വീണ്ടും സദാചാര ഗുണ്ടായിസം: ചാവക്കാട് യുവാവിനെ തല്ലിക്കൊന്നു

തൃശൂര്‍: കേരള സമൂഹത്തിന് നാണക്കേടായി വീണ്ടും സഹാചാര ഗുണ്ടായിസം. ഇത്തവണ ഇരയായി കൊല്ലപ്പെട്ടത് 27 വയസ്സുള്ള യുവാവാണ്. നാട്ടുകാര്‍ ഇയാളെ തല്ലിക്കൊല്ലുകയായിരുന്നു.

തൃശൂര്‍ ജില്ലയിലെ ചാവക്കാടിനടുത്ത് അഞ്ചങ്ങാടിയിലാണ് സംഭവം. അഞ്ചങ്ങാടി സ്വദേശി സവാഹിര്‍ (27) ആണ് കൊല്ലപ്പെട്ടത്.

രാത്രിയില്‍ കടപ്പുറത്തെ ഒരു വീട്ടില്‍ സവാഹിറിനെ കണ്ടതാണ് നാട്ടിലെ 'സദാചാര പോലീസുകാരെ' ചൊടിപ്പിച്ചത്. വീട്ടിലെ സ്ത്രീയുമായി അവിഹിത ബന്ധമുണ്ടെന്ന് പറഞ്ഞ് സവാഹിറിനെ വളഞ്ഞിട്ട് മര്‍ദ്ദിക്കുകയായിരുന്നു.

ക്രൂരമായ മര്‍ദ്ദനമേറ്റ സവാഹിറിനെ, മര്‍ദ്ദിച്ചവര്‍ തന്നെയാണ് സമീപത്തെ ആശുപത്രിയില്‍ എത്തിച്ചത്. ഗുഡ്‌സ് ഓട്ടോറിക്ഷയിലാണ് ഇയാളെ ആശുപത്രിയിലെത്തിച്ചത്. ഉടന്‍ തന്നെ സംഘം അവിടെ നിന്ന് മുങ്ങി.

ആശുപത്രിയില്‍ വച്ചാണ് സവാഹിര്‍ മരിച്ചത്. ചാവക്കാട് പോസീസ് കേസെടുത്തിട്ടുണ്ട്. സദാചാര ഗുണ്കളാണ് ആക്രമണത്തിന് പിന്നിലെന്ന് തന്നെയാണ് പോലീസിന്റേയും സംശയം. മൃതദേഹം മുതുവട്ടൂര്‍ രാജാ ആശുപത്രിയിലെ മോര്‍ച്ചറിയിലാണ് ഉള്ളത്. സവാഹിര്‍ നേരത്തെ രണ്ട പിടിച്ചുപറി കേസുകളില്‍ പ്രതിയായിരുന്നു.

English summary

Again moral police attack: Youth killed at Chavakkad