സുപ്രീംകോടതി വരെ പോകുമെന്ന് അന്സിബ; ഹൈക്കോടതിയിലേക്ക് എന്ന് ലക്ഷ്മിപ്രിയ, ഇടപെടാതെ അമ്മ
കൊച്ചി: താരസംഘടനയായ അമ്മയിലെ പോര് മൂര്ഛിക്കുന്നു. ഭാരവാഹികള് പരസ്പരം പോലിസില് പരാതി നല്കുമ്പോഴും ഇടപെടാതെ സംഘടനാ നേതൃത്വം. അന്സിബ നല്കിയ പരാതിയില് കഴമ്പില്ലെന്ന് തൃക്കാക്കര എസിപി കൊച്ചി സിറ്റി പോലീസ് കമ്മീഷണര്ക്ക് റിപ്പോര്ട്ട് നല്കി എന്ന വിവരം വന്ന പിന്നാലെയാണ് പിന്നോട്ടില്ലെന്ന് അന്സിബ വ്യക്തമാക്കിയത്. തന്റെ മൗലികാവകാശ ലംഘനത്തിനെതിരെ സുപ്രീംകോടതി വരെ പോകുമെന്നും അവര് പറഞ്ഞു.
അതേസമയം, ലക്ഷ്മിപ്രിയ ഹൈക്കോടതിയെ സമീപിക്കുമെന്ന് മാധ്യമങ്ങളോട് പറഞ്ഞു. താന് അന്സിബക്കെതിരെ നല്കിയ പരാതിയില് വലിയ കാര്യമുണ്ടായിരുന്നില്ലെന്നും അവര് പറയുന്നു. തന്നെ പറ്റി വളരെ മോശമായ കാര്യങ്ങളാണ് അന്സിബ മാധ്യമങ്ങളോട് പറഞ്ഞത്. അപകീര്ത്തിപ്പെടുത്തിയതിന് 10 കോടി രൂപ നഷ്ടപരിഹാരം ആവശ്യപ്പെട്ട് നാളെ ഹൈക്കോടതിയെ സമീപിക്കുമെന്നും ലക്ഷ്മിപ്രിയ പറഞ്ഞു.
ലക്ഷ്മിപ്രിയ ദുബായില് പോയതുമായി ബന്ധപ്പെട്ട് അന്സിബ അയച്ച വാട്സാപ്പ് സന്ദേശമാണ് വിവാദങ്ങളുടെ തുടക്കം. 'ദുബായില് പോയിരുന്നല്ലേ, തന്റെ സുഹൃത്ത് കണ്ടതായി പറഞ്ഞു' എന്ന മട്ടില് ഒരു സന്ദേശമാണ് അന്സിബ അയച്ചത്. ഇത് തന്റെ കുടുംബത്തില് പ്രശ്നമായി എന്ന് ലക്ഷ്മിപ്രിയ പറയുന്നു. ഇക്കാര്യം ചൂണ്ടിക്കാട്ടിയാണ് ലക്ഷ്മിപ്രിയ തൃക്കാക്കര വനിതാ സെല്ലില് പരാതി നല്കിയത്.
താന് സന്ദേശം അയച്ചത് വളരെ മുമ്പാണ്. ഇപ്പോള് പരാതി നല്കാന് മറ്റു ചില കാരണങ്ങള് ഉണ്ടാകാം എന്ന് അന്സിബ പറയുന്നു. തന്റെ സന്ദേശത്തില് മോശമായി ഒന്നുമില്ലായിരുന്നു. അമ്മയിലെ തര്ക്കത്തിന്റെ ഭാഗമാണ് ഈ പരാതി എന്നും അന്സിബ സംശയിക്കുന്നു. തൃക്കാക്കര വനിതാ പോലീസ് സ്റ്റേഷനില് മണിക്കൂറുകളോളം എസ്ഐ, ലക്ഷ്മി പ്രിയ, അവരുടെ ഭര്ത്താവ് എന്നിവര് ചോദ്യം ചെയ്തുവെന്നും ഹറാസ് ചെയ്തുവെന്നും അന്സിബ പോലീസില് നല്കിയ പാരതിയില് പറയുന്നു.
ലക്ഷ്മിപ്രിയയുടെയും അന്സിബയുടെയും പരാതിയില് കഴമ്പില്ല എന്നാണ് തൃക്കാക്കര എസിപി സിറ്റി പോലീസ് കമ്മീഷണര്ക്ക് റിപ്പോര്ട്ട് നല്കിയതത്രെ. കഴമ്പില്ലാത്ത പരാതിയിലാണോ തന്നെ മണിക്കൂറുകളോളം ചോദ്യം ചെയ്തതും മാപ്പ് എഴുതി ഒപ്പുവയ്പ്പിച്ചതും എന്ന് അന്സിബ ചോദിക്കുന്നു. ഈ വിഷയത്തില് തനിക്ക് നീതി കിട്ടിയില്ല. ടിനി ടോമിനെതിരായ പരാതിയിലും നീതി ലഭിക്കുമെന്ന് പ്രതീക്ഷയില്ലെന്നും സുപ്രിംകോടതി വരെ പോകാനും താന് തയ്യാറാണെന്നും അന്സിബ മാധ്യമങ്ങളോട് പറഞ്ഞു.
അന്സിബ തന്നെ മോശമാക്കി ചിത്രീകരിച്ചു. 10 കോടി രൂപ നഷ്ടപരിഹാരം ആവശ്യപ്പെട്ട് നാളെ അഡ്വ. കൃഷ്ണരാജ് മുഖേന ഹൈക്കോടതിയില് ഹര്ജി നല്കുമെന്നും ലക്ഷ്മിപ്രിയ മാധ്യമങ്ങളോട് പറഞ്ഞു. വെണ്ണല ശിവക്ഷേത്രത്തിന്റെ സ്പോണ്സറിങ് സ്വീകരിച്ചത് അന്സിബ എതിര്ത്തിരുന്നു. അവര്ക്ക് പിന്നില് വര്ഗീയ ശക്തികളുണ്ടെന്ന് സംശയിക്കുന്നു എന്നും ലക്ഷ്മിപ്രിയ പറയുന്നു.
വിഷയത്തില് ഇടപെടാന് സാധിക്കില്ല എന്നാണ് അമ്മ പ്രസിഡന്റ് ശ്വേത മേനോന് തന്നോട് പറഞ്ഞത് എന്ന് അന്സിബ നേരത്തെ വെളിപ്പെടുത്തിയിരുന്നു. രണ്ട് ഭാരവാഹികള് തമ്മിലുള്ള വിഷയത്തില് താരസംഘടന ഇടപെടാത്തതാണ് രംഗം ഇത്രയും വഷളാക്കിയത് എന്ന വിമര്ശനവുമുണ്ട്. അന്സിബയുടെ പരാതി പരിശോധിക്കാന് അഞ്ചംഗ സമിതിയെ അമ്മ നിയോഗിച്ചിട്ടുണ്ട്. സമിതി അംഗങ്ങളില് ആരോപണ വിധേയരുമുണ്ടെന്നും ആ സമിതിക്ക് മുമ്പാകെ താന് പോകില്ലെന്നും അന്സിബ വ്യക്തമാക്കി.
Click it and Unblock the Notifications
Sign in with Google