മമ്മൂട്ടിക്കെതിരെ കണ്ണന്താനം; താന്‍ മോഹന്‍ലാലിനെ മാത്രം കണ്ടതിന്‍റെ ഹുങ്കോ, ആ പരാമര്‍‍ശം അപക്വം

കൊച്ചി: എറണാകുളം മണ്ഡലത്തിലെ ഇടത്-വലത് മുന്നണിസ്ഥാനാര്‍ത്ഥികളെ കുറിച്ച് നടന്‍ മമ്മൂട്ടി നടത്തിയ പരാമര്‍ശം അപക്വമെന്ന് കേന്ദ്രമന്ത്രിയും ബിജെപി സ്ഥാനാര്‍ത്ഥിയുമായ അല്‍ഫോണ്‍സ് കണ്ണന്താനം. യുഡിഎഫിന്‍റെയും എല്‍ഡിഎഫിന്‍റെയും സ്ഥാനാര്‍ത്ഥികള്‍ മികച്ചതാണെന്നായിരുന്നു വോട്ട് രേഖപ്പെടുത്തിയ ശേഷം മമ്മൂട്ടി അഭിപ്രായപ്പെട്ടത്.

മമ്മൂട്ടിയുടെ ഈ പരാമര്‍ശംഅപക്വമാണെന്നും അദ്ദേഹത്തെപ്പോലൊരു മുതിര്‍ന്ന താരം ഇങ്ങനെ പറയാന്‍ പാടില്ലായിരുന്നെന്നും അല്‍ഫോണ്‍ കണ്ണന്താനം പറഞ്ഞു. താന്‍ മോഹന്‍ലാലിനെ മാത്രം കണ്ടതിന്‍റെ ഹുങ്ക് ആയിരിക്കാം മമ്മൂട്ടിയുടെ ഈ പരാമര്‍ശനത്തിന് പിന്നിലെന്നും അദ്ദേഹം കൂട്ടിച്ചേര്‍ത്തു.

പനമ്പിള്ളി നഗര്‍ ഗവ. ഗേള്‍സ് ഹയര്‍ സെക്കന്‍ഡറി സ്കൂളിലെ 105 ആം നമ്പര്‍ ബൂത്തില്‍ ഭാര്യ സുള്‍ഫത്തിനൊപ്പം വോട്ട് രേഖപ്പെടുത്തിയതിന് ശേഷമായിരുന്നു ഇടത്-വലത് മുന്നണി സ്ഥാനാര്‍ത്ഥികളെക്കുറിച്ചുള്ള മമ്മൂട്ടിയുടെ പരാമര്‍‍ശം.

രണ്ട് മുന്നണി സ്ഥാനാര്‍ത്ഥികളും മികച്ചതെന്ന് അഭിപ്രായപ്പെട്ട മമ്മൂട്ടി ആരും വോട്ട് പാഴാക്കരുതെന്നും നിര്‍ദ്ദേശിച്ചു. ഇടത് സ്ഥാനാര്‍ത്ഥിയായ പി രാജീവും യുഡിഎഫ് സ്ഥാനാര്‍ത്ഥിയായ ഹൈബി ഈഡനും മമ്മൂട്ടിക്കൊപ്പമുണ്ടായിരുന്നു.

English summary

Alphons Kannanthanam against mammootty