അരുവിക്കരയില് കണ്വെന്ഷനില് വിഎസ്സും പിണറായിയും ഇല്ല
തിരുവനന്തപുരം: അരുവിക്കര ഉപതെരഞ്ഞെടുപ്പുമായി ബന്ധപ്പെട്ട് ഇടതുമുന്നണി സംഘടിപ്പിച്ച തെരഞ്ഞെടുപ്പ് കണ്വെന്ഷനില് പ്രതിപക്ഷനേതാവ് വിഎസ് അച്യുതാനന്ദനും സി.പി.എം പോളിറ്റ് ബ്യൂറോ അംഗം പിണറായി വിജയനും പങ്കെടുക്കില്ല. സി.പി.എം ജില്ലാ കമ്മറ്റി പുറത്തിറക്കിയ വാര്ത്താ കുറിപ്പില് കണ്വെന്ഷനില് പങ്കെടുക്കുന്ന മറ്റു നേതാക്കളുടെ പേരുകള് നല്കിയിട്ടുണ്ട്.
സിപിഎം സംസ്ഥാന സെക്രട്ടറി കോടിയേരി ബാലകൃഷ്ണനാണ് പരിപാടി ഉദ്ഘാടനം ചെയ്യുക. നേരത്തെ വിഎസ് ഉദ്ഘാനം ചെയ്യപ്പെടുമെന്നായിരുന്നു കരുതപ്പെട്ടത്. എല്.ഡി.എഫ് ചെയര്മാനും പ്രതിപക്ഷ നേതാവുമായ വി.എസ് കണ്വന്ഷന് ഉദ്ഘാടനത്തിനെത്താത്തതിന്റെ കാരണം വ്യക്തമല്ല. പാര്ട്ടി വിലക്ക് മൂലമാണോ അതേ വിഎസ് സ്വയം ഒഴിവായതാണോയെന്നകാര്യവും ഇതുവരെ റിപ്പോര്ട്ട് ചെയ്യപ്പെട്ടിട്ടില്ല.
സിപിഎം സംസ്ഥാന സമ്മേളനത്തില് പാര്ട്ടിയുമായി പരസ്യയുദ്ധപ്രഖ്യാപനം നടത്തിയ വിഎസ് അതിനുശേഷം സംസ്ഥാന നേതൃത്വവുമായി അടുപ്പത്തിലല്ല. എന്നാല്, വിഎസ് തന്നെ അരുവിക്കര തെരഞ്ഞെടുപ്പ് പര്യടനം നയിക്കുമെന്നായിരുന്നു കടകമ്പള്ളി സുരേന്ദ്രന് അറിയിച്ചിരുന്നത്. കണ്വെന്ഷനില് വിഎസ് പങ്കെടുക്കാത്ത വിഷയം ഇതിനകം തന്നെ മാധ്യമങ്ങള് ഏറ്റെടുത്തിട്ടുണ്ട്.
അതേസമയം, കണ്വെന്ഷനില് മുഴുവന് ഘടകകക്ഷികളുടെ നേതാക്കളും പങ്കെടുക്കുന്നുണ്ട്. സി.പി.ഐ സംസ്ഥാന സെക്രട്ടറി കാനം രാജേന്ദ്രന്, സി ദിവാകരന്, മാത്യു.ടി തോമസ്, നീലലോഹിതദാസന് നാടാര്, ഉഴവൂര് വിജയന്, കടന്നപ്പള്ളി രാമചന്ദ്രന് എന്നിവര് പരിപാടിക്കെത്തും. യുഡിഎഫുമായി തെറ്റിപ്പിരിഞ്ഞ കേരള കോണ്ഗ്രസ് ബി വിഭാഗവും കണ്വെന്ഷനില് പങ്കെടുത്തേക്കും.