ശബരിമലയില് ഒരു യുവതി കൂടി എത്തി..... ദൃശ്യങ്ങള് പുറത്ത് വിട്ട് ഓണ്ലൈന് കൂട്ടായ്മ
കൊല്ലം: ഒരു യുവതി കൂടി ശബരിമലയില് പ്രവേശിച്ചെന്ന് അവകാശവാദവുമായി ഫേസ്ബുക്ക് കൂട്ടായ്മ. കൊല്ലം ചാത്തന്നൂര് സ്വദേശിനി മഞ്ജു ശബരിമലയില് എത്തിയെന്നാണ് അവകാശവാദം. ഓണ്ലൈന് കൂട്ടായ്മയായ നവോത്ഥാന കേരളം ശബരിമലയിലേക്ക് എന്ന ഫേസ്ബുക്ക് ഗ്രൂപ്പിലാണ് വെളിപ്പെടുത്തല്. ശബരിമലയില് യുവതി പ്രവേശിക്കുന്ന ദൃശ്യങ്ങളും ഇവര് പുറത്തുവിട്ടിട്ടുണ്ട്. വേഷം മാറിയാണ് ഇവര് എത്തിയതെന്നാണ് സൂചന. മഞ്ജു സന്നിധാനത്ത് നില്ക്കുന്നതിന്റെ ദൃശ്യങ്ങള് വീഡിയോയില് ഉണ്ട്. പോലീസ് സുരക്ഷയില്ലായിരുന്നുവെന്നാണ് ഇവര് വ്യക്തമാക്കുന്നത്. മഞ്ജു ഇതിന് മുമ്പും ശബരിമല ദര്ശനം നടത്താന് ആഗ്രഹം അറിയിച്ച് രംഗത്തെത്തിയിരുന്നു.
മഞ്ജു മുടി നരപ്പിച്ച് വേഷം മാറിയാണ് ദര്ശനം നടത്തിയതെന്നാണ് സൂചന. അതേസമയം ഇക്കാര്യം പോലീസോ ദേവസ്വം ബോര്ഡോ ഇതുവരെ സ്ഥിരീകരിച്ചിട്ടില്ല. പ്രതിഷേധം ഭയന്നാവാം വേഷംമാറി എത്തിയതെന്നാണ് സൂചന. പൊതു പണിമുടക്ക് ദിവസം തിരക്ക് കുറവുള്ള അവസരം കണക്കിലെടുത്താണ് ഇവര് വേഷം മാറി എത്തിയത്. പമ്പ മുതല്സന്നിധാനം വരെ അറുപതോളം പ്രവര്ത്തകരെ സംഘപരിവാര് നിര്ത്തിയിട്ടുണ്ടെന്ന് കഴിഞ്ഞ ദിവസം സ്പെഷ്യല് ബ്രാഞ്ച് റിപ്പോര്ട്ട് നല്കിയിരുന്നു. പതിനെട്ടാംപടി കയറി ദര്ശനം നടത്തിയെന്നാണ് മഞ്ജു അവകാശപ്പെടുന്നത്. നേരത്തെ മലകയറാന് എത്തിയതിനെ തുടര്ന്ന് ഇവരുടെ വീടിന് നേരെ ആക്രമണമുണ്ടായിരുന്നു.
36കാരി ദളിത് യുവതി പതിനെട്ടാം പടി ചവിട്ടി സന്നിധാനത്ത്, അവകാശവാദവുമായി ഫേസ്ബുക്ക് കൂട്ടായ്മ