തമ്മില് തല്ലിയാല് പ്രതിപക്ഷത്ത് ഇരിയ്ക്കേണ്ടി വരുമെന്ന്; എകെ ആന്റണി
ദില്ലി: കോണ്ഗ്രസ് നേതാക്കള്ക്ക് മുന്നറിയിപ്പുമായി എകെ ആന്റണി. തമ്മില് തല്ലിയാല് പ്രതിപക്ഷത്ത് ഇരിയ്ക്കേണ്ടി വരുമെന്ന് കോണ്ഗ്രസ് നേതാക്കളും അണികളും മനസിലാക്കണമെന്ന് മുതിര്ന്ന കോണ്ഗ്രസ് നേതാവ് എകെ ആന്റണി. ഒരു ചാനലിന് നല്കിയ അഭിമുഖത്തിലാണ് ആന്റണി ഇക്കാര്യം പറഞ്ഞത്.
പാര്ട്ടിയിലെ പരസ്യ പ്രസ്താവനകളും വിവാദങ്ങളും അവസാനിയ്ക്കാത്തതില് ഹൈക്കമാന്ഡ് അതൃപ്തി രേഖപ്പെടുത്തിയതിന് പിന്നാലെയാണ് ആന്റണിയുടെ പ്രതികരണം. തിരഞ്ഞെടുപ്പില് കോണ്ഗ്രസ് തോല്ക്കാന് പാടില്ലെന്ന മനസോടെ പ്രവര്ത്തിയ്ക്കുകയാണ് വേണ്ടതെന്നും മറ്റു കാര്യങ്ങള് തിരഞ്ഞെടുപ്പിന് ശേഷമാണ് തീരുമാനിയ്ക്കേണ്ടതെന്നും ആന്റണി.
ഐക്യവും നല്ല സ്ഥാനാര്ത്ഥികളുമാണ് കോണ്ഗ്രസിന്റെ വിജയമന്ത്രം. കെട്ടിപ്പിടിച്ച് ഫോട്ടോയെടുത്താല് ഐക്യമുണ്ടാവില്ലെന്നും ആന്റണി പറഞ്ഞു. ചിഹ്നം മാത്രം നോക്കി വോട്ട് ചെയ്യുന്ന കാലം കഴിഞ്ഞു. സ്ഥാനാര്ത്ഥിയാണ് ഇന്ന് പ്രധാനം. ഒരു കുടുംബത്തിലുള്ളവര് പോലും പല സ്ഥാനാര്ത്ഥികള്ക്ക് വോട്ട് ചെയ്യുന്ന കാലമാണിത്.