കുഞ്ഞമ്മ അനുഗ്രഹിച്ചാലും; ഞാനാ... ബിജെപി സ്ഥാനാര്ത്ഥി!!!
ആലപ്പുഴ: ജെഎസ്എസിന് സിപിഎം സീറ്റ് നിഷേധിച്ചപ്പോള് ബിജെപി സംസ്ഥാന അധ്യക്ഷന് കുമ്മനം രാജശേഖരന് കെആര് ഗൗരിയമ്മയെ പാര്ട്ടിയിലേക്ക് ക്ഷണിച്ചു. എന്നാല് ആ ക്ഷണം പൂര്ണമായും ഗൗരിയമ്മ സ്വീകരിച്ചില്ല. പക്ഷേ വിളിച്ചതില് സന്തോഷമുണ്ടെന്ന് അവര് മറുപടി നല്കി.
ഇടത്തും വലത്തുമില്ലാത്ത ഗൗരിയമ്മ എന്ഡിഎയുടെ ഘടകകക്ഷിയായി വരുമെന്ന് ചില ബിജെപി നേതാക്കള് ഇപ്പോഴും വിശ്വസിക്കുന്നുണ്ട്. അതുകൊണ്ടാണ് സിപിഎമ്മിനെ തള്ളിപ്പറഞ്ഞ കമ്മ്യൂണിസ്റ്റുകാരിയോട് അവര്ക്ക് കൂടുതല് ഇഷ്ടം തോന്നിയതും.
ഗൗരിയമ്മ എന്ഡിഎയിലേക്ക് വന്നാലും വേണ്ടില്ല, ഇല്ലെങ്കിലും വേണ്ടില്ല. അവരുടെ അനുഗ്രഹം മതിയെന്ന് ബിജെപി നേതാക്കള് വിചാരിച്ചാല് തെറ്റുപറയാനൊക്കില്ല. ആലപ്പുഴ മണ്ഡലത്തിലെ ബിജെപി. സ്ഥാനാര്ഥി അഡ്വ രണ്ജീത് ശ്രീനിവാസാണ് ഗൗരിയമ്മയെസന്ദര്ശിച്ച് അനുഗ്രഹം തേടിയത്. നിയോജക മണ്ഡലം പ്രസിഡന്റ് ജി വിനോദ് കുമാറും സ്ഥാനാര്ഥിക്കൊപ്പമുണ്ടായിരുന്നു.
സീറ്റു ചര്ച്ചകള്ക്കായി ക്ഷണിക്കുകയും പിന്നീട് ഗൗരിയമ്മയെ അപമാനിക്കുകയുമാണ് സിപിഎം ചെയ്തതെന്ന് ബിജെപി ആരോപിച്ചു. കമ്മ്യൂണിസ്റ്റ് പ്രസ്ഥാനത്തിനു വേണ്ടി തന്റെ നല്ല ജീവിതം മുഴുവന് ഉഴിഞ്ഞു വച്ച ഗൗരിയമ്മയോട് പാര്ട്ടി കാണിച്ചത് പൊറുക്കാനാവാത്ത തെറ്റാണ്. ജനം ഈ തിരഞ്ഞെടുപ്പില് ഇതിനു തക്കമറുപടി നല്കണമെന്നും ബിജെപി ആവശ്യപ്പെടുന്നു.
ഗൗരിയമ്മയെ ഒപ്പം കൂട്ടാന് ഇനി നേതാക്കള് എന്തെല്ലാം ചെയ്യുമെന്ന് ആര്ക്കറിയാം. കാരണം ഗൗരിയമ്മയ്ക്കുമുണ്ടല്ലോ കുറെയേറെ വോട്ടുകള്!!!