ബാലനല്ല, ഐഷ പോറ്റി... എല്‍ഡിഎഫിന്റെ സ്പീക്കര്‍ സ്ഥാനാര്‍ത്ഥി

തിരുവനന്തപുരം: ജി കാര്‍ത്തികേയന്റെ ആകസ്മിക മരണത്തെത്തുടര്‍ന്ന് നിയമസഭ സ്പീക്കര്‍ തിരഞ്ഞെടുപ്പിനാണ് കളമൊരുങ്ങിയിരിക്കുന്നത്. പതിവില്‍ നിന്ന് വ്യത്യസ്തമായി യുഡിഎഫില്‍ ഇത്തവണ സ്ഥാനാര്‍ത്ഥിയെ സംബന്ധിച്ച് ആശയക്കുഴപ്പമൊന്നും ഉണ്ടായില്ല. എന്നാല്‍ എല്‍ഡിഎഫില്‍ ചെറിയ ആശയക്കുഴപ്പം ഉണ്ടാവുകയും ചെയ്തു.

നിലവിലെ ഡെപ്യൂട്ടി സ്പീക്കര്‍ എന്‍ ശക്തനെ സ്പീക്കര്‍ ആക്കാനാണ് കോണ്‍ഗ്രസിന്റെ തീരുമാനം. മത്സരിക്കാനായി എന്‍ ശക്തന്‍ ഡെപ്യൂട്ടി സ്പീക്കര്‍ സ്ഥാനം രാജിവച്ചു.

മുന്‍ മന്ത്രി എകെ ബാലനെ സ്ഥാനാര്‍ത്ഥിയാക്കാനായിരുന്നു എല്‍ഡിഎഫ് ആദ്യം തീരുമാനിച്ചിരുന്നത്. കഴിഞ്ഞ ദിവസം ഇത് സംബന്ധിച്ച് വാര്‍ത്തകളും പുറത്ത് വന്നിരുന്നു. എന്നാല്‍ ഫെബ്രുവരി 10 ന് രാത്രിയോടെ ചേര്‍ന്ന എല്‍ഡിഎഫ് നിയമസഭ കക്ഷിയോഗം ഐഷ പോറ്റിയെ സ്ഥാനാര്‍ത്ഥിയാക്കാന്‍ തീരുമാനിക്കുകയായിരുന്നു.കൊട്ടാരക്കര എംഎല്‍എ ആണ് ഐഷ പോറ്റി.

എന്നാല്‍ എല്‍ഡിഎഫിന് വലിയ വിജയ പ്രതീക്ഷയൊന്നും ഇല്ല. ആര്‍എസ്പി കൂടി മുന്നണി വിട്ടതോടെ എല്‍ഡിഫിന് 65 സീറ്റുകളാണ് ഉള്ളത്. കാര്‍ത്തികേയന്റെ മരണത്തെത്തുടര്‍ന്ന് ഒരു സീറ്റ് കുറഞ്ഞെങ്കിലും യുഡിഎഫിന് 74 സീറ്റുകളുണ്ട്.

ഇടഞ്ഞ് നില്‍ക്കുന്ന കേരള കോണ്‍ഗ്രസ് ബി എംഎല്‍എ ഗണേഷ് കുമാര്‍ യുഡിഎഫിന് വോട്ട് ചെയ്യില്ലെന്ന് വ്യക്തമാക്കിയിട്ടുണ്ട്. അപ്പേഴും യുഡിഎഫിന് 73 സീറ്റുകളുണ്ടാകും.

English summary

Aisha Potti is LDF's Speaker candidate