റിപ്പോർട്ടർ വീണു! കുതിപ്പിന് കടിഞ്ഞാണിട്ട് ഏഷ്യാനെറ്റ് ന്യൂസ്, 5 ആഴ്ചയ്ക്ക് ശേഷം വീണ്ടും ഒന്നാം സ്ഥാനത്ത്

മലയാള വാര്‍ത്താ ചാനലുകളുടെ റേറ്റിംഗ് യുദ്ധത്തില്‍ ഏറെക്കാലം ഒന്നാം സ്ഥാനത്ത് ഏഷ്യാനെറ്റ് ന്യൂസിന് എതിരാളികളേ ഇല്ലായിരുന്നു. എന്നാല്‍ സമീപകാലത്ത് ഏഷ്യാനെറ്റ് ന്യൂസിന്റെ ഒന്നാം സ്ഥാനത്തിന് ആദ്യമായി ഇളക്കം തട്ടി. റിപ്പോര്‍ട്ടര്‍ ടിവിയാണ് ഏഷ്യാനെറ്റ് ന്യൂസിനെ രണ്ടാം സ്ഥാനത്ത് തളളി ഒന്നാമത് എത്തിയത്. തുടര്‍ച്ചയായ 5 ആഴ്ചകളില്‍ റേറ്റിംഗ് ചാര്‍ട്ടില്‍ ഒന്നാം നമ്പര്‍ നിലനിര്‍ത്തി റിപ്പോര്‍ട്ടര്‍ കുതിച്ചു.

എന്നാല്‍ ആറാമത്തെ ആഴ്ച റിപ്പോര്‍ട്ടര്‍ ടിവിയുടെ കുതിപ്പിന് കടിഞ്ഞാണ്‍ വീണിരിക്കുകയാണ്. റിപ്പോര്‍ട്ടറിനെ പിന്നിലാക്കി ഏഷ്യാനെറ്റ് ന്യൂസ് വീണ്ടും ഒന്നാം സ്ഥാനം തിരിച്ച് പിടിച്ചിരിക്കുന്നു. ഏറ്റവും പുതിയ ആഴ്ചയിലെ റേറ്റിംഗില്‍ ഏഷ്യാനെറ്റ് ന്യൂസിനുളളത് 91 പോയിന്റാണ്. റിപ്പോര്‍ട്ടറിനാകട്ടെ 86 പോയിന്റും. 24 ന്യൂസ് ആണ് 76 പോയിന്റുമായി മൂന്നാം സ്ഥാനത്ത് ഉളളത്.

42 പോയിന്റുമായി മനോരമ ന്യൂസ് നാലാം സ്ഥാനത്തും 38 പോയിന്റുമായി മാതൃഭൂമി ന്യൂസ് അഞ്ചാം സ്ഥാനത്തും നില്‍ക്കുന്നു. മലയാള വാര്‍ത്താ ചാനല്‍ രംഗത്തെ പുതുമുഖങ്ങളായ ന്യൂസ് മലയാളം 24 7 26 പോയിന്റുമായി ആറാം സ്ഥാനത്തുണ്ട്. അതേസമയം മറ്റൊരു പ്രമുഖ ചാനലായ ന്യൂസ് 18 കേരളത്തിന് 14 പോയിന്റുമായി 9ാം സ്ഥാനത്ത് എത്താനേ സാധിച്ചുളളൂ. 19 പോയിന്റുമായി ജനം ടിവി ഏഴാം സ്ഥാനത്തും കൈരളി ടിവി എട്ടാം സ്ഥാനത്തും തന്നെ തുടരുന്നു. വെറും 7 പോയിന്റുകളുമായി മീഡിയാ വണ്‍ ചാനലാണ് പട്ടികയില്‍ പത്താമത് ഉളളത്.

ഒന്നാം സ്ഥാനത്തിന് വേണ്ടി കടുത്ത മത്സരമാണ് ഏഷ്യാനെറ്റ് ന്യൂസും റിപ്പോര്‍ട്ടര്‍ ടിവിയും തമ്മില്‍ ഏതാനും നാളുകളായി നടക്കുന്നത്. ഇരുപത്തിരണ്ടാം ആഴ്ചയിലെ റേറ്റിംഗില്‍ ഇരുചാനലുകളും തമ്മില്‍ വളരെ ചെറിയ പോയിന്റ് വ്യത്യാസം മാത്രമായിരുന്നു ഉണ്ടായിരുന്നത്. 91.54 പോയിന്റുമായി റിപ്പോര്‍ട്ടര്‍ ഒന്നാം സ്ഥാനത്ത് എത്തിയപ്പോള്‍ 89.85 പോയിന്റുമായി ഏഷ്യാനെറ്റ് ന്യൂസ് തൊട്ട് പിറകില്‍ തന്നെ ഉണ്ടായിരുന്നു. 75.28 പോയിന്റുമായി 24 ന്യൂസ് മൂന്നാം സ്ഥാനം നിലനിര്‍ത്തി.

മനോരമ ന്യൂസ് നാലാമതും മാതൃഭൂമി ന്യൂസ് അഞ്ചാമതും എത്തി. ന്യൂസ് മലയാളം 24 7 ആറാമത് എത്തിയപ്പോള്‍ ജനം ടിവി ഏഴാമതും കൈരളി ടിവി എട്ടാമതും ന്യൂസ് 18 കേരളം ഒന്‍പതാമതും എത്തി. കഴിഞ്ഞ ആഴ്ചയിലും പട്ടികയിലെ അവസാന സ്ഥാനക്കാരായത് മീഡിയാ വണ്‍ ചാനല്‍ തന്നെ ആയിരുന്നു.

അതിന് തൊട്ട് മുന്‍പ് ഇരുപത്തിയൊന്നാം ആഴ്ചയില്‍ റിപ്പോര്‍ട്ടര്‍ ടിവി ഒന്നാം സ്ഥാനത്ത് എത്തിയത് പോയിന്റ് നിലയില്‍ വ്യക്തമായ മുന്‍തൂക്കത്തോട് കൂടിയായിരുന്നു. 108. 8 ആണ് ആ ആഴ്ചയില്‍ റിപ്പോര്‍ട്ടര്‍ ടിവിക്ക് റേറ്റിംഗില്‍ ലഭിച്ചത്. ഏഷ്യാനെറ്റ് ന്യൂസിന് അന്ന് 94.77 പോയിന്റ് മാത്രമാണ് നേടാനായത്. മൂന്നാമത് എത്തിയ ട്വന്റി ഫോര്‍ ന്യൂസിന് 80.31 പോയിന്റ് ലഭിച്ചു. മനോരമയും മാതൃഭൂമിയും അടക്കമുളള മറ്റ് ചാനലുകള്‍ക്ക് പട്ടികയിലെ സ്ഥാനങ്ങളല്‍ ഒരു മുന്നേറ്റവും ഉണ്ടാക്കാന്‍ ഈ ആഴ്ചകളില്‍ സാധിച്ചിട്ടില്ല.