കിസ്സ് ഓഫ് ലവിന് പിറകേ ഫ്രീ തിങ്കേഴ്‌സ് വീണ്ടും പൂട്ടിച്ചു

തിരുവനന്തപുരം: ചുംബനക്കൂട്ടായ്മയുടെ ഫേസ്ബുക്ക് കമ്യൂണിറ്റിയായ കിസ്സ് ഓഫ് ലവിന് പിറകേ ഓണ്‍ലൈന്‍ ലോകത്തെ ചര്‍ച്ചാ സദസ്സായിരുന്ന ഫ്രീ തിങ്കേസ് ഗ്രൂപ്പും പൂട്ടിച്ചു.

കിസ്സ് ഓഫ് ലവിന്റെ ഫേസ്ബുക്ക് പേജ് തകര്‍ത്തവര്‍ തന്നെയായിരിക്കും ഇതിന്റേയും പിറകിലെന്നാണ് വിലയിരുത്തപ്പെടുന്നത്. കിസ്സ് ഓഫ് ലവിന് നേതൃത്വം നല്‍കിയത് ഫ്രീതിങ്കേഴ്‌സ് കൂട്ടായ്മയില്‍ ഉള്ളവരായിരുന്നു.

ജാതിക്കും മതത്തിനും രാഷ്ട്രീയത്തിനും അതീതമായി ഓണ്‍ലൈന്‍ ലോകത്ത് യുക്തി ചിന്തകള്‍ക്ക് പ്രാധാന്യം നല്‍കുന്ന ഗ്രൂപ്പ് ആണ് ഫ്രീതിങ്കേഴ്‌സ്. അതുകൊണ്ട് തന്നെ മതവ്യത്യാസമില്ലാതെ മൗവികവാദികളും വര്‍ഗ്ഗീയവാദികളും ഗ്രൂപ്പിനെതിരെ പലതവണ രംഗത്ത് വന്നിട്ടുണ്ട്.

ഫേസ്ബുക്കിലെ മറ്റൊരു കൂട്ടായ്മയുമായി ഫ്രീതിങ്കേഴ്‌സ് ഗ്രൂപ്പിലെ ചിലര്‍ ആശയസംഘര്‍ഷങ്ങള്‍ പതിവായിരുന്നു. ഇതിന്റെ ഫലമായി പലതവണ ഗ്രൂപ്പ് മാസ് റിപ്പോര്‍ട്ട് ചെയ്ത് പൂട്ടിച്ചിട്ടുണ്ട്. ഇപ്പോള്‍ മതവ്യത്യാസമില്ലാതെയാണ് ആക്രമണം എന്നാണ് സംശയിക്കുന്നത്.

കഴിഞ്ഞ ഓഗസ്റ്റിലും ഫ്രീ തിങ്കേഴ്‌സ് ഗ്രൂപ്പ് മാസ് റിപ്പോര്‍ട്ടിങ്ങിന്റെ ഭാഗമായി പൂട്ടിയിരുന്നു. എന്നാല്‍ ഇപ്പോഴത്തെ സംഭവം മാസ് റിപ്പോര്‍ട്ടിങ് തന്നെയാണോ എന്നാണ് ഗ്രൂപ്പിലെ അംഗങ്ങളുടെ സംശയം. സൈബര്‍ സെല്ലിന്റെ ഇടപെടലാണ് ഇപ്പോള്‍ ഗ്രൂപ്പ് പൂട്ടിച്ചതിന് പിന്നിലെന്നും സംശയമുണ്ട്. കിസ്സ് ഓഫ് ലവ് കമ്യൂണിറ്റി പൂട്ടിച്ചതിന് പിന്നിലും സൈബര്‍ സെല്‍ ഇടപെടലുണ്ടോ എന്നും ആക്ഷേപം ഉയര്‍ന്നിട്ടുണ്ട്.

ഇത് അഞ്ചാം തവണയാണ് ഫ്രീ തിങ്കേഴ്‌സ് പൂട്ടിക്കുന്നത്. ഓരോ തവണയും ഇത്തരം സംഭവങ്ങള്‍ ഉണ്ടാകുമ്പോള്‍ പഴയ അംഗങ്ങളെ ഉള്‍പ്പെടുത്തി പുതിയ ഗ്രൂപ്പ് ഉടന്‍ തന്നെ രൂപീകരിക്കാറും ഉണ്ട്.

English summary

After Kiss of Love, facebook group Freethinkers also reported and blocked