്‍ എന്ന പേര് ശ്രദ്ധിക്കുന്നത്. സിറ്റിങ്ങിന് ലക്ഷങ്ങള്‍ പ്രതിഫലം വാങ്ങുന്ന ആളൂര്‍ വക്കീല്‍ എങ്ങനെ ഗോവിന്ദച്ചാമിയുടെ അഭിഭാഷകനായി എന്നത് അന്നത്തെ വലിയ ചർച്ചാ വിഷയമായിരുന്നു. എന്നാല്‍ പിന്നീട് ഇത്തരം കേസുകള്‍ അദ്ദേഹം തേടിപ്പിടിച്ച് കൈകാര്യം ചെയ്തു.

വിചാരണ കോടതിയിലും ഹൈക്കോടതിയിലും ഗോവിന്ദച്ചാമി തോറ്റപ്പോള്‍ ആളൂര്‍ വക്കീലിനെ പരിഹസിച്ചവരും ട്രോളിയവരും നിരവധിയായിരുന്നു. എന്നാല്‍ സുപ്രീം കോടതി ഗോവിന്ദച്ചാമിയുടെ വധശിക്ഷയില്‍ ഇളവ് നല്‍കിയതോടെ രാജ്യത്തെ ഏറ്റവും ശ്രദ്ധേയനായ ക്രിമിനല്‍ വക്കീല്‍ ആയി വരെ ബിഎ ആളൂർ മാറുകയാണുണ്ടായത്. സോഷ്യല്‍ മീഡിയയില്‍ നിരന്തരം വലിയ വിമർശനങ്ങള്‍ നേരിടുന്ന വ്യക്തി കൂടിയാണ് അദ്ദേഹം. ആളൂരിന്റെ സംസ്കാരം ഏപ്രിൽ 30-ന് വൈകിട്ട് 5 മണിക്ക് തൃശൂരിലെ വീട്ടുവളപ്പിൽ നടക്കും.