പിണറായിയുടെ ദാസ്യപ്പണി ചെയ്യുന്നു; ബിജെപിയുടെ വിമര്‍ശനത്തിന് കളക്ടര്‍ അനുപമയുടെ മറുപടി ഇങ്ങനെ

തൃശൂര്‍: തിരഞ്ഞെടുപ്പ് പ്രചാരണത്തിനിടെ ശബരിമല അയ്യപ്പന്റെ പേര് പരാമര്‍ശിച്ചതാണ് തൃശൂരിലെ ബിജെപി സ്ഥാനാര്‍ഥി സുരേഷ് ഗോപിക്ക് വിനയായത്. സംഭവത്തില്‍ ജില്ലാ തിരഞ്ഞെടുപ്പ് ഓഫീസര്‍ കൂടിയായ കളക്ടര്‍ അനുപമ വിശദീകരണം തേടുകയായിരുന്നു. 48 മണിക്കൂറിനകം മറുപടി നല്‍കണമെന്നാണ് സുരേഷ് ഗോപിയോട് കളക്ടര്‍ ആവശ്യപ്പെട്ടിരിക്കുന്നത്.

പാര്‍ട്ടിയുമായി ആലോചിച്ച് മറുപടി നല്‍കുമെന്ന് പറഞ്ഞ സുരേഷ് ഗോപി ഇഷ്ട ദൈവത്തിന്റെ പേര് പറയാന്‍ സാധിക്കാത്തത് ഭക്ടരുടെ ഗതികേടാണെന്നും പ്രതികരിച്ചു. ബിജെപി വളരെ രൂക്ഷമായിട്ടാണ് കളക്ടര്‍ക്കെതിരെ രംഗത്തുവന്നത്.

പിണറായിയുടെ ദാസ്യപ്പണി ചെയ്യുകയാണ് എന്നാണ് ബിജെപി വിമര്‍ശിച്ചത്. എന്നാല്‍ ഇതിനോട് പ്രതികരിക്കാനില്ലെന്നും താന്‍ തന്റെ ജോലി മാത്രമാണ് ചെയ്യുന്നതെന്നും അനുപമ മാധ്യമങ്ങളോട് പറഞ്ഞു.

അനുപമക്കെതിരെ രൂക്ഷ വിമര്‍ശനവുമായി രംഗത്തുവന്നത് ബിജെപി നേതാവ് ബി ഗോപാലകൃഷ്ണനാണ്. മുഖ്യമന്ത്രി പിണറായി വിജയന്റെ ദാസ്യപ്പണിയാണ് കളക്ടര്‍ ചെയ്യുന്നതെന്നായിരുന്നു വിമര്‍ശനം. കളക്ടറുടെ നടപടി വിവരക്കേടാണ്. സുരേഷ് ഗോപിയുടെ പ്രസംഗം കളക്ടര്‍ മനസിലാക്കിയിട്ടില്ല. പെരുമാറ്റ ചട്ടം എന്താണെന്ന് കളക്ടര്‍ പഠിക്കണം. പ്രശസ്തി നേടാനുള്ള ശ്രമമാണ് കളക്ടര്‍ നടത്തുന്നത്. വനിതാ മതിലില്‍ പങ്കെടുത്ത ആളാണ് കളക്ടറെന്നും ഗോപാലകൃഷ്ണന്‍ മാധ്യമങ്ങളോട് പറഞ്ഞു.

English summary

Anupama IAS Response to BJP Attack over Notice for Suresh Gopi