ആര്യ രാജേന്ദ്രൻ നിയമസഭയിലേക്ക്? കരുതലോടെ സിപിഎം, തദ്ദേശ തിരഞ്ഞെടുപ്പിൽ മത്സരിപ്പിച്ചേക്കില്ല

തിരുവനന്തപുരം: യുവ നേതാവിനെ മേയറാക്കി തിരുവനന്തപുരം നഗരസഭയില്‍ വിപ്ലവം സൃഷ്ടിച്ച സിപിഎം ഇത്തവണ ആര്യ രാജേന്ദ്രനെ കളത്തില്‍ ഇറക്കിയേക്കില്ല. ആര്യ രാജേന്ദ്രനെ സിപിഎം നിയമസഭാ തിരഞ്ഞെടുപ്പില്‍ മത്സരിച്ചേക്കും. പ്രായം കുറഞ്ഞ നഗരസഭാ മേയര്‍ എന്ന നിലയില്‍ രാജ്യത്തിന് അകത്തും പുറത്തും ശ്രദ്ധിക്കപ്പെട്ടതാണ് ആര്യ രാജേന്ദ്രന്‍. മേയര്‍ എന്ന നിലയ്ക്കുളള പ്രവര്‍ത്തനങ്ങളിലും മുന്‍ധാരണകളെ തിരുത്താന്‍ ആര്യയ്ക്ക് സാധിച്ചിട്ടുണ്ട്.

ഈ സാഹചര്യത്തില്‍ ആര്യ രാജേന്ദ്രനെ വീണ്ടും തദ്ദേശ തിരഞ്ഞെടുപ്പില്‍ ഇറക്കാതെ നിയമസഭയിലേക്ക് എത്തിക്കാനാണ് സിപിഎം ആലോചിക്കുന്നത്. മേയര്‍ സ്ഥാനത്തേക്ക് മുന്‍ എംഎല്‍എ കെഎസ് ശബരീനാഥനെ ആണ് കോണ്‍ഗ്രസ് മത്സരിപ്പിക്കാന്‍ ഇറക്കുന്നത്. സിപിഎമ്മില്‍ സ്ഥാനാര്‍ത്ഥി ചര്‍ച്ചകള്‍ പുരോഗമിക്കുകയാണ്.

വൈകാതെ തന്നെ തിരുവനന്തപുരം കോര്‍പറേഷനിലേക്കുളള സ്ഥാനാര്‍ത്ഥി പട്ടിക സിപിഎം പ്രഖ്യാപിച്ചേക്കും. ആര്യയ്ക്ക് പകരമായി രണ്ട് പേരുടെ പേരുകളാണ് സിപിഎമ്മിന് മുന്നില്‍ പ്രധാനമായും ഉളളത്. മുന്‍ മേയര്‍ കെ ശ്രീകുമാര്‍, ശിശുക്ഷേമ സമിതി മുന്‍ അധ്യക്ഷന്‍ എസ് പി ദീപക് എന്നിവര്‍ക്കാണ് സാധ്യത. അതേസമയം മുന്‍ എംപി എ സമ്പത്തിനേയും മേയര്‍ സ്ഥാനത്തേക്ക് സിപിഎം പരിഗണിക്കുന്നുണ്ട് എന്നാണ് വിവരം.

സിപിഎം തിരുവനന്തപുരം ജില്ലാ കമ്മിറ്റി അംഗങ്ങളായ ആര്‍ പി ശിവജി, എസ്‌ഐ സുന്ദര്‍ അടക്കമുളളവര്‍ സ്ഥാനാര്‍ത്ഥി പട്ടികയില്‍ ഇടം പിടിച്ചേക്കും. ഇക്കുറി ശക്തമായ മത്സരമാണ് തിരുവനന്തപുരം കോര്‍പറേഷനില്‍ നടക്കുക എന്നത് ഉറപ്പായിരിക്കുകയാണ്. കോര്‍പറേഷന്‍ വിട്ട് കൊടുക്കാതിരിക്കാന്‍ സിപിഎമ്മും പിടിച്ചെടുക്കാന്‍ കോണ്‍ഗ്രസും ബിജെപിയും ശക്തമായ പോരാളികളെ തന്നെ മത്സരത്തിന് ഇറക്കും.

പരമാവധി സീറ്റുകള്‍ സ്വന്തമാക്കുക എന്നതാണ് ഇരുപാര്‍ട്ടികളും ലക്ഷ്യമിടുന്നത്. കഴിഞ്ഞ തിരഞ്ഞെടുപ്പില്‍ കോര്‍പറേഷനില്‍ 52 സീറ്റുകളാണ് സിപിഎമ്മിന് ലഭിച്ചത്. സംസ്ഥാന സര്‍ക്കാരിന്റെ ഭരണനേട്ടങ്ങളും നിലവിലെ കോര്‍പറേഷന്‍ ഭരണസമിതിയുടെ പ്രവര്‍ത്തനങ്ങളും അടക്കം ഉയര്‍ത്തിയാണ് തിരുവനന്തപുരം കോര്‍പറേഷന്‍ ഭരണം നിലനിര്‍ത്താന്‍ സിപിഎം ഇറങ്ങുക.