പത്തില്‍ മാത്രമല്ല, ഒന്നിലും കണക്ക് തെറ്റി! കുഴപ്പിച്ചത് സുബ്ബുവും ജഗ്ഗുവും പിന്നെ രങ്കനും...

ഒന്നാം ക്ലാസ് ഇംഗ്ലീഷ് മീഡിയം വിദ്യാര്‍ത്ഥികള്‍ക്ക് നല്‍കിയ കണക്ക് പരീക്ഷയുടെ ചോദ്യപേപ്പറിലാണ് തെറ്റുകള്‍ കടന്നുകൂടിയത്.

Published: Thursday, March 30, 2017, 17:08 [IST]

തിരുവനന്തപുരം: ചോദ്യപേപ്പര്‍ ചോര്‍ച്ചയെ തുടര്‍ന്ന് റദ്ദ് ചെയ്ത എസ്എസ്എല്‍സി പരീക്ഷ വീണ്ടും നടത്തിയതിന് പിന്നാലെ ഒന്നാം ക്ലാസിലെ കണക്ക് പരീക്ഷ ചോദ്യപേപ്പറിലും പിശകെന്ന് ആക്ഷേപം. ഒന്നാം ക്ലാസ് ഇംഗ്ലീഷ് മീഡിയം വിദ്യാര്‍ത്ഥികള്‍ക്ക് നല്‍കിയ കണക്ക് പരീക്ഷയുടെ ചോദ്യപേപ്പറിലാണ് തെറ്റുകള്‍ കടന്നുകൂടിയത്.

ആപ്പിളുകളുടെ എണ്ണത്തിന് പകരം സുബ്ബു, ജഗ്ഗു, രങ്കന്‍ എന്നീ പേരുകളാണ് ഇംഗ്ലീഷ് മീഡിയം വിദ്യാര്‍ത്ഥികളുടെ ചോദ്യപേപ്പറിലുണ്ടായിരുന്നത്. എന്നാല്‍ മലയാളം മീഡിയം വിദ്യാര്‍ത്ഥികളുടെ ചോദ്യപേപ്പറില്‍ ആപ്പിളുകളുടെ എണ്ണവും, അളുകളുടെ പേരുകളുമെല്ലാം ശരിയായിരുന്നു. ആപ്പിളിന്റെ സ്ഥാനത്ത് സുബ്ബുവിനെയും ജഗ്ഗുവിനെയും രങ്കനെയും കണ്ട വിദ്യാര്‍ത്ഥികള്‍ അന്തംവിട്ടിരുന്നു.

എസ്എസ്എല്‍സി, പ്ലസ് വണ്‍ പരീക്ഷകളിലെ ചോദ്യം തയ്യാറാക്കുന്നതിലെ അപാകതയെ സംബന്ധിച്ച് ആക്ഷേപങ്ങളുയരുന്നതിനിടെയാണ് ഒന്നാം ക്ലാസ് പരീക്ഷയില്‍ വരെ തെറ്റുകള്‍ കടന്നുകൂടിയതായി കണ്ടെത്തിയിരിക്കുന്നത്. നിസ്സാരമായ അച്ചടിപിശകെന്ന് പറഞ്ഞ് വിദ്യാഭ്യാസ വകുപ്പിന് കൈയൊഴിയാമെങ്കിലും, പരീക്ഷയെ എത്ര ലാഘവത്തോടെയാണ് വിദ്യാഭ്യാസ വകുപ്പ് കാണുന്നതെന്നതിന് തെളിവാണിത്.

Published On March 30, 2017