ഐസിസിലെ മലപ്പുറംകാരന്‍... ഞെട്ടിപ്പിയ്ക്കുന്ന വിവരങ്ങള്‍

Published: Wednesday, September 2, 2015, 10:38 [IST]

മലപ്പുറം: പാലക്കാട് ജില്ലയിലെ മാധ്യമ പ്രവര്‍ത്തകന്‍ ഐസിസില്‍ ചേര്‍ന്നതിന് പിറകേ ഞെട്ടിപ്പിയ്ക്കുന്ന വാര്‍ത്തയാണ് മലപ്പുറത്ത് നിന്ന് വരുന്നത്. ഐസിസ് ബന്ധത്തിന്റെ പേരില്‍ ഒരാളെ റോയും രഹസ്യാന്വേഷണ ഏജന്‍സിയും അറസ്റ്റ് ചെയ്തിരിയ്ക്കുന്നു.

ഐസിസിലേയ്ക്ക് ആളുകളെ റിക്രൂട്ട് ചെയ്യുന്ന അഞ്ച് പേര്‍ മലപ്പുറത്ത് നിരീക്ഷണത്തിലാണെന്നും സ്ഥിരീകരിയ്ക്കാത്ത റിപ്പോര്‍ട്ടുകളുണ്ട്. കേരളത്തില്‍ നിന്ന് മെഡിക്കല്‍ പ്രൊഫഷണലുകളെയാണ് ഐസിസ് ലക്ഷ്യമിടുന്നതെന്ന് നേരത്തേ റിപ്പോര്‍ട്ടുകളുണ്ടായിരുന്നു.

പാലക്കാട് പുതുപ്പരിയാരം സ്വദേശിയും മാധ്യമ പ്രവര്‍ത്തകനും ആയ അബു താഹിര്‍ സിറിയയില്‍ ഐസിസിന്റെ പോരാളിയാണെന്ന് സ്ഥിരീകരിച്ചിട്ടുണ്ട്. ഇയാള്‍ പഠിച്ചത് മലപ്പുറം ജില്ലയില്‍ ആയിരുന്നു.

അറസ്റ്റ് വിമാനത്താവളത്തില്‍

കരിപ്പൂര്‍ വിമാനത്താവളത്തില്‍ വിമാനമിറങ്ങിയപ്പോഴാണ് തിരൂര്‍ ബിപി അങ്ങാടി സ്വദേശിയെ റോയും രഹസ്യാന്വേഷണ ഏജന്‍സിയും ചേര്‍ന്ന് പിടികൂടുന്നത്.

23 കാരന്‍

23 വയസ്സ് മാത്രമാണ് ഇയാളുടെ പ്രായം എന്നാണ് സ്ഥിരീകരിയ്ക്കാത്ത റിപ്പോര്‍ട്ട്.

ഗള്‍ഫില്‍ എവിടെ?

ഗള്‍ഫില്‍ ഇയാള്‍ എവിടെയായിരുന്നു എന്ന കാര്യത്തില്‍ ഇപ്പോഴും ഏജന്‍സികള്‍ വിവരങ്ങളൊന്നും പുറത്ത് വിടുന്നില്ല. സൗദിയിലായിരുന്നുവെന്നും, അബുദാബിയിലായിരുന്നുവെന്നും ദുബായിലായിരുന്നുവെന്നും റിപ്പോര്‍ട്ടുകളുണ്ട്.

അഞ്ച് വര്‍ഷം മുമ്പ്

അഞ്ച് വര്‍ഷം മുമ്പാണ് ഇയാള്‍ വിദേശത്തേയ്ക്ക് പോയത്. അവിടെ നിന്ന് ഇയാള്‍ക്ക് മതവിദ്യാഭ്യാസം ലഭിച്ചതായും റിപ്പോര്‍ട്ടുകളുണ്ട്.

സിറിയയില്‍

സൗദി അറേബ്യയില്‍ നിന്ന് ഇയാള്‍ സിറിയയിലേയ്ക്ക് പോയിരുന്നതായും പറയപ്പെടുന്നു. ഇക്കാലത്താണ് ഐസിസുമായി ബന്ധപ്പെടുന്നത് എന്നാണ് വിവരം.

സോഷ്യല്‍ മീഡിയ

ഇയാളുടെ സോഷ്യല്‍ മീഡിയ ഇടപെടലുകള്‍ ഏറെ നാളായി രഹസ്യാന്വേഷണ ഏജന്‍സികള്‍ നിരീക്ഷിച്ച് വരികയായിരുന്നു. അതില്‍ നിന്നാണ് നിര്‍ണായക വിവരങ്ങള്‍ ലഭിച്ചതെന്നാണ് സൂചന.