വിവാദം; വിശദീകരണം വേണമെന്ന് 'അമ്മ'

തൃശ്ശൂര്‍: കൊച്ചി- ഹൈദരബാദ് വിമാനത്തില്‍ ബഹളമുണ്ടാക്കിയ സംഭവത്തില്‍ അമ്മ കേരള സ്‌ട്രൈക്കേഴ്‌സ് ക്രിക്കറ്റ് ടീമിനോട് വിശദീകരണം ചോദിക്കുമെന്ന് അമ്മയുെട പ്രസിഡന്റ് ഇന്നസെന്റ്. യാത്രകാര്‍ക്ക് പ്രയാസുണ്ടാകുന്ന തരത്തില്‍ ടീമിന്റെ ഭാഗത്തുനിന്ന് ഒരു പെരുമാറ്റമുണ്ടായെങ്കില്‍ അത് നിര്‍ഭാഗ്യകരമെന്ന് അദ്ദേഹം പറഞ്ഞു.

രോഗികളും അടിയന്തര സാഹചര്യത്തുല്‍ എത്തിപ്പെടേണ്ടതുമായ ധാരാളം പേര്‍ വിമാനത്തിലുണ്ടാകും. അമ്മ അംഗങ്ങള്‍ കാരണം അവര്‍ക്ക് ബുദ്ധിമുട്ടുണ്ടായെങ്കില്‍ അത് വേദനാ ജനകമാണെന്നും അതിന് ടീമിനോട് വിശദീകരണം ചോദിക്കുമെന്നും ഇന്നസെന്റ് പറഞ്ഞു. മറിച്ച് വിമാനത്തിലെ ഉദ്യോഗസ്ഥരുടെ പിടിവാശി മൂലമാണ് ഇത്തരമൊരു സംഭവമുണ്ടാതെങ്കില്‍ അവര്‍ക്കെതിരെ നിയമ നടപടി സ്വീകരിക്കാനും അമ്മ മടിക്കില്ലെന്ന് അദ്ദേഹം വ്യക്തമാക്കി.

പെരുമാറ്റത്തില്‍ നിയന്ത്രണമുള്ള സ്ഥലത്ത് അത് പാലിക്കാന്‍ എല്ലാവരും നിര്‍ബന്ധിതരാണ്. നടീ - നടന്മാരെ പോലെ ആളുകള്‍ ശ്രദ്ധിക്കുന്നവര്‍ കൂടുതല്‍ കരുതലോടെ പെരുമാറണം. എന്നാല്‍ അവര്‍ ഒരു തെറ്റ് ചെയ്തിട്ടുണ്ടെങ്കില്‍ പോലും പൊതു സ്ഥലത്ത് അപമാനിക്കാന്‍ വിമാനക്കമ്പനിക്ക് അവകാശമില്ല. അത് ഉണ്ടായി എന്ന് മനസ്സിലായാല്‍ അമ്മ ശക്തമായി പ്രതികരിക്കും- ഇന്നസെന്റ് പറഞ്ഞു.

കൊച്ചി - ഹൈദരാബാദ് എന്റിഗോ എയര്‍ലൈന്‍സില്‍ യാത്ര ചെയ്യവെ ബഹളമുണ്ടാക്കിയതിനെ തുടര്‍ന്ന് അമ്മ കേരള സ്‌ട്രൈക്കേഴ്‌സ് ക്രിക്കറ്റ് ടീമിനെ വിമാന അധികൃതര്‍ കൊച്ചിയില്‍ നിര്‍ബന്ധപൂര്‍വ്വം ഇറക്കിവിട്ടിരുന്നു. സംഘടനയുടെ അച്ചടക്കം സംഘടനയ്ക്കകത്തെന്ന പോലെ പുറത്തും പാലിക്കുന്നുണ്ടെന്ന് ഉറപ്പുവരുത്താന്‍ അമ്മയ്ക്ക് ബാധ്യതയുണ്ട്. പ്രത്യേകിച്ച് സംഘത്തോടൊപ്പം യാത്ര ചെയ്യുമ്പോള്‍. അവരുടെ വ്യക്തിപരമായ യാത്രകളില്‍ പെരുമാറ്റമെന്തണെന്ന് അമ്മ അന്വേഷിക്കാറില്ലെന്ന് ഇന്നസെന്റ് പറഞ്ഞു.

English summary

Kerala Strikers team members evacuated from aeroplane: Amma will seek explanation said Innocent.