ഇനിയും പറ്റിയ്ക്കപ്പെടാന് മലയാളിയുടെ ജന്മം ബാക്കി? ഇതെന്തൊരു തട്ടിപ്പ് അല്ല പറ്റിപ്പ്?
മരട്: ചിട്ടി തട്ടിപ്പും, സോളാര് തട്ടിപ്പും, വീസ തട്ടിപ്പും, നഴ്സിംഗ് തട്ടിപ്പും എന്ന് വേണ്ട ഒട്ടുമിക്ക തട്ടിപ്പും കണ്ടും കേട്ടും അനുഭവിച്ചും അറിഞ്ഞവരാണ് മലയാളികള്. ഓരോ തട്ടിപ്പും പുറത്ത് വരുമ്പോള് ഇത് അവസാനത്തേത് ആകുമെന്നാണ് പ്രതീക്ഷ. എന്നാല് കാര്യങ്ങള് അങ്ങനെയൊന്നും ഇല്ല കേട്ടോ. കോട്ടയം, എറണാകുളം ഇടുക്കി ജില്ലകളില് നിന്ന് പുതിയൊരു ചിട്ടിതട്ടിപ്പ് കഥ പുറത്ത് വരുന്നു .
അമൃതശ്രീ ചിട്ടിതട്ടിപ്പാണ് തട്ടിപ്പ് കേസുകളില് ഏറ്റവും പുതിയത് . കേസില് പ്രധാന പ്രതിയും തട്ടിപ്പ് കമ്പനി ഉടമയുമായ ശിവദാസിനെ കൊച്ചി പൊലീസ് പിടികൂടി. ഒരു മാസത്തോളമായി ചിട്ടിക്കമ്പിനിയ്ക്കെതിരെ പരാതി ഉയരാന് തുടങ്ങിയിട്ട് .
ഇടപാടുകാര്ക്ക് നല്കേണ്ട പണം നല്കാതെ തൊടുപുഴയിലെ ഓഫീസ് പൂട്ടിയതോടെയാണ് പ്രശ്നങ്ങള് ആരംഭിച്ചത് . 50 കോടിയലധികം രൂപ ഇടപാടുകാര്ക്ക് നല്കാനുണ്ടെന്നാണ് റിപ്പോര്ട്ട് . മരട് പൊലീസില് തന്നെ കമ്പനിയ്ക്കെതിരെ 1200 ല് അധികം പരാതികളാണ് ലഭിച്ചത് . താനല്ല ജീവനക്കാരാണ് കമ്പനി പൂട്ടിപ്പോകാന് കാരണമെന്ന് ശിവാദാസ് പത്രക്കുറിപ്പ് പുറത്തിറക്കിയിരുന്നു .